1 *Jon 12:38; Rom 10:16 Täŋpäkaŋ manbiŋam jukunin gänaŋ äpmoŋkuko u netätä nadäkinik täŋkuk? Ba Yawe täŋo kudän kudupi netätä kawän täreŋkuk?

2 Täŋpäkaŋ Yawetä nadäŋ imiŋirän iŋami terak päya dätäki ude, ba kome kawukiken mujipitä jäwäri äpmoŋpäŋ käruki tädorani ude ahäŋkuk.

Upäŋkaŋ u nintä kaŋgärip tänekta iŋami dapun säkgämän ude uwä nämo ahäŋkuk. Jide täŋpäŋ täktäki täga kubä täŋirän unita gäripi nadänam?

3 Nämo, ämatä u kaŋpäŋ eroni nadäŋpäŋ mäde ut imiŋkuŋ. Uwä komi bäräpi gänaŋ kuŋatpäŋ butewaki täŋo mebäri kawän täreŋkuŋ.

U äma waki yäŋ yäŋpäŋ kakta bitnäŋkumäŋ. Ba äma äpaniinik yäŋ yäŋpäŋ nadäŋ äwaräkuk täŋkumäŋ.

4 *Mat 8:17 Upäŋkaŋ uwä nintäŋo butewakinin buramiŋpäŋ nintäŋo komi bäräpinin kotaŋkuk. Ude täŋirän kaŋpäŋ nintä sära man ŋode yäŋkumäŋ; Wisik, Anututä mominita yäŋpäŋ kowata imitak.

5 *1Pi 2:24 Täŋpäkaŋ nintäŋo peŋawäkninta yäŋpäŋ nägät piŋkuk. Ba nintäŋo gwäjiwanita yäŋpäŋ däpmäŋ käkätkuŋ.

Ba momi täŋo kowata uterak äroŋkuko unitä nipmaŋpän tägaŋkumäŋ. Täŋpäkaŋ unitäŋo jibi unitä nintäŋo jibi täŋpewän tägaŋkuk.

6 *1Pi 2:25 Täŋpäkaŋ nin kuduptagän yawak peŋawäk täŋpani ude itkaŋ nininken gärip terak kuŋatkumäŋ.

Täŋitna Yawetä mominin täŋo kowata ninin yäpnaŋi u terak buŋätkuk.

7 *Rev 5:6 *Apos 8:32-33 U komi bäräpi imiŋkuŋo upäŋkaŋ ini yäpmäŋ äpäŋpäŋ man kubä nämo yäŋkuk. Uwä sipsip gubaŋi utta yäpmäŋ kuk täkaŋ ude yäŋikŋat yäpmäŋ kuŋkuŋ.

Ba pujiŋi madäŋ yämiŋirä man nämo yäk täkaŋ ude mankum itkuk.

8 Uwä jop ikŋatpäŋ manken teŋpäŋ kumäkta yäŋtäreŋ imiŋkaŋ yäpmäŋ päŋku utkuŋ.

Täŋpäkaŋ noriye bok kuŋatkuŋo uken nanik kubätä ŋode nämo nadäwän tumbuŋ; Nintäŋo peŋawäkninta yäŋpäŋ utkuŋ.

Ba näkŋo äbot täŋo momita kome terak irit kuŋatkuŋari däpmäŋ täkŋeŋkuŋ yäŋ nämoinik nadäwän täreŋkuŋ.

9 *1Pi 2:22 Uwä ämata komi yämani nämo, ba yäŋ-yäkŋarani man nämo yäwani upäŋkaŋ äma waki-waki-kät änekta yäŋtäreŋkuŋ. U kumäŋirän tuŋum äma täŋo awaŋken äneŋkuŋ.

10 Upäŋkaŋ Yawetä ini nadäŋ imiŋirän däpmäŋ käkärirä komi nadäŋkuk. Bureni, Yawetä nadäŋirän nintäŋo momi tärewekta äma u iniken gupipäŋ ärawa ude täŋkuk.

Ude täŋkuko unita kadäni käroŋi api irek. Itkaŋ kodakiniye ahäŋirä api yabäwek. Ba Yawe täŋo nadäk tawaŋ u iwatpäŋ täŋirän bureni api ahäwek.

11 Täŋpäkaŋ Yawetä ŋode yäyak; Bänepitä komi butewaki nadäwayäŋ täko unitäŋo bureni ahäŋirän oretoret api nadäwek.

Täŋkaŋ epän ämana siwoŋi u nadäk-nadäkitä äma mäyap täŋkentäŋ yämiŋirän iŋamnaken siwoŋi api itneŋ. Ba waki-wakini äma unitä api kotawek.

12 *Mak 15:28; Luk 22:37 Mebäri unita äma wäpi ärowani bämopiken näk wäp biŋam ärowani api imet.

Ude täŋira äma kehäromitä ämikken iwan täŋo kehäromi yäpmäŋ äpäŋpäŋ tuŋumi yäyomägatkaŋ yäpmäŋ daniŋpäŋ epän ämanata moräki api imineŋ.

U imata, u äma iŋamiken äma wakiwaki täŋpani ude äworeŋpäŋ iniken irit iniŋ kireŋpäŋ kumbuk. Bureni, ude täŋkuko uwä äma mäyap täŋo momi kotaŋkuk. Ba waki täŋpani täŋkentäŋ yämikta yäŋapik man yäŋkuk.