5
Ya a-appeh ni meippanggep etan ni leguntan netaneman ni grapes
1 Dengel yu et ia-appeh ku hu a-appeh ni gayyum *5:1 Huyyan kan Isaiah ni gayyum tu ey hi Apu Dios. kun meippanggep ni intanem tun grapes. Humman ni gayyum ku ey wada hu legunta tu etan di duntug ni kayyaggud puyek tu e netaneman ni grapes. †5:1 Yadda helag Israel ey hin-addum ni hi-gada hu kamei-ellig ni leguntan Apu Dios ni netaneman ni grapes. (Ang-ang yu hu Jeremiah 12:10, ya Psalm 80:8-19, et ya Matthew 21:33-45.) 2 Hinuklay tu et ekalen tudda batu et taneman tun kayyaggud ni grapes. Ingkapya tu mewan hu eta-gey ni a-abbung ni pan-eddugan tu et mengapyan keppallan tu. ‡5:2 Matthew 21:33, Mark 12:1 Hingged tu kelu-uman ni lameh ni intanem tun grapes, nem entannit nedateng ey mapeit tamtam da.
3 Kan nunman ni gayyum kuy “Hi-gayun tutu-un nampambebley di Jerusalem niyad Judah, keyuy et ang-angen yu, tep kele hanneya intanem ku? 4 Hipa na-mu hu eggak ipahding? Kele mapeit inlameh idan grapes ey hedin ya inamtak, man malumi-ih illameh da?
5 Heninnuy law hu ninemnem kun pehding kun leguntak: Bahbahen ku et ekalek ew katteg hu luhud tu et humgep ida hu animal di muyung et pangkanen da niya pan-igsin da intanem ku. §5:5 Hedin ya kan Apu Dios ni ‘animal di muyung,’ ey yadda iAssyria ni buhul idan helag Israel ni um-alin memahbah ni bebley da. 6 Eggak pegebbut ma-lat mebel-ah. Eggak puttuli kawit tu niya eggak hubkaya. Diman et keya-munan ni nahbitan ni helek niya mandalen ku hu kulput et eleg tu egahen hu udan.” *5:6 Hin-addum ni eleg peellin Apu Dios hu udan ma-lat kastiguen tudda hu manghay ni tutu-u tu. (Ang-ang yu hu Deut. 28:23-24, ya 2 Samuel 1:21, et ya 1 Kings 17:1.)
7 Huyyan a-appeh ku ey meippanggep idan iIsrael niyadda iJudah e tutu-un Apu Dios e Kabaelan tun emin. Hi-gada neidingpatan idan grapes ni inyayyaggud tun intanem. Impandidinel tun kayyaggud pehding da, nem beken kumedek tep ya papatey impenahding da. Ey impandidinel tu e meandeng pehding da, nem beken tep tu kumedek kadengngedengngela hu kapampehemmehemmekiddan daka panhelheltap ni edum da.
Ya kastiguddan tutu-un lawah daka pehpehding
8 Anggehemmek kayun tutu-u tep nanna-ud ni mekastigu kayu! Hi-gayun tagan tu gatang †5:8 Yadda helag Israel ey dammutun umbalal idan puyek ni edum da, nem eleg mabalin ni ida umgatang winu ida manggettang ni puyek tep yadda puyek da ey neika-peng ni hi-gadan pampuyyek dan ingganah. (Ang-ang yu hu Numbers 27:7-11 et ya 1 Kings 21:1-3) ni baley niya puyek et endi panha-adan ni edum ni tuu, tep ya pinhed yu ey ebuh kayun manha-ad di bebley yu. 9 Nem nanna-ud ni kastiguen dakeyun Apu Dios e Kabaelan tun emin, tep dingngel ku e kantun hi-gak ey “Emin idalli huyyan etta-teng niya kakkayyaggud ni baballey ey mangkebahbah ida niya mangkebe-ew ida. 10 Yadda grapes ni mahkang neitneman tu ey liman galon ni ebuh ni meinnum hu kekapyaan tu. Ya hampulun talub ni tanem ey hantalub ni ebuh illameh tu.”
