6
Amos 6:1-7
Täga itkamäŋ yäŋ jop nämo nadäneŋ
1 *Jer 5:5; Luk 6:24-25, 12:17-20; Jem 5:5; 1Pi 5:7 Butewaki pähap! Ämawebe Jerusalem yotpärareken irit säkgämän terak it täkaŋ in api waŋ moreneŋ! Ba Samaria pom terak itkaŋ imaka kubätä nin nämo api täŋpä waneŋ yäŋ nadäk täkaŋ in imaka, api waŋ moreneŋ. Ba Isrel äma wäp biŋam nikek, in imaka api waŋ moreneŋ. In täŋo kome u kome päke u bämopiken intäjukun itak, ba Isrel ämawebe täŋkentäk yäpmäkta in tabäŋ tarek täkaŋ upäŋkaŋ inä api waŋ moreneŋ.
2 Eruk, in päŋku Kalne yotpärare kaŋ kawut. Kaŋpäŋ unitä päŋku Hamat yotpärare pähap u kaŋ kawut. Kaŋpäŋ unitä päŋku Get yotpärare, Filistia komeken itak u kaŋ kawut. Jide, ämawebe äbot uwä in tärepmitpäŋ siwoŋi kuŋat täkaŋ ba? Ba unitäŋo kome intäŋo yärepmitkuk?
3 *5:18; Mat 24:48; 1Te 5:3; 2Pi 3:4; Rev 18:17 Butewaki! Täŋpäwak kadäni ninken täga nämo api ahäwek yäŋ nadäk täkaŋ. Upäŋkaŋ imaka wakiwaki täk täkaŋ unitä kadäni umuri pähap kubä api imagut yäpmäŋ äbek. 4 In tuŋum ämawebe itkaŋ däpmon patpat bukä säkgämän säkgämän terak pat täkaŋ, ba sipsip bulimakau gakŋi nikekpäŋ käroŋ nak täkaŋ. Unita in ket nadäwut. Inä api waŋ moreneŋ. 5 In orek patpat täŋpäŋ kap mebäri mebäri tekta gäripi nadäŋpäŋ Devittä teŋkuko udegän tena yäŋpäŋ gita utpäŋ kap teŋ ubik täk täkaŋ. 6 In wain ume bumta naŋkaŋ gupjin ägo wabikta gakŋi käbäŋi säkgämän nikekpäŋ ärut täkaŋ. Wära! Ude täŋkaŋ Isrel notjiye päke u waŋpäŋ itkaŋ unita butewaki kubä nämo nadäk täkaŋ. 7 Unita iwantä äbä Isrel ämawebe kome kudupiken täŋtäkŋat yäpmäŋ kunayäŋ täkaŋ uwä intä intäjukun api kuneŋ. Ude täŋpäŋ äŋnak-äŋnak pähap ba orek patpatjin uwä api paorek.