2
Yɨɨsu Kiriisitʉ newe akʉtʉsabhɨra
1 Abhaana bhaanɨ abhasɨɨgwa, nɨrabhaandɨkɨra amangʼana gayo, korereke mʉtasarya. Nawe arɨɨbhɨ ʉmʉʉtʉ wʉwʉʉsi araasaryɨ, tunawe wʉnʉ akutwibhagɨra kwa Bhaabha Mungu. Wuyo newe Yɨɨsu Kiriisitʉ we eheene. 2 Ewe newe ikimweso*Ikimweso. Kʉmaragɨrɨra bhʉkʉngʼu, rora Ikiniibhasa. chu ukutugwatanʼya na Mungu ku kuruushaho ʉbhʉbhɨ bhwɨtʉ. Na ɨtarɨ ʉbhʉbhɨ bhwɨtʉ ubhwene, nawe nʉ ʉbhʉbhɨ bhwa abhaatʉ bhʉʉsi bha kʉʉsɨ.
3 Turiigwatɨ imigirʉ ja Mungu, neho tokomenya tumwɨzɨ. 4 Wʉwʉʉsi wʉnʉ akubhuga kʉbha amwɨzɨ Mungu ɨnʉ atakugwata imigirʉ jazɨ, nɨ‑mʉbhɨɨhi, atɨɨzɨ amaheene. 5 Nawe ʉmʉʉtʉ wʉnʉ akugwata ringʼana ryazɨ, maheene ʉbhʉsɨɨgi bhwa Mungu bhʉnagiibhwɨ heene heene. Kwa rɨnʉ tʉmɨnyirɨ kʉbha tunu ubhumwɨmwɨ na Mungu. 6 Ʉmʉʉtʉ wʉnʉ akubhuga anu ubhumwɨmwɨ na Mungu, areenderwa iikarɨ chɨmbu Yɨɨsu iikɨɨrɨ.
Amaswaja ga Yɨɨsu igʉrʉ wʉ ʉkʉsɨɨgana
7 Abhasɨɨgwa bhaanɨ, amaswaja ganʉ nɨkʉbhaandɨkɨra gatarɨ mahya, nawe nɨ‑maswaja gɨ ɨkarɨ garyagarya, ganʉ mwarɨ mwɨzɨ kwɨma hanʉ mwatangirɨ kwisirirya Kiriisitʉ.†Rora Yoohana 13:34. Amaswaja gɨ ɨkarɨ gayo, ni‑ringʼana rɨnʉ mwigwirɨ igʉrʉ wʉ ʉkʉsɨɨgana. 8 Nʉʉrʉbhu, amaswaja ganʉ nɨkʉbhaandɨkɨra, nego amahya. Amaheene ga riswaja rɨnʉ rɨkarorekana mubhwikari bhwa Yɨɨsu Kiriisitʉ, na mubhwikari bhwanyu, kʉ kʉbha ikiirimya kɨrahɨta nu ubhwɨrʉ bhwe eheene bhʉmarirɨ kʉbhanza.
9 Ʉmʉʉtʉ wʉwʉʉsi wʉnʉ akubhuga, ariikara mubhwɨrʉ ɨnʉ arabhiihirirwa abhahiiri bhaazɨ, akɨɨrɨ ariikara mukiirimya. 10 Wʉwʉʉsi wʉnʉ asɨɨgirɨ umuhiiri waazɨ, ariikara mubhwɨrʉ. Kɨtareeho chʉchʉsi kɨnʉ kikugirya asaryɨ. 11 Nawe wʉnʉ akubhiihirirwa umuhiiri waazɨ, ari mukiirimya. Na aragenda mukiirimya, ɨnʉ atɨɨzɨ hanʉ akuja, kʉ kʉbha ikiirimya kikundikiiryɨ amɨɨsʉ gaazɨ.
12 Nɨrabhaandɨkɨra abhaana bhaanɨ abhasɨɨgwa,
kʉ kʉbha ʉbhʉbhɨ bhwanyu bhʉbhɨɨrɨɨrwɨ kʉ kʉhɨtɨra Yɨɨsu Kiriisitʉ.
13 Nɨrabhaandɨkɨra bhabhaabha,
kʉ kʉbha mwɨzɨ Yɨɨsu Kiriisitʉ,
wʉnʉ aareho kwɨma ʉbhʉtangɨ.
Nɨrabhaandɨkɨra abhamura,
kʉ kʉbha muhizirɨ Shɨtaani.
Nɨrabhaandɨkɨra abhaana,
kʉ kʉbha mwɨzɨ Bhaabha Mungu.
14 Nɨrabhaandɨkɨra bhabhaabha,
kʉ kʉbha mwɨzɨ Yɨɨsu Kiriisitʉ,
wʉnʉ aareho kwɨma ʉbhʉtangɨ.
Nɨrabhaandɨkɨra abhamura,
kʉ kʉbha mʉna amanaga,
mʉrakaja kugwata ɨngʼana ya Mungu,
na muhizirɨ Shɨtaani.
15 Mʉtasɨɨga kokora ʉbhʉbhɨ bhwɨ ɨɨsɨ, na amangʼana ganʉ garɨ mʉʉsɨ. Ʉmʉʉtʉ wʉnʉ asɨɨgirɨ ɨɨsɨ, ʉbhʉsɨɨgi bhwa Bhaabha ataanabhwɨ. 16 Ʉbhʉbhɨ bhwa kʉʉsɨ nebhwe bhʉnʉ, umwʉyʉ ʉmʉbhɨ gwʉ ʉmʉbhɨrɨ, rihari ryʉ ʉkʉbha nachʉ chʉchʉsi kɨnʉ ʉmʉʉtʉ akɨrʉʉzɨ, nu ubhwiyungi kʉ kʉbha yu ubhuniibhi. Bhyʉsi bhiyo bhɨtakurwa kwa Bhaabha Mungu nawe bhɨrarwa mʉʉsɨ mʉnʉ. 17 Ɨɨsɨ hamwɨmwɨ nɨ ɨnamba yaku ɨmbɨ, bhɨrahɨta. Nawe wʉwʉʉsi wʉnʉ akokora chɨmbu Mungu akwenda, arabha nʉ ʉbhʉhʉru bhwa kemerano.
Abhabhisa bha Kiriisitʉ
18 Abhaana bhaanɨ abhasɨɨgwa, zisikʉ zɨ ɨtɨnɨrʉ zihikirɨ! Mwigwirɨ umubhisa wa Kiriisitʉ‡Umubhisa wa Kiriisitʉ, enzobhooro yaku nɨ‑wʉnʉ akwanga Kiriisitʉ. araaza, na nangʉ abhabhisa bhaaru bha Kiriisitʉ bhamarirɨ kuuza. Ɨbhu nɨmbu tʉmɨnyirɨ turi muzisikʉ zɨ ɨtɨnɨrʉ. 19 Abhaatʉ bhayo bharuurɨ mʉmasengerero gɨɨtʉ, nawe bhataarɨ nu ubhumwɨmwɨ na niitwɨ. Bhangabhɨɨrɨ bhakɨndichɨtʉ bhaarɨ bharasaaga hamwɨmwɨ na niitwɨ. Nawe bhakarweho korereke emenyekanɨ kʉbha ɨtarɨ bhʉʉsi nɨ‑bhakɨndichɨtʉ.
20 Nawe imwɨ, Ʉmʉrɨndu Yɨɨsu abhahɨɨrɨ Ekoro yaazɨ,§Abhahɨɨrɨ Ekoro yaazɨ kuKigiriki nɨ‑mʉhakirwɨ amaguta. Ribhaga ryʉ Ʉbhʉragɨ bhwɨ Ɨkarɨ, Abhiiziraɨri bhaarɨ bharatʉʉra abhaatʉ momeremo ji ikikuhaani na jʉ ʉbhʉtɨmi. Bhakabhahaka amaguta kumitwɨ kwerecha kʉbha Mungu abhahɨɨrɨ emeremo obhorebhe hamwɨmwɨ nʉ ʉbhʉnaja bhwe Ekoro Ɨndɨndu. Kʉmaragɨrɨra bhʉkʉngʼu, rora ringʼana Ekoro Ɨndɨndu muKiniibhasa. Rora 1 Samwɨri 16:13; Isaaya 61:1. nangʉ imwʉsi mwɨzɨ amaheene. 21 Nɨtabhaandikiirɨ ɨnyarʉbha yɨnʉ, kʉ kʉbha mʉtɨɨzɨ amaheene, nawe kʉ kʉbha mwɨzɨ, rʉtareeho ʉrʉrɨmɨ rwʉrwʉsi rʉnʉ rukurwa kʉmaheene. 22 Ʉmʉʉtʉ ʉmʉbhɨɨhi nɨ‑wɨɨwɨ? Ʉmʉʉtʉ ʉmʉbhɨɨhi nɨ‑wʉwʉʉsi wʉnʉ akwanga Yɨɨsu ni‑Kiriisitʉ.*Kiriisitʉ, enzobhooro yaku nɨ‑wʉnʉ arʉbhwɨrwɨ na Mungu kʉbhasabhʉra abhaatʉ na kʉbhakangata mʉbhʉtɨmi bhwazɨ. Kʉmaragɨrɨra bhʉkʉngʼu, rora Ikiniibhasa. Wʉwʉʉsi wʉnʉ akwanga Bhaabha Mungu na Yɨɨsu Umwana waazɨ, newe umubhisa wa Kiriisitʉ. 23 Ʉmʉʉtʉ wʉnʉ akwanga Umwana, ataana bhʉmwɨ na Bhaabha Mungu. Nawe, wʉnʉ akwisirirya Umwana mʉbhʉtangɨ bhwa abhaatʉ, anʉ ʉbhʉmwɨmwɨ na Bhaabha Mungu.
24 Nangʉ, mʉkajɨ kʉgagwata mumyʉyʉ janyu amangʼana ganʉ mwijibhwɨ kwɨma ʉbhʉtangɨ. Arɨɨbhɨ mʉrakaja kugwata amiija gayo, mʉrabha nʉ ʉbhʉmwɨ nu Umwana na Bhaabha Mungu. 25 Na bhuyo, nebhwe ʉbhʉragɨ bhwʉ ʉbhʉhʉru bhwa kemerano bhʉnʉ atʉragɨɨnʼyɨ.
26 Nɨbhaandikiirɨ amangʼana gayo, kʉbharecha igʉrʉ wa abhaatʉ bhanʉ bhakwenda kʉbharimirya. 27 Nawe imwɨ, Kiriisitʉ abhahɨɨrɨ Ekoro Ɨndɨndu, yɨnʉ ikwikara kwa niimwɨ. Wuyo newe akubhiija gʉʉsi, na amiija gaazɨ nɨ‑ga amaheene, gatarɨ gʉ ʉrʉrɨmɨ. Kwɨbhu, mʉtakwenderwa kwijibhwa na wʉndɨ.†Rora Yoohana 14:26. Chɨmbu Ekoro ibhiijiryɨ, mʉkajɨ kʉbha nu ubhumwɨmwɨ na Kiriisitʉ.
28 Nangʉ abhaana bhaanɨ abhasɨɨgwa, mʉkajɨ kʉbha nu ubhumwɨmwɨ na Kiriisitʉ, korereke ribhaga rɨnʉ arɨɨgarʉkɨ, tʉbhɨ nʉ ʉbhʉkararu, tʉtasʉʉka embere waazɨ.
29 Arɨɨbhɨ mwɨzɨ Kiriisitʉ, ne‑moheene, momenye wʉwʉʉsi wʉnʉ akokora ge eheene, ni‑mwana wa Mungu.
*2:2 Ikimweso. Kʉmaragɨrɨra bhʉkʉngʼu, rora Ikiniibhasa.
†2:7 Rora Yoohana 13:34.
‡2:18 Umubhisa wa Kiriisitʉ, enzobhooro yaku nɨ‑wʉnʉ akwanga Kiriisitʉ.
§2:20 Abhahɨɨrɨ Ekoro yaazɨ kuKigiriki nɨ‑mʉhakirwɨ amaguta. Ribhaga ryʉ Ʉbhʉragɨ bhwɨ Ɨkarɨ, Abhiiziraɨri bhaarɨ bharatʉʉra abhaatʉ momeremo ji ikikuhaani na jʉ ʉbhʉtɨmi. Bhakabhahaka amaguta kumitwɨ kwerecha kʉbha Mungu abhahɨɨrɨ emeremo obhorebhe hamwɨmwɨ nʉ ʉbhʉnaja bhwe Ekoro Ɨndɨndu. Kʉmaragɨrɨra bhʉkʉngʼu, rora ringʼana Ekoro Ɨndɨndu muKiniibhasa. Rora 1 Samwɨri 16:13; Isaaya 61:1.
*2:22 Kiriisitʉ, enzobhooro yaku nɨ‑wʉnʉ arʉbhwɨrwɨ na Mungu kʉbhasabhʉra abhaatʉ na kʉbhakangata mʉbhʉtɨmi bhwazɨ. Kʉmaragɨrɨra bhʉkʉngʼu, rora Ikiniibhasa.
†2:27 Rora Yoohana 14:26.