Ɨnyarʉbha ya Paaurʉ kwa
Firimʉʉni
Ʉbhʉkangati
Ɨnyarʉbha yɨnʉ ɨkaandɨkwa nu umutumwa Paaurʉ kʉmʉʉtʉ wʉnʉ aarɨ arabhirikirwa Firimʉʉni. Ɨrarorekana Firimʉʉni aarɨ ariikara mʉrʉbhɨri rwa Korosaayi (Abhakorosaayi 4:9). Aarɨ muniibhi, naatu aarɨ na bhambʉʉsa. Firimʉʉni wuyo aarɨ Mukiriisitʉ, na munyumba yaazɨ nɨmu bhaarɨ bhariibhiringa Abhakiriisitʉ. Paaurʉ na Firimʉʉni bhakiimenya bhwaheene.
Paaurʉ akaandɨka ɨnyarʉbha yɨnʉ hanʉ aarɨ mokebhoho mʉrʉbhɨri rwa Ruumi. Akaandɨka ɨnyarʉbha yɨnʉ igʉrʉ wa mbʉʉsa wʉmwɨ wa Firimʉʉni, wʉnʉ aarɨ arabhirikirwa Ʉnɨsimʉ. Ɨrarorekana kʉbha mbʉʉsa wuyo akangʼosa Firimʉʉni. Akʉmara akarumana na Paaurʉ. Neho, Paaurʉ akamomenyeekererya Ɨngʼana Ɨnzʉmu igʉrʉ wa Yɨɨsu. Akʉmara, Ʉnɨsimʉ akiisirirya, akasabhʉka.
Kwibhaga riyo, mbʉʉsa wʉwʉʉsi araangʼose umuniibhi waazɨ, akʉmara akagwatwa, umuniibhi waazɨ aarɨ nʉ ʉbhʉnaja bhwu ukumwita. Nangʉ Paaurʉ aarɨ aratʉma Ʉnɨsimʉ kumuniibhi waazɨ Firimʉʉni. Neho Paaurʉ akaha Ʉnɨsimʉ ɨnyarʉbha yɨnʉ ahirɨrɨ Firimʉʉni. Mʉnyarʉbha yiyo Paaurʉ akasabha Firimʉʉni asʉngʼaanɨ Ʉnɨsimʉ nchʉ ʉmʉkɨndichazɨ, na ncha abhahiiri kwa Kiriisitʉ.
1
Amakeerenʼya
1 Ɨnyarʉbha yɨnʉ nandikirɨ inyɨ Paaurʉ, omobhohwa igʉrʉ wu ukwerekeererya Ɨngʼana Ɨnzʉmu igʉrʉ wa Yɨɨsu Kiriisitʉ, hamwɨmwɨ na Timoseo umwisirirya ʉmʉkɨndichɨtʉ. Nɨrakwandɨkɨra awɨ Firimʉʉni, ʉmʉsɨɨgwa wɨɨtʉ, omohocha ʉmʉkɨndichɨtʉ. 2 Tʉrakeerya nu umusubhaati Afiya nu umwitani ʉmʉkɨndichɨtʉ Arikipʉ, hamwɨmwɨ na abhaatʉ bha risengerero bhanʉ bhari yɨɨka waazʉ.
3 Ɨbhɨgʉngi no omorembe kurwa kwa Bhaabha Mungu, na kʉMʉkʉrʉ Yɨɨsu Kiriisitʉ, bhɨbhɨ na niimwɨ.
Ʉbhʉsɨɨgi nu ubhwisirirya bhwa Firimʉʉni
4 Ribhaga ryʉsi hanʉ nɨkʉkʉsabhɨra, nɨramukumya Mungu, 5 kʉ kʉbha niriigwa ʉrakaja kwisirirya Ʉmʉkʉrʉ Yɨɨsu na kʉbhasɨɨga abharɨndu bhʉʉsi bha Mungu. 6 Nɨrasabha Mungu ubhwisirirya bhʉnʉ ukugwatana hamwɨmwɨ na niitwɨ, bhʉkʉnajɨ komenya bhwaheene ʉrʉbhangʉ rwʉsi rʉnʉ tʉnarwɨ ku kugwatana na Kiriisitʉ. 7 Umuhiiri waanɨ, ʉbhʉsɨɨgi bhwazʉ bhʉnzʉmɨɨrɨ na kʉʉnaja bhʉkʉngʼu, kʉ kʉbha ʉsambarukiryɨ zekoro za abharɨndu bha Mungu.
