48
Ízurẹlu; bụ 'anụganu
1 “Unu ngabẹ nchị l'okfu-a;
unubẹ ọnu-ụlo Jékọpu;
mbụ unubẹ ndu ono,
eekulaje Ízurẹlu ono;
mbụ unubẹ eri Júda;
mbụ unubẹ ndu egudