1 Täŋpäkaŋ Yawetä Moses ŋode iwetkuk; Eruk, Isip nanik täŋo intäjukun ämata jide täŋ imayäŋ nadätat u täŋira api käwen. Näkŋaken kehäromina terak intäjukun äma u täŋpewa Isrel ämawebenaye yabä kätäŋpewän api kuneŋ. Bureni, u komi mebäri mebäri terak peŋ iwerira täwat kireŋpewän Isip kome peŋpeŋ api kuneŋ. 2 *Stt 17:1, 28:3, 35:11; Kis 3:13-15 Ude yäŋpäŋ Anututä Moses ŋode iwetgän täŋkuk; Nadätan? Näk Yawe. 3 Näkä orajiye Abraham, Aisak, Jekop uken ahäŋ yämiŋira Anutu kehäromi mähemi yäŋ nabäŋpäŋ-nadäk täŋkuŋonik. Täŋpäkaŋ wäpna kudupi Yawe uwä nämo yäwet täŋkuronik. 4 Täŋkaŋ orajiye ukät topmäk-topmäk täŋpäŋ Kanan kome, äma äbani ude itkuŋo u inita biŋam yäniŋ kirekta yäŋkehärom taŋkut. 5 Täŋpäkaŋ Isip naniktä Isrel ämawebe komi piäken yepmaŋpäpäŋ itkaŋ yäŋkähän-kähän yäŋkuŋo unita nadäŋ yämiŋpäŋ topmäk-topmäk orajiyekät täŋkuro u juku piŋkut. 6 Unita Moses, gäkä Isrel ämawebe manna ŋo kaŋ yäwet; Näk Yawe. Näk Isip komeken nanik tämagutpäŋ unitä komi bäräpi tamik täkaŋ u gänaŋ nanik ketäreŋpäŋ tepmaŋpa api kuneŋ. Täŋpäkaŋ jop nämo api tämaguret. Nämo, kehäromina terak Isip ämawebeta komi mebäri kubä yämiŋkaŋ in api tämaguret. 7 Ude täŋkaŋ in täŋpewa näkŋaken ämawebenaye ude irirä näkŋa Anutujin api iret. Ude täŋira api nadäneŋ; Yawe Anutunin ŋowä Isip kome komi piäken nanik yäŋ-nimagurani u yäŋ api nadäwä täreneŋ. 8 Ude täŋkaŋ yäŋ-täkŋat yäpmäŋ kome, orajiye Abraham, Aisak, Jekopta yämikta yäŋkehärom taŋkutken kuŋkaŋ kome u injinta biŋam api taniŋ kirewet. Yawe näkä ude yäŋkehärom täyat. 9 Täŋpäkaŋ Mosestä man u Isrel ämawebe yäweränkaŋ upäŋkaŋ nämo nadäŋ imiŋkuŋ. Imata, Isip kome itkaŋ komi piä mebäri kubä täk täŋkuŋo unitä nadäk-nadäki täŋkuräk taŋpäŋ peŋkuk.

10 Täŋpäŋ Yawetä Moses ŋode iwetgän täŋkuk; 11 Gäk päŋku Isip nanik täŋo intäjukun äma u ŋode kaŋ iwet; Fero, gäk Isrel ämawebe yabäkätäŋ-pewi komeka ŋo peŋpeŋ kut! yäŋ kaŋ iwet. 12 Ude iweränä Mosestä iwetkuk; Täga yäyan. Upäŋkaŋ näk mena bäräpi. Isrel ämawebe näkŋo man nämo nadäŋ namik täkaŋ upäŋ Isip täŋo intäjukun äma u iwerawä näkŋo manna jide ude nadäwek? 13 Mosestä Yawe ude iweränkaŋ upäŋkaŋ Yawetä Moses kenta Aron ŋode peŋ yäwetkuk; Ek Isrel ämawebe ba Isip nanik täŋo intäjukun ämaken kuŋkaŋ Isrel ämawebe Isip komeken nanik yämagut yäpmäŋ äpämaŋ kaŋ kun yäk.