11 Anggehemmek kayu tep nanna-ud ni mekastigu kayun tutu-u! Kayu kaumhaleman ni umbangun ni kakkabbuhhan et ya inum hu itaggan yu ingganah mehilleng niya ingganah makabbutteng kayu. 12 Ya mewan di yuka panhahamuli ey kayu kamengi-innum niya kayyaggud hu tenul idan gitalah yu, ya ayyuding yu niya ingngiing yu, nem eleg yu hengnguda niya eleg yu deyyawa hu kapehding Apu Dios. 13 Et humman hu, pambalin dakeyullin balud di neidawwin bebley. Mettey idalli aap-apu yun upa da, ey hi-gayun edum ey mettey kayulli tep ya ewew yu. 14 Et humman hu, kaman-am-amleng hu Dungay ni mengekmun idan kekeddangyan niyadda nangkewetwet ni iJerusalem, anin idan hi-gayun bimmebley ni kamambuttebutteng ni ngimmalangala.
15 Yan nunman alin aggew ey mebe-ingan kayun emin niya meibbabah ida kamampahhiya. 16 Nem hi Apu Dios e Kabaelan tun emin ey meiddeyyaw di meandeng ni tuka panhuwet niya kameang-ang hu kakinayyaggud tun peteg di tuka pehding. 17 Mambalin alin pengngannan ni kalneroh niya gelding niyadda impah da hu nebahbah ni bebley yu.
18 Anggehemmek kayu tep nanna-ud ni mekastigu kayu, tep eleg yu pinhed ni issiked ida lawah ni yuka pehpehding. 19 Kan yu kumedek ey “Hamban pepu-ut nan Apu Dios e Kayyaggud ni peteg ni Dios idan helag Israel et ipahding tun emin hu pinhed tun pehding ni hi-gami, et ang-angen mi pangngu hedin hipa dedan hu wadad nemnem tu.”
20 Anggehemmek kayu tep nanna-ud ni mekastigu kayu! Hi-gayun nahnahwi tuka pannemnem. Ya lawah ey kanyuy kayyaggud, ya kayyaggud ey kanyuy lawah. Hanniman mewan hu kawwalwal e kanyuy engeenget, ya engeenget ey kanyuy kawwalwal. Ya mapeit ey kanyuy malumi-ih, ey ya malumi-ih ey kanyu mewan ey mapeit.
21 Anggehemmek kayu tep nanna-ud ni mekastigu kayu tep ya yuka pannemnem ni annel yu ey nakannemneman kayu, niya nakallaing kayu.
22 Anggehemmek kayu tep nanna-ud ni mekastigu kayun tutu-un na-let ni um-inum niya hi-gayuddan nelaing ni mengapyan meinnum. 23 Anin ni hi-gayun beken ni meandeng hu tuka pehpehding e nealadda nambahul et humman ida kanyun endi bahul da ma-lat liblih idad kastigu da, tep bineyadan dakeyu. Et nealadda endi bahul da ey hi-gada kumedek mekastigu. ‡5:23 Ang-ang yu hu Isaiah 1:23 et ya 10:1-2.
24 Et humman hu, kayu kamei-ellig di nema-ganan ni dagemin gihheben. Ey kayu kamei-ellig etan di helek ni nabwel lamut tu e ittayab ni dibdib hu habung tun heni dep-ul. Mebahbah kayu tep nginhay yu hu tuttuddun Apu Dios e Kabaelan tun emin niya Kayyaggud ni peteg ni Dios idan helag Israel. 25 Nemahhig law bunget Apu Dios ni hi-gayun tutu-u tu, et humman hu pengastiguan dakeyu. Iggiwwed tudalli duntug §5:25 Ang-ang yu hu Isaiah 64:3, ya Jeremiah 4:24-26, ya Hebrews 12:26, ya Exodus 19:18 et ya Haggai 2:6. et mangkaiwehit idalli annel ni nangketey di keltad e heniddalli lugit. Nem eleg ali pay medeggem hu bunget Apu Dios. Nandaddan ni mengastigu pay ni hi-gayu.
