Ɨnyarʉbha ye embere ya
Yoohana
Ʉbhʉkangati
Ɨnyarʉbha yɨnʉ ɨkaandɨkwa na Yoohana. Mʉzɨnyarʉbha isatʉ za Yoohana, hanʉ akubhuga “itwɨ,” ariigamba umwene hamwɨmwɨ na abhatumwa abhakɨndichazɨ. Hanʉ aandikirɨ zɨnyarʉbha zɨnʉ, aarɨ akukunguhirɨ.
Mʉnyarʉbha yɨnʉ araandɨkɨra Abhakiriisitʉ, bhanʉ aarɨ asɨɨgirɨ bhʉkʉngʼu. Akabhabhɨrɨkɨra “abhaana bhaanɨ abhasɨɨgwa.”
Yoohana araandɨkɨra Abhakiriisitʉ korereke abhahɨ ʉbhʉtʉngɨri igʉrʉ wu ubhwikari bhwi Ikikiriisitʉ. Kwikɨ arahurucha amaangirijʉ igʉrʉ wa amiija gʉ ʉrʉrɨmɨ. Kwarɨ na abhiija obhorebhe bhanʉ bhaarɨ bhatigirɨ amasengerero, bhakabha bhariiruguura mʉrʉbhɨri ruyo na kʉnyaraganʼya amiija gʉ ʉrʉrɨmɨ.
Yoohana arakandikija kʉbha Yɨɨsu Kiriisitʉ ni ingʼana rya Mungu wʉnʉ aarɨ ʉmʉʉtʉ. Bhanʉ bhakubhuga Kiriisitʉ ataarɨ mʉʉtʉ, nɨ‑bhabhisa bha Kiriisitʉ, nɨ‑bhabhɨɨhi na ni‑bhiija bhʉ ʉrʉrɨmɨ. Mungu, nɨ‑bhʉsɨɨgi necho abhaatʉ bhaazɨ bhareenderwa kʉsɨɨgana, kʉ kʉbha ʉkʉsɨɨga Mungu nʉ ʉkʉsɨɨga ʉmʉkɨndichazʉ, ne‑kegero kɨmwɨ. Ʉbhʉhʉru bhwa kemerano bhʉrabhoneka ku kwisirirya Yɨɨsu Kiriisitʉ, ʉkʉtama kumwisirirya, ʉmʉʉtʉ atakʉtʉra kʉsʉngʼaana ʉbhʉhʉru bhwa kemerano.
1
Ɨngʼana yʉ ʉbhʉhʉru
1 Tʉrabharaganʼya ɨngʼana igʉrʉ wa wʉnʉ akubhirikirwa Ɨngʼana yʉ ʉbhʉhʉru, wʉnʉ aareho kurwa ʉbhʉtangɨ.*Rora Ʉbhʉtangɨ 1:1; Yoohana 1:1‑3. Itwɨ tʉkamwigwa na komorora na amɨɨsʉ gɨɨtʉ, tʉkamorora na kʉbhaabhaata na amabhoko gɨɨtʉ. 2 Ʉbhʉhʉru bhuyo bhʉkarorekana, na niitwɨ tʉkabhorora. Nangʉ tʉrabhamenyeekererya na kʉbharaganʼya ɨngʼana igʉrʉ wa wʉnʉ nɨ‑bhʉhʉru bhwa kemerano. Ewe aarɨ kwa Bhaabha Mungu, akarorekana kwa niitwɨ.†Rora Yoohana 1:14. 3 Tʉkamorora na kumwigwa, nangʉ tʉrabharaganʼya ɨngʼana igʉrʉ waazɨ, korereke mʉbhɨ ni ikigwatani na niitwɨ mubhwisirirya. Ikigwatani kɨnʉ tʉnachʉ nɨ‑hamwɨmwɨ na Bhaabha Mungu, nu Umwana waazɨ‡Umwana waazɨ. Kʉmaragɨrɨra bhʉkʉngʼu, rora ringʼana Umwana wa Mungu muKiniibhasa. Yɨɨsu Kiriisitʉ. 4 Tʉrabhaandɨkɨra ganʉ, korereke obhozomerwa bhwɨtʉ bhuhikɨ.
Ukwikara mubhwɨrʉ
5 Mmbe, amangʼana ganʉ twigwirɨ kurwa kwa Yɨɨsu Kiriisitʉ, nego tʉkʉbharwazɨra, Mungu ni‑bhwɨrʉ, ataana ikiirimya chʉchʉsi mʉʉsi waazɨ. 6 Arɨɨbhɨ tʉrabhuga tuni ikigwatani na Mungu, ɨnʉ tʉrakaja kwikara mukiirimya, tʉragamba ʉrʉrɨmɨ, na tʉtakokora eheene. 7 Nawe, arɨɨbhɨ turiikara mubhwɨrʉ, chɨmbu Mungu arɨ mubhwɨrʉ, tʉrabha ni ikigwatani itubheene kobheene. Na amasaahɨ gu Umwana waazɨ Yɨɨsu garabhɨngukya ʉbhʉbhɨ bhwɨtʉ bhwʉsi.
8 Arɨɨbhɨ tʉrabhuga kʉbha itwɨ tʉtaana ʉbhʉbhɨ bhwʉbhwʉsi, turiikangirirya itubheene, ne eheene ɨtarɨ kwa niitwɨ. 9 Nawe, arɨɨbhɨ tʉraatigɨ ʉbhʉbhɨ bhwɨtʉ, Mungu aratobheerera ʉbhʉbhɨ bhwɨtʉ na kʉtʉbhɨngukya ʉbhʉbhɨ bhwʉsi, kʉ kʉbha ewe, ne‑moheene na we eheene. 10 Turiibhugɨ tʉkɨɨrɨ kokora ʉbhʉbhɨ, tʉrakora Mungu mʉbhɨɨhi, na twangirɨ ringʼana ryazɨ kɨmwɨ.