45
1 Ọwaa iphe Ojejoje ekfuru
onye ono, ọ fọtaru t'ọ bụru
eze; mbụ Sáyịrosu,
onye ọ lọtaru l'ẹka-ụtara
gude mekputakota iphe,
bụ mbakeshi, nọnu, byaru iya l'ifu;
bya egude nashịkota iphe,
bụ ndu ndu eze ngwa-ọgu ẹphe;
gụhashia ụzo gheberu iya ọnu;
k'ọphu ẹ taa gụ-chihedu iya agụ-chi.
2 Mu e-vuru ngu ụzo
je arakashịa ugvu ugvu;
nyakashịa ọgu nggamgbo,
e meru l'ope; bya
egbukashịa mgbọro-ígwè,
e gude tụ-chia ụzo.
3 Mu a-nụ ngu ẹku, nọ l'ọchi;
mbụ iphe-enweru,
e domiru l'ẹke dụ lẹ nsọ.
Onanu e-me t'ị maru lẹ
mu bụ Ojejoje, bụ
Nchileke kẹ ndu Ízurẹlu;
onye ekuje ngu ẹpha ngu gẹdegede.
4 Ọ kwa onye mu eme ele bụ
Jékọpu ono, bụ nwozi mu ono;
mbụ Ízurẹlu ono, bụ onye mu
fọtaru nwẹka-mu ono.
Yọ bụru iya kparu iphe
mu kuru ngu ẹpha;
woru ogenyi mee ngu
l'ẹbe abụ l'ị maru onye mu bụ.
5 “Ọ kwa mbẹdua bụ Ojejoje;
ọphu ọ dụhekwa onye ọdo, nọnu.
A -gụfu mbẹdua ta dụhekwa
Nchileke ọdo, nọnu.
Ọ bụ mbẹdua e-me tẹ ike
nọdu ngu; e gudekwaru
l'ẹ tị madụ onye mu bụ;
6 k'ọphu bụ shita l'ẹke
ẹnyanwu ahataje jeye l'ẹke ọodaje
b'a makwanụru
l'ẹ tọ dụhedu onye ọdo,
nọnu, ta bụdu mbẹdua.
Ọ kwa mbẹdua bụ Ojejoje;
ọphu ọ dụhekwa onye ọdo, nọnu.
7 Ọ kwa mbẹdua emeje
t'iphoro nọdu; mekwaphu; ọchi anọdu.
Ọ kwa mbẹdua emeje
t'e nweru iphe;
bụkwaruphu mu emeje t'ụtsuruku tsụa.
Ọ kwa mbẹdua, bụ Ojejoje
emekotaje iphemiphe
ọbule-a.
8 Nggụbe imigwe;
chịa odobe-ẹka-ndoo ọchi mini;
t'urukpu wụfu iya awụfu!
Tẹ mgboko kpuhaa ọnu;
tẹ ndzọfuta kfụfuta;
k'ọphu yẹle
odobe-ẹka-ndoo
a-chịko evu ugbo lanụ.
Ọ kwa mbẹdua,
bụ Ojejoje meru iya dobe.”
9 Nshọo onye etso onye
meru iya nụ ụswo;
mbụ onye ẹ te nwedu
iphe ọdo, ọobu;
gbahaa ite, a kpụru l'ụra.
Ụra; ?ọojije ọ-kpụ-ite iphe ọokpu?
Iphe i meru; ?ọo-nọnyaa; sụ
ngu l'i mekwaru iya; ya te nwe ẹka?
10 Nshọo nggụbe onye asụje nna
iya: “?Bụ ngụnu bẹ kparu iphe
ọ mụru ngu ẹge-a?”
M'ọ bụ onye asụje nne iya:
“?Bụ ngụnu b'ị mụru mu
ẹge-a?”
11 Ọwaa iphe Ojejoje ekfu
ndọ-ọ;
mbụ onye nsọ kẹ ndu Ízurẹlu;
mbụ iphe metaru Ízurẹlu.
Ọ sụru agha: “?Bụhunu ole
bụ kẹ t'unu wata mu ọji
njịkponu lẹ k'ụnwegirima mu?
Tọo ?unu a-nọdu atụru
mu ekemu ẹge mu e-me
iphe mu gude ẹka mu mee?
12 Ọ kwa mbẹdua meru
mgboko gẹdegede;
bya emee madzụ dobe iya.
Ọ kwa ẹka mu;
bẹ mu gude tọsaa igwe;
bya edokakota iya
mkpọ-kpodo l'ọ ha.
13 Ọ kwa mbẹdua meru tẹ
Sáyịrosu gbeshi egbeshi
gude koshi lẹ mu bụ
onye doberu ẹka ndoo.
Mu e-mekota ụzo iya
t'ọ dụ nhamụnha.
Ọo ya a-kpụ-kwazi
mkpụkpu mu ono
mee tẹ ndibe mu,
a kpụru lẹ ndzụ nweru onwẹphe.
Ọphu oomekwa iya
t'a kfụa ya ụgwo;
m'ọ bụ t'e bua ya nggo.”
Ono iphe Ojejoje, bụ Ọkaribe-Kakọta-Ike ekfu.
14 Ọwaa iphe Ojejoje ekfu:
“Iphe e metaru l'alị Íjiputu;
mẹkpo ngwa-aswa,
shi lẹ Kúshi; jeyekpo lẹ
gagorongu-gagorongu ndu
ono, shitsua alị Seba ono;
ẹphe a-lakfuta ngu;
bụkotaru nke ngu.
Ẹphe e-libe shi ngu azụ abya;
awụ kpọtikpoti awụ-kfuta ngu.
Ẹphe a-bya adashịa ngu pẹe l'ifu; l'arọ ngu; sụ:
‘Nchileke nọphu swiru ngu l'oswiya.
Ọ bụ Nchileke ono nwẹnkinyi iya bẹ nọnu;
Ẹ tọ dụhekwa Nchileke ọdo, nọnu gụfu iya.’ ”
15 Ọ bụkpo oswi-okfu l'ị bụ
Nchileke, anọduje edomi
onwiya edomi;
mbụ nggụbe Nchileke,
bụ onye dzọru ndu Ízurẹlu.
16 Iphe bụ ndu emeshi
ntẹkpe bẹ iphere e-me.
Mbụ l'ẹphe a-chịko mehu beringu.
17 Obenu lẹ ndu Ízurẹlu bẹ Ojejoje a-dzọ.
Mbụ l'adzọdzo,
ọo-dzọ ẹphe a-bụru
gbururu jeye lẹ gbururu.
Ọphu iphere abyadụ bya eme unu;
ọphu unu abyadụ bya eme
beringu gburu jeye lẹ tutu yoyo.
18 Kẹle Ojejoje; mbụ onye ono,
bụ iya meru igwe ono; sụru:
L'ọ kwa iya bụ Nchileke;
onye bụ iya kpụru mgboko; me iya.
Ọ bụ iya meberu mgboko;
ọphu o medu iya t'ọ daburu iphoro.
Ọ kpụtaru iya t'e buru iya eburu.
Ọ sụru: “Ọ kwa mbẹdua bụ Ojejoje;
ọphu ọ dụhekwa Ojejoje ọdo, nọnu.
19 Iphe mu kfuru bẹ mu te kfukwa l'ezita.
Mu te jekwa ọnodu
l'ẹkalanu l'alị, ọchi agba kfua ya.
Ọphu mu asụkwa eri
Jékọpu ẹphe t'ẹphe chọo mu kẹ mmanu.
Mụbe Ojejoje ekfuje
ire-lanụ; mu ekfuje iphe gbaru nụ.”
20 Unu dzukobe wụru bya!
Unu nọkobe l'ẹkalanu;
unubẹ ndu ono, shi l'iphe
bụ mbakeshi wafụ ono!
Ọ bụ ndu ta madu iphe bẹ ẹphe bụ;
mbụ ndu apajẹ ntẹkpe,
a pyịru l'oshi l'aghaphe;
mbụ ndu anọduje ekfu anụ
iphe ta adzọjedu madzụ ndzụ.
21 Unu kfunaa ẹge ọ dụ;
mbụ t'unu byanụ echia okfu unu.
T'ẹphe nọkobe chịaru iya idzu.
?Bụ onye bụ onye
kfuhawaru iphe-a teke teru ẹnya?
?Bụ onye meru t'a maru iya
teke tehakpowaru etete?
?Tọ bụdunua mbẹdua,
bụ Ojejoje?
Ọdo bụ l'ẹ to nwekwa
Nchileke ọdo, nọnu;
a gụfu mbẹdua.
Ọ bụ mbẹdua bụ Nchileke, doberu ẹka ndoo;
bya abụru mbẹdua bụ onye ndzọta.
Ẹ to nwehekwa onye ọdo;
m'a -gụfu mbẹdua.
22 Ghanụaru mu ifu; phụ l'aa-dzọ unu ndzụ
unubẹ ndu mgboko jeye l'ẹke o jeberu;
kẹ l'ọo mbẹdua bụ Nchileke;
ọphu ọ dụhekwa onye ọdo.
23 Mu gudewa onwomu ria angụ.
Mu gudewa ọnu mu kfua
okfu onye doberu ẹka ndoo;
mbụ okfu ẹ-ta aladu azụ.
Mu kfuru sụ l'iphe bụ
madzụ e-gbushiru mu ikpere.
Yọ bụru mbẹdua;
bẹ madzụ e-mekochaa gude erije angụ.*45:23 Róm 14:11.
24 “Ẹphe a-nọdu ekfu okfu mu; sụ:
‘L'ọ bụphu Ojejoje nwẹnkinyi iya;
bẹ odobe-ẹka ndoo;
mẹ ike nọ l'ẹka.’
Iphe bụ ndu ono phulihuru
tso iya okfu ono
bẹ a-bya awụfuta;
e mee ẹphe iphe-iphere.
25 Obenu l'iphe bụ eri ndu
Ízurẹlu a-nọdu l'ẹka Ojejoje
bụru ndu doberu ẹka ndoo;
bya egude Ojejoje eku onwẹphe.”

*45:23 45:23 Róm 14:11.

© 2014 WBT