Paaurʉ arasabha Firimʉʉni abheerere Ʉnɨsimʉ
8 Nʉʉrʉbhu, nangʉ kurwa kʉ ʉbhʉnaja bhʉnʉ nɨhɨɨrwɨ na Kiriisitʉ, nangaturirɨ kukuswaja kokora kɨnʉ ukwenderwa kokora. 9 Nawe igʉrʉ wʉ ʉbhʉsɨɨgi nɨrakwisasaama, kʉ kʉbha niinyɨ Paaurʉ, ʉmʉkaruka no omobhohwa igʉrʉ wa Yɨɨsu Kiriisitʉ. 10 Nangʉ nɨrakʉsabha igʉrʉ wu umwana waanɨ Ʉnɨsimʉ,*Ʉnɨsimʉ enzobhooro yaazɨ nɨ‑wʉnʉ akwenderwa kokora ingʼana irebhe. wʉnʉ nasakiiryɨ komomenya Kiriisitʉ, nɨrɨ mokebhoho. 11 Inyuma hayo, ewe aarɨ atakwenderwa kwa naawɨ, nawe nangʉ areenderwa kwa niinyɨ na naawɨ waku.
12 Nangʉ nɨragarucha kwa naawɨ, Ʉnɨsimʉ wʉnʉ nɨsɨɨgirɨ kumwʉyʉ gwanɨ gwʉsi. 13 Naarɨ nɨrasɨɨga iikarɨ uwaanɨ, korereke abhone umweya gwʉ kʉnsakirya igʉrʉ waazʉ, hanʉ nɨkʉbha mokebhoho igʉrʉ wɨ Ɨngʼana Ɨnzʉmu. 14 Nawe nɨtɨɨndirɨ kokora ryʉryʉsi nɨtaana rʉgʉsa rwazʉ, korereke ʉbhʉzʉmu bhwazʉ bhʉtabha ncha bhwi ihatɨkɨ, nawe bhʉbhɨ bhwa kwenda awɨ aumwene.
15 Hamwɨ, Ʉnɨsimʉ akarwa kwa naawɨ kwibhagabhu, korereke ʉbhɨ nawe ribhaga ɨrɨndɨ kemerano. 16 Kʉtangɨra nangwɨnʉ, ewe atarɨ ncha mbʉʉsa kwa naawɨ, nawe ewe nɨ mʉzʉmu kʉkɨra mbʉʉsa, aangɨ umuhiiri ʉmʉsɨɨgwa. Inyɨ nɨmʉsɨɨgirɨ bhʉkʉngʼu, awɨ ʉmʉsɨɨgirɨ kʉnkɨra, ncha mbʉʉsa wɨ waazʉ, na kʉ kʉbha awɨ neewe mugwatɨɨnɨ nʉ Ʉmʉkʉrʉ Yɨɨsu.
17 Mmbe, nangʉ arɨɨbhɨ ʉramenya kʉbha inyɨ nɨrɨ hamwɨmwɨ na naawɨ, ʉsʉngʼaanɨ wuyo chɨmbu wangansʉngʼaanirɨ inyɨ. 18 Na arɨɨbhɨ Ʉnɨsimʉ aakʉsaririryɨ ingʼana ryʉryʉsi, hamwɨ ʉramutunʼya ekegero, untunʼyɨ inyɨ. 19 Inyɨ Paaurʉ, nɨraandɨka kokobhoko kwanɨ inyimwene, nɨrakʉrɨha. Nɨtakukuhiitya kʉbha nɨrakutunʼya, kʉ kʉbha ku kwerekeererya kwanɨ, awɨ ʉkasabhurwa. 20 Nangʉ, umuhiiri waanɨ, onkorere rɨnʉ igʉrʉ wʉ Ʉmʉkʉrʉ, sambaarucha umwʉyʉ gwanɨ nchu umuhiiri kwa Kiriisitʉ.
21 Nɨrakwandɨkɨra ganʉ, kʉ kʉbha nɨɨzɨ ʉragiisirirya, na ʉrakora kʉkɨraho ganʉ nɨsabhirɨ.
22 Hamwɨmwɨ na gayo, onkonzere hu ukwikara, kʉ kʉbha niriisega kʉmasabhi gaanyu, Mungu aransakirya niizɨ kwa niimwɨ.
Amangʼana gʉ ʉkʉraga
23 Ɨpafura, omobhohwa ʉmʉkɨndichanɨ igʉrʉ wa Yɨɨsu Kiriisitʉ, arakokeerya. 24 Na abhahocha abhakɨndichanɨ Maaroko, Arisitʉʉrikʉ, Deema na Ruuka, bhʉʉsi bharakokeerya. 25 Ɨbhɨgʉngi bhyʉ Ʉmʉkʉrʉ Yɨɨsu Kiriisitʉ bhɨbhɨ na niimwɨ bhʉʉsi.