1 Sambasa mindina, Jisasa bala witi ee tupana tombenenga asia epo pea-kola, balana disaipolo tupamane bala watama epoto, ulia nono wato, witi dini tupa yoto, naka pima peai. *Lo 23:25 2 Yoto naka pima peai-kola, Patasai tupamane andoto, Gotena loo okomane loto, Sambasa angi wandakali-mane piape napipe-pene leya tekeko, nimbana disaipolo tupamane witi dini tupa yoto, naka pima peyai okonde leai. *Ek 20:10

3-4 Wuane leai-kola, Jisasato utupanena pii okone yano peyoto, Gotena loo okomane loto, Gotena lotu anda okona betesa Gote maiyene yalaini tupa pitisa akali tupamane angu nape-pene layene eya lea. Wandakali waka mindimane betesa utupane naa na-piyapape layene eya tekeko, wamba Dapitipi, akali bala towa atu ateaini tupapi, utupane yakama ulia nono yai-kola, balato Gotena lotu anda okonena kolandaka loto, betesa utupane noto, bala towa atu ateaini akali tupapi neakale mayane lo pepa pelene eya. Yakamato pii okone wamba dii lo anda napeaipe. *Pit 24:5-9; 1Sa 21:1-6 5 Dee, Mosesato pii mindi pepa peyoto, Sambasa angi pitisa akali tupamane lotu anda andane okona atoto, piape piyaini tekeko, Goteto koo tene mindi utupanenga yata na-alane leaipia. Yakamato pepa okone wamba dii lo anda napeaipe. *Nam 28:9-10

6-8 Yakamato lotu anda andane oko angini wete mindi ateya nembo teyai tekeko, namba epo atoto, lotu anda andane oko sia minuto, piape andane wete tupa piyawane lo nambato yakama langeyo. Akalina Iwanane nambato Sambasa oko ando atalawane. Gotena pii pepa pelene eya mindimane loto, wandakali-mane namba opa gipia lakae lo nambato nembo nateyo. Jia. Wandakali-mane yakamana yangone tupa ondo wato moyapiai lakae lo nambato nembo teyo layene eya. Yakamato pii okonena tene oko nembo tapiai-yale, koo tene mindi nambana disaipolo tupanga yaa napeya lo andapia-yale. Andoto, yakamato koo tene mindi utupanenga mee yata aa napiyiai-yale. Jisasato wuane lea. *Mt 9:13; 12:41-42; Ose 6:6

9 Wuane lalu, Jisasa bala yuu okone tepa alu poto, Juta yamena lotu anda okona kolandaka lea. 10 Kolandaka loto andea-kola, kini yangisa angu manda-tene akali mindi petea. Petea-kola, akali peteaini tupamane Jisasa kosimi lamakale nembo toto, bala tipa puato, Gotena loo okomane aki leyape. Sambasa angi akali mindimane wandakali siki pelene tupa mo atu yando, mana okone katupe, nakatupe leai. *Lk 14:3

11 Wuane leai-kola, Jisasato utupane tipa puato, Sambasa angi yakamana sipisipi mindi kundu mindina peakeando, yakamato sipisipi okone mia napene, kundu okonena yakale lo ando kondolo-peyaipe. Jia. Yakamato sipisipi okone yo lo molopeyai okoni. *Lk 14:5 12 Wandakali-mane yia sipisipi tupa sia minu, lipinga wete ateyai. Tene okonena, Gotena loo tupamane nanima languato, Sambasa angi, wandakali mindimane mana epene mindi minuto, yangone mindi mo atu yando, mana okone katu lolopeya leya.

