Ya ehel apu Dios Isaiah 6

Pinutuk Apu Dios hi Isaiah ni prophet tu

1 Yan nunman ni toon ni neteyyan Ussiah e patul * ey inang-ang ku hu Ap-apu † ni yimmudung di yuddungngan ni patul. Kameang-ang dayaw tu ey hinephepan ni andukkey ni balwasi tu hu det-al ni Tempol. 2 Yad nanlinikweh di yinudungan tu ey wadadda anghel ni kamantettebbel ni han-e-nem hu payak da. Hinephepan ni dewwan payak da angah da, ya dewwan payak da ey hinephepan da heli da, et ya dewwan payak da ey daka ussalan umtayab. 3 Entanni ey nan-a-appeh ida e kandad a-appeh day “Hi Apu Dios e Kabaelan tun emin ey Kayyaggud ni peteg, Kayyaggud ni peteg, Kayyaggud ni peteg niya kameang-ang ni emin eyad puyek hu dayaw tu.” ‡

4 Entanni ey kamangkeiggiwwed hu Tempol tep ya bungug ni a-appeh da niya napnun ahuk.

5 Et kangkuy “Nanna-ud ni anggetakkut hu meippahding ni hi-gak tep nekalliwtannak. Anin ni ya nakka heppita et lawah ni emin. Ey anin idan edum kun nakka pekikkillawwi ey nekalliwtan ida dama. Ey nealay nak inang-ang eya Patul e hi Apu Dios e Kabaelan tun emin!” §

6 Entanni ey simmayab etan hakey ni anghel ey immalid kad-an ku e kinipit tu hakey ni ngalab ni tu inlad kapan-appisi. * 7 Intumuk tud bibil ku et kantuy “Na-kal law liwat mu niya neliwwan tep intumuk ku eya ngalab di bibil mu ma-lat melinggep ka law.”

8 Entanniy dingngel kun immehel hi Apu Dios ey kantuy “Hipa ittu-dak kud kad-an idan tutu-uk ni an mengituttuddun pinhed min ituttuddun hi-gada?” † Hinumang ku ey kangkuy “Adyahhak, hi-gak itu-dak mu et lumawwak.”

9 Et kantun hi-gak ey “Lakkay tep et mu ehelen idan tutu-uk e kammuy ‘Anin ni deddedngelen yu hu nakka ituttuddu et eleg yu han-awat. Ey anin ni ennang-angen yu et eleg yu damengu amta kameippenahding.’ ” ‡

10 Kantu mewan ey “Ma-mam ni pekelhi ulu da ma-lat eleg da awatan. Ey kulap mu mateda et eleg da han-ang-ang, ey tuleng mu tangila da et eleg da handengel niya eleg da han-awat. Tep gullat et ni beken idan henin nunman, ey han-ang-ang da, handengel da niya han-awat da, et mantuttuyyu ida, et pesinsahan ku hu liwat da.” §

11 Minahmahak e kangkuy “Ingganah ni pigantu pengippahdingak nunya?”

Ey kantuy “Ingganah mebahbah ida bebley et meendidda tutu-udman et mangkabeew emin hu baballey niya mangkebel-ah ida bebley et mambalin ni endi silbi da. 12 Ey ingganah pellaw kudda tutu-ud nangkeidawwi et endin hekey mambebley di bebley dad Israel. 13 Ey anin ni kantu et wadadda hahhakkey ni metdaan, et mebahbah ida damengu et henidda keyew ni nalngeh et ebuh law tunged tun wada. Nem anin ni hanniman meippahding et heniddalli etan ni tunged ni keyew ni umpingi mewan.” *

Isaiah
<
6
>

*6:1 6:1 Yan eman ni neteyyan nan Ussiah ey nelabah hu 740 ni toon et han maiungnga hi Jesus Christo.

†6:1 6:1 John 12:41

‡6:3 6:3 [1-3] Revelation 4:1-8

§6:5 6:5 Hedin nampeang-ang hi Apu Dios idan tutu-u, man daka gibbeka e nakalliwtan ida. Ey daka kulluga e hedin ang-angen da hi Apu Dios, ey nanna-ud ni mettey ida. Et mukun simmakut ni peteg hi Isaiah. Ang-ang yu hu Job 42:5-6, ya Luke 5:8 et ya Exodus 33:20.

*6:6 6:6 Leviticus 16:12

†6:8 6:8 Eleg ehelen Apu Dios e “pinhed ku,” tep kantuy “pinhed mi.” Tep huyya keang-angan tu e nalpu daman Ispirituh tu et hi Jesus Christo humman ni meituttuddu.

‡6:9 6:9 Mark 4:12 et ya Luke 8:10

§6:10 6:10 Ang-ang yu hu Matthew 13:15, ya John 12:40 et ya Acts 28:26-27.

*6:13 6:13 Humman keang-angan tu e anin ni mebahbah ida et wada namnamah dan peyaggud alin Apu Dios hu bebley da.