26 Eyyagan tuddalli buhul yud nangkeidawwin bebley *5:26 Huyyaddan buhul da ey dammutun hi-gada etan ida sindalun Assyria ni nengubat ni Israel niya Judah eman ni 722 B.C. et yan 701 B.C. niyadda iBabilon ni nengubat ni Jerusalem eman ni 605 B.C. et pepu-ut dallin um-alin mengubbat ni hi-gayu. 27 Endin hi-gada hu meettu niya meihhungbub. Eleg ida man-iyyatu winu meuggip di dalan. Eleg meubbad hu ballikid da niya iket ni patut da. 28 Matedem hu paneda niya nandaddan idan umpana. Nangka-let hu kebayyu dan mengigguyyud ni kalesah ni panlugganan da niya nangka-let idan umbebsik. Yalli helin kalesah da ey henilli alipuhhapuh hu pehding tun mansillen. 29 Yadda sindalu da ey henidda layon ni kaman-elmem hedin wada pintey dan animal ni daka pan-ibsik di endi an memangngad. Hanniman ali dama pehding daddan tutu-uk.
30 Yan nunman alin keippahdingan idan nunya ey um-aliddad Israel hu buhul da e henidda layon ni kaman-elmem e henin bungug ni danum di baybay. Nemahhig ali pehding dan dedpapen da e panhelheltap dadda. Yalli ang-ang ni bebley di Israel ey anggehemmek niya engeenget tep hennian ni kulput hu petang. †5:30 [26-30] Ya pinhed idan nunyan verse ni e-helen ey yadda sindalun Assyria ni um-alin mengubbat niya memahbah ni Israel.
*5:1 5:1 Huyyan kan Isaiah ni gayyum tu ey hi Apu Dios.
†5:1 5:1 Yadda helag Israel ey hin-addum ni hi-gada hu kamei-ellig ni leguntan Apu Dios ni netaneman ni grapes. (Ang-ang yu hu Jeremiah 12:10, ya Psalm 80:8-19, et ya Matthew 21:33-45.)
‡5:2 5:2 Matthew 21:33, Mark 12:1
§5:5 5:5 Hedin ya kan Apu Dios ni ‘animal di muyung,’ ey yadda iAssyria ni buhul idan helag Israel ni um-alin memahbah ni bebley da.
*5:6 5:6 Hin-addum ni eleg peellin Apu Dios hu udan ma-lat kastiguen tudda hu manghay ni tutu-u tu. (Ang-ang yu hu Deut. 28:23-24, ya 2 Samuel 1:21, et ya 1 Kings 17:1.)
†5:8 5:8 Yadda helag Israel ey dammutun umbalal idan puyek ni edum da, nem eleg mabalin ni ida umgatang winu ida manggettang ni puyek tep yadda puyek da ey neika-peng ni hi-gadan pampuyyek dan ingganah. (Ang-ang yu hu Numbers 27:7-11 et ya 1 Kings 21:1-3)
‡5:23 5:23 Ang-ang yu hu Isaiah 1:23 et ya 10:1-2.
§5:25 5:25 Ang-ang yu hu Isaiah 64:3, ya Jeremiah 4:24-26, ya Hebrews 12:26, ya Exodus 19:18 et ya Haggai 2:6.
*5:26 5:26 Huyyaddan buhul da ey dammutun hi-gada etan ida sindalun Assyria ni nengubat ni Israel niya Judah eman ni 722 B.C. et yan 701 B.C. niyadda iBabilon ni nengubat ni Jerusalem eman ni 605 B.C.
†5:30 5:30 [26-30] Ya pinhed idan nunyan verse ni e-helen ey yadda sindalun Assyria ni um-alin mengubbat niya memahbah ni Israel.