Ɨnyarʉbha kwa
Abhɨɨbhuraaniya
Ʉbhʉkangati
Umwandiki wɨ ɨnyarʉbha kʉBhɨɨbhuraaniya atakomenyekana kwa niitwɨ, ɨratʉra kʉbha umutumwa Paaurʉ, Ruuka, Bharinaabha, hamwɨ wʉndɨ. Umwandiki wɨ ɨnyarʉbha yɨnʉ aarɨ Umukiriisitʉ wʉnʉ aamɨnyirɨ bhʉkʉngʼu Ʉbhʉragɨ bhwɨ Ɨkarɨ. Ɨnyarʉbha yɨnʉ ɨkaandɨkwa ribhaga rɨnʉ rihekaaru rya Mungu rya mʉrʉbhɨri rwa Yɨrusarɨɨmu rɨkɨɨrɨ kwashibhwa. Rihekaaru riyo, rɨkaashibhwa kumwaka gwa merongo muhungatɨ kwɨma hanʉ Yɨɨsu Kiriisitʉ ibhwirwɨ.
Umwandiki wɨ ɨnyarʉbha yɨnʉ aarɨ araandɨkɨra Abhakiriisitʉ bhɨ Ɨkɨyaahudi bhanʉ bhaarɨ bharanyaakibhwa na abhaatʉ bhanʉ bhaarɨ bhakwanga ubhwisirirya bhwabhʉ. Umwandiki aarɨ arabhaha umwʉyʉ mubhwisirirya bhwabhʉ na kʉbharecha bhatagarʉkɨra isimʉka yɨ Ɨkɨyaahudi. Akakorabhu kwa kʉgarʉkɨra kwandɨka amangʼana maaru kurwa Ʉbhʉragɨ bhwɨ Ɨkarɨ ganʉ gakwerecha chɨmbu Yɨɨsu aakʉrirɨ ʉbhʉrʉʉti ne emeremo ju ubhukuhaani ʉbhʉkʉrʉ bhwɨ Ɨkɨyaahudi. Aramenyeekererya kʉbha Yɨɨsu akaaza kokora imigirʉ ja Musa korereke abhakuhaani bhatahurucha ikimweso naatu. Yɨɨsu umwene aratʉra kʉsabhʉra abhaatʉ kʉ kʉbha ewe ni‑Mwana wa Mungu, Kuhaani Ʉmʉkʉrʉ ataana isoro, ni ikimweso kʉbhʉbhɨ bhwɨtʉ.
Ubhwɨndi bhwu umwandiki bhwarɨ ni‑kwerecha kʉbha Yɨɨsu newe akwerecha ʉbhʉgʉngʉ bhwa Mungu. Na arakandikija Kiriisitʉ nɨ‑mʉkʉrʉ kʉkɨra bhamaraika, abhakangati na abhakuhaani bhʉʉsi. Kʉnzɨra ya Kiriisitʉ, abhaatʉ bhʉʉsi bharasʉngʼaana ubhutuurya bhwa amaheene.
1
Mungu agambirɨ kʉhɨtɨra ku Umwana waazɨ
1 Ɨkarɨ hayo, Mungu akagamba na bhasʉʉkʉrʉ bhɨɨtʉ manga kaaru na kwa nzɨra nzaru, kʉhɨtɨra kʉbharʉʉtɨrɨri. 2 Nawe zisikʉ za mʉtɨnɨrʉ zɨnʉ, Mungu agambirɨ na niitwɨ kʉhɨtɨra Umwana waazɨ.*Umwana waazɨ. Kʉmaragɨrɨra bhʉkʉngʼu, rora ringʼana Umwana wa Mungu muKiniibhasa. Akarobhora Umwana wuyo, agabhɨ ebhegero bhyʉsi, na kʉhɨtɨra kwawɨ Mungu akateema icharʉ. 3 Umwana wuyo arabharya kʉbhʉgʉngʉ bhwa Mungu na areerecha habhwɨrʉ chɨmbu Mungu arɨ. Kʉhɨtɨra ʉbhʉnaja bhwɨ ɨngʼana yaazɨ, aragirya ebhegero bhyʉsi bhɨbhɨhʉ sikʉ zʉʉsi. Na akiihurucha ikimweso chu ukuruusha abhaatʉ ʉbhʉbhɨ, akaja mwisaarʉ, akiikara ʉrʉbhaara rwu ubhuryʉ rwa Mungu.
Yɨɨsu nɨ‑mʉkʉrʉ kʉkɨra bhamaraika
4 Mungu akakora Umwana waazɨ mʉkʉrʉ kʉkɨra bhamaraika,†Bhamaraika. Kʉmaragɨrɨra bhʉkʉngʼu, rora ringʼana maraika muKiniibhasa. chɨmbu iriina rɨnʉ aamʉhɨɨrɨ ni‑kʉrʉ kʉkɨra ga bhamaraika. 5 Na atareeho maraika wʉnʉ Mungu aabhuuriirɨ amangʼana ganʉ aabhuuriirɨ Yɨɨsu,
“Awɨ ni‑Mwana waanɨ,
reero nɨbhɨɨrɨ Wuusʉ.”‡Rora Zabhuri 2:7.
Na Mungu ataagambirɨ igʉrʉ wa maraika wʉwʉʉsi,
“Inyɨ nɨrabha Wiisɨ
neewe arabha Mwana waanɨ.”§Rora 2 Samwɨri 7:14.
6 Na hanʉ Mungu aatumirɨ Umwana waazɨ umumwɨmwɨ kʉʉsɨ, akabhuga,
“Bhamaraika bhʉʉsi bha Mungu bhasengere Umwana wuyo.”*Rora Amahiityʉ gi Imigirʉ 32:43.
7 Ni igʉrʉ wa bhamaraika abhugirɨ,
“Ahaakora bhamaraika bhaazɨ kʉbha ʉmʉkama,†Ʉmʉkama kuKigiriki rene enzobhooro ya ʉmʉkama ne ekoro.
na abhahocha bhaazɨ kʉbha ɨmɨrɨngɨɨri jo omorero.”‡Rora Zabhuri 104:4.
8 Nawe igʉrʉ wu Umwana waazɨ akabhuga,
“Awɨ Mungu ʉratema kemerano,
nʉ ʉbhʉkangati bhwazʉ bhʉrabha bhwe eheene.
9 Awɨ ʉhaasɨɨga amazʉmu,
na ʉhaabhiihirirwa amabhɨ.
Necho kiyo Mungu, Mungu waazʉ,
akʉhakirɨ amaguta go obhozomerwa,
korereke ʉbhɨ mʉkʉrʉ,
kʉkɨra abhakɨndichazʉ.”§Rora Zabhuri 45:6‑7.
10 Kwikɨ Mungu akabhuga,
“Ʉmʉkʉrʉ, awɨ ʉkateema ɨɨsɨ kwɨma kʉbhʉtangɨ,
na risaarʉ kʉmabhoko gaazʉ.
11 Ebhegero bhiyo bhyʉsi bhɨrasira,
bhɨranyara ncha zengebho,
nawe awɨ ʉrarama.
12 Na ʉrabhikunyakunya nche engebho,
bhɨragarurwa ncha zengebho.
Nawe awɨ ʉrasaaga wuryawurya,
ni imyaka jazʉ gɨtaana tɨnɨrʉ.”*Rora Zabhuri 102:25‑27.
13 Atareeho maraika wʉwʉʉsi wʉnʉ Mungu aamubhuuriirɨ,
“Ikara ʉrʉbhaara rwanɨ rwu ubhuryʉ,
kuhika hanʉ nɨkʉtʉʉra abhabhisa bhaazʉ iyaasɨ wa amagʉrʉ gaazʉ.”†Rora Zabhuri 110:1.
14 Bhamaraika nɨ‑kɨgʉrʉkɨ? Ne‑zekoro na nɨ‑bhahocha bha Mungu, bharatumwa, bhajɨ kohokerya abhaatʉ bhanʉ bhakʉsabhurwa.
*1:2 Umwana waazɨ. Kʉmaragɨrɨra bhʉkʉngʼu, rora ringʼana Umwana wa Mungu muKiniibhasa.
†1:4 Bhamaraika. Kʉmaragɨrɨra bhʉkʉngʼu, rora ringʼana maraika muKiniibhasa.
‡1:5 Rora Zabhuri 2:7.
§1:5 Rora 2 Samwɨri 7:14.
*1:6 Rora Amahiityʉ gi Imigirʉ 32:43.
†1:7 Ʉmʉkama kuKigiriki rene enzobhooro ya ʉmʉkama ne ekoro.
‡1:7 Rora Zabhuri 104:4.
§1:9 Rora Zabhuri 45:6‑7.
*1:12 Rora Zabhuri 102:25‑27.
†1:13 Rora Zabhuri 110:1.