9
Sindaun 9:1-12
Nadäk-nadäk tägatä ämawebeta gera yäyak
1 Nadäk siwoŋi tägatä bek kehäromi 7 ude paiŋpäŋ uterak yori säkgämän täŋpäŋ peŋkuk.
2 Ude täŋpäŋ tom däpmäŋpäŋ ijiŋit wain ume täŋpewän gäripi nikek ahäwänkaŋ ketem nakta täŋtuŋum taŋkuk.
3 Ude täŋpäŋ epän watä webeniye yäwet-pewän päŋku yotpärare bämopiken gera ŋode yäŋkuŋ;
4 Oi, ämawebe nadäk-nadäkjin siwoŋi kubägän nämo, in näkä yotken äbut.
5 * Sam 22:26,29; Ais 55:1-3; Jon 6:27 Äbäŋkaŋ ketem ume säkgämän näkä täŋtuŋum täyat u naŋput!
6 Täŋguŋguŋ kädetjin u peŋpäŋ irit täga kaŋ yäput. Täŋkaŋ nadäk-nadäk täga täŋo kädet kaŋ iwarut.
Äma mebäri yarä täŋo man
7 Äma inita nadäŋirän ärowani täŋpani yäpi siwoŋtäwa yäŋpäŋ man yäweno uwä ganiŋ wärärek. U udegän, äma waki kubä ibeweno uwä nägät gurek.
8 Unita äma inita nadäŋirän ärowani täŋpani yäpi siwoŋtak man nämo iweren. U imata, äma uwä gäka gaŋani nadäŋ gamek.
Täŋ äma nadäk-nadäki täga kubä yäpi siwoŋtak man iwereno uwä gäka nadäŋ gamikinik täŋpek.
9 Äma nadäk-nadäk täga nikek yäwetpäŋ yäwoŋärek täŋpeno uwä nadäk-nadäki yäpurärätpäŋ nadäk-nadäk säkgämän ikek irek.
Bureni, gäk äma siwoŋi kubäta nadäk imeno uwä nadäk-nadäki yäpurärätpäŋ ätukät yäpek.
10 * Sam 111:10; Mat 11:27; Jon 17:3; 1Jo 5:20 Nadäkaŋ? Nadäk-nadäk täga nikek irayäŋ nadäŋpäŋä eruk Yawe u umuri yäŋ nadäŋpäŋ gämoriken kuŋaren.
Bureni, nadäk-nadäk täga yäpayäŋ nadäŋpäŋä Kudupi Äma unitäŋo mebäri nadäkta piäni täŋpen.
11 Nadäk-nadäk täga unitä täŋkentäŋ gamiŋirän kadäni käroŋi api it yäpmäŋ ärowen.
12 Täŋpäkaŋ nadäk-nadäk täga udewani nikek itpäŋ kuŋareno uwä nadäk-nadäk unitä api täŋkentäŋ gamek. Täŋ yäŋärok man yäŋpäŋ kuŋarani ude ireno uwä gäkŋa täŋpi waneŋ.