13 Jisasato wuane lalu, akali kii koo okone lamawuato, nimbana kii koo oko tiyongo laa lea-kola, akali okonemane balana kii tiyongo lea. Balato balana kii okone tiyongo lea wete, balana kii koo okone atu yoto, yangisa epene ateane okopene teke gulea. 14 Sambasa angi Jisasato akali okonena kini mo atu ya-kola, Patasai utupane lotu anda oko tepa alu poto, nanimato anu puato, Jisasa peyo ome lamakalepe lo asia mindi aiya peainipia. *Jo 5:16

15-21 Patasai tupamane Jisasa peyo ome lamakale lo asia aiya pua ateai oko Jisasato andoto, yuu okone tepa alu pea. Pea-kola, wandakali kambua-mane bala watama epeyai oko andoto, Jisasato pii mindi Goteto bala andayo leane oko nembo tolo-peke lea. Pii okone nembo tolo-peke loto, balato Patasai utupane lamawuato, wamba potopesa akali Aisayato pii mindi pepa peyoto, nambato akali oo ateya oko towa epelewa yamapane yo atoto, balana mana tupa epele wete alawane leaipia. Nambato bala nambana piape akali ateakale lata ewane. Matili nambana sipitisa oko balanga epeakale lolowa-kola, balato nambana mana tika-pene tupa wandakali yame tupa pitaka lamaulu-peya. Balato utupane towa pii yanda pimawua, taimane nalolo-peya. Kambaiya mindi aŋa leka-getane atola-kola, balato okone minu leka wete na-olopeya. Ita lengane mindi tee puyale pula-kola, balato okone minu tee wete piya na-olopeya. Balato mana epene tika-pene tupa wato minu atama pulu, mana koo tupa sia minula gii okona giau lolopeya. Wuane pula-kola, wandakali yame tupa pitaka-mane balanga tungi peyoto, balato utupane moyolo-peya lo maliyo atolopeyai. Wamba potopesa akali Aisayato wuane loto, pepa okone peleane nembo tolo-peke loto, Jisasato Gotena pii okone enene guleakale nembo toto, wandakali siki pelene tupa pitaka mo atu yaka pea. Utupane mo atu yaka piyu, balato utupane lamawuato, nambato yakama mo atu eyo oko yakamato mindi wandakali lamaulaini. Jia wete lea. *Ais 42:1-4; Mt 3:17; 8:4; Mk 3:12

22 Okone angi wandakali minditupa-mane akali sipitisa koo atene mindi Jisasa ateanga atu aiyu epeai. Sipitisa koo mindi akali okonenga atea-kola, akali okone bala katulo pii na-lalaepia. Jisasato sipitisa koo okone peyo watalu, akali okone mo atu ya-kola, akali okone bala lee talu, pii lalu, pea. 23 Okone andoto, wandakali amunguli pua ateaini tupa pitaka-mane moko leai. Wandakali minditupa-mane akali oko bala kiŋi Dapiti yame mindi epolopeya layene yene pia okope lo tipa peainipia. 24 Tipa peai-kola, Patasai tupamane ale wato, Belesa-pulu bala sipitisa koo tupana akali kawane atoto, Jisasa minu tai laya eya-kola, balato sipitisa koo tupa peyo wata alane leai. *Mt 9:34; 10:24-25

25 Wuane leai-kola, Jisasato utupane lamawuato, kiŋi mindikina yame oko yapu lo lapo puato, yakama teke-teke yanda peapindo, yame okone koyolo-peya lea. Dee, tano mindikina yandopi, anda mindikina yandopi, wandakali paliyaini tupa yapu lo lapo puato, yanda peapindo, utupane tai ata napulu-peyai. 26 Belesa-puluto namba minu tai laya apia-kola, nambato sipitisa koo yame oko peyo watauwa-yale, Satane yame okone yapu lo lapo puato, yanda-pene gulapia-yale, anu puato balana yame oko tai atapia-yalepe. 27 Belesa-pulu balato namba minu tai laya eya-kola, nambato sipitisa koo tupa peyo watauwa-yale, Belesa-puluto Patasai yame yakamana disaipolo tupa minu tai laya eya-kola, utupane-mane sipitisa koo tupa peyo watapiai-yale. Yakama tanena disaipolo tupamane yakamana pii okone yapa lo tale puato, yakamato pii kopeta leyai lolopeyai.

28-29 Anu puato, wandakali mindimane akali tai mindina andaka kolandaka loto, minditaka yola tupa katulo mo awua polo-peyape. Balato akali tai oko wamba ini eyaka-mane andi lata yando, balato akali okonena andaka kolandaka loto, minditaka yolane tupa katulo mo awua polopeya. Wuane pua teke, Gotena Sipitisa okomane namba minu tai laya eya-kola, nambato akali tai Belesa-pulu oko wamba ini andi lata wato, balana andaka kolandaka loto, balana sipitisa koo tupa peyo wata alawane-ko. Goteto yakama moyo ando atolo ipupia lo yakamato nembo talapape. *Ap 10:37-38; 1Jo 3:7-8

30 Nambana yame ata na-piyaini wandakali tupamane namba yanda pingiyaini. Nambana sipisipi tupa mo amunguli na-piyaini wandakali tupamane nambana sipisipi tupa puu toko leakale loto, wata apialaini. *Mk 9:39-40; Lk 9:50 31 Wandakali mindimane mana koo okonepene mindi miniandopi, yangone mindi lamba leandopi, mana koo waka minditupa mineandopi, Goteto balana mana koo utupane pitaka apia-malupeya tekeko, wandakali mindimane Oli Sipitisa oko lamba leando, Goteto balana koo okone apia-mai napulu-peya lo nambato yakama langeyo. *Ip 6:4-6

32 Dee, wandakali mindimane Akalina Iwanane oko andayo pii koo mindi leando, Goteto balana koo okone apia-malupeya tekeko, wandakali mindimane Oli Sipitisa oko andayo pii koo mindi leando, andipapi, matili-matilipi, Goteto balana mana koo okone apia-mai napulu-peya. Oli Sipitisa okomane namba minu tai laya eya-kola, nambato sipitisa koo tupa peyo wata alawane. Wuane tekeko, yakama Patasai tupamane loto, sipitisa koo Belesa-puluto namba minu tai laya eya-kola, nambato sipitisa koo tupa peyo wato apialane leyai. Yakamato wuane leyai okomane Oli Sipitisa gene koo Belesa-pulu mawuato, bala lamba leyai okonde. Jisasato wuane leaipia.

33 Ita epene tupanga dini epene teke lialane. Ita koo tupanga dini koo teke lialane. Ita utupanena dini lula tupa andoto, wandakali-mane ita tupa yapa lo tale puato, ita oko epene ya, ita oko koo ya lalaini. *Mt 7:15-20

34-35 Wuane pua teke, wandakali epene tupana nembo-tene epene kambua paleya-kola, utupane-mane mana epene kambua minuto, pii epene teke lalaini. Wandakali koo tupana nembo-tene koo kambua paleya-kola, utupane-mane mana koo kambua minuto, pii koo teke lalaini. Tene okonena, Patasai yame yakama etelu koo gepo-mane mandiyene gulene atoto, pii epene mindi katulo na-lalaini. *Mt 3:7; 15:18; Lk 3:7; 6:45

36-37 Nimbato pii lolene tupa Goteto ale wato, nimba yapa lo tale pulupeya. Nimbato pii epene tupa lalene yando, Goteto nimba wandakali epene ya lolopeya. Nimbato pii koo tupa lalene yando, balato nimba wandakali koo ya lolopeya. Tene okonena, matili Goteto wandakali tupa yapa lo tale pula-angi, balato wandakali mindiki-mindiki lo tipa puato, anu peakale nimbato pii koo tupa wuane leepe lolopeya. Balato wuane lo tipa pula-angi, wandakali mindiki-mindiki lo balana pii okone yano peyoto, tene mindi wua pea-kola, nambato wuane lewa lape-pene gulolo-peya. Jisasato wuane lea.

38 Okone angi, loo tupana mana andene akalipi, Patasaipi, utupanena minditupa-mane Jisasa lamawuato, tisa, Goteto nimba moyo ateya-kola, nimbato piape pilini oko andamakale-ko. Nimbato metekolo piape mindi pula leai. *Mt 16:1; Lk 11:16; Jo 6:30-31 39 Wuane leai-kola, balato utupanena pii okone yano peyoto, wandakali yame koo andipa ateyai tupa yakamato Gote enene oko awua tepa alu, gote waka tupanga tungi peyo bilipi lalaini okomane yakama pamuku piyaini wandakali gulo atalaini lea. Yakamato namba languato, Goteto nimba moyo ateya-kola, nimbato piape pilini oko andawa loyale, metekolo piape mindi pula lalaini tekeko, nambato metekolo piape mindi andipa napukale. Jia. Wamba Goteto potopesa akali Jona balanga metekolo piape peane okonepene mindiki nambato matili pukale. *Mt 16:4; Mk 8:12 40 Wamba Goteto metekolo piape andane okone pea-angi, Potopesa akali Jona bala utulu otongapi oto tepo pisa andane mindina ini anda-pangosa paliyu, kamaka epeaipia. Wuane pua teke, matili Akalina Iwanane oko bala utulu otongapi ole tepo yuu pangosa paliyu, kamaka epolopeya. *Jon 1:17

41 Wamba Jona balato Gotena pii oko Ninipa tane wandakali tupa lamaiya-kola, utupane-mane ale wato, yamapane peke leainipia. Andipa Jona sia minene akali mindi epoto, Gotena pii lamawua ateya tekeko, wandakali andipa ateyai tupa yakamato ale wato, yamapane peke naleyai. Tene okonena, matili Goteto wandakali tupa yapa lo tale pula-angi, Ninipa tane wandakali tupamane wandakali andipa ateyai tupa yakamanga koo tene minditupa yata olopeyai. *Jon 3:5

42 Wamba kuwini wanda mindimane Simba yuu oko ando peteane-angi, wandakali-mane kiŋi Solomone bala akali mana andene mindi ateya leainipia. Wuane leai-kola, kuwini wanda okonemane balana pii ale wakale nembo toto, Simba yuu oko tepa alu, asia luu wete mindina pea-kola, Solomoneto Gotena pii oko bala lamai-yaepia. Andipa kiŋi Solomone sia minene akali mindi epo ateya tekeko, wandakali andipa ateyai tupa yakamato balana pii ale naeyai. Tene okonena, matili Goteto wandakali tupa pitaka malinga ika laya wato, utupane yapa lo tale pula-angi, kuwini wanda okonemane koo tene minditupa wandakali andipa ateyai tupanga yata olopeya. Jisasato wuane lea. *1Ki 10:1-10

43 Wuane lalu, Jisasato pii mindi tako pua loto, sipitisa koo mindi wandakali mindi balanga atolane oko awua tepa alu peya-angi, bala wandakali napalene yuu tupana epoko puato, oto mo atolane panda mindi aiya piyane lea. 44 Aiya pitete wato, anda nambato wamba awua tepa alu epewa okonena namba peke loto atokale lalane. Wuane lalu, bala anda okonena peke loto andeya-kola, anda ukuna okonena kangalamu yane tupa mindimane aki pua apea-kola, anda okone yati pitane epene ateyanga andalane.

45 Andalu, balato sipitisa koo wete yanasa bala sia minene tupa lamoto, utupane towa atu anda okonena peke loto atalaini. Wamba sipitisa koo mindiki akali okonenga atea-angi, bala kopeta ateane tekeko, andipa sipitisa koo kitupasa utupane balanga ateyai-kola, bala kopeta wete atalane. Wuane pua teke, wandakali yame koo andipa ateyai tupa matili kopeta wete atolopeyai. Jisasato wuane lea. *2Pi 2:20-21

46 Jisasato wandakali kambua ateaini tupanga pii lamawua atea-kola, balana angini amene ima epoto, bala towa pii lamakale lo kamaka maliyo ateainipia. 47 Maliyo ateai-kola, mindimane Jisasa lamawuato, nimbana angini, amene, utupane-mane nimba towa pii lamakale loto, kamaka maliyo ateyai lea. 48 Wuane lea-kola, Jisasato balana pii okone yano peyoto, nambana angini amene ima tupa api tupape lea.

49-50 Nambana Ayiane ati kenga ateya okona nembo-tene wato minalaini wandakali tupa nambana angini, amene, imalini, ima ateyai-ko. Yakamato nambana angini amene ima andalapa loto, Jisasato balana disaipolo tupa balana kii-mane waiyataka pea. *Lom 8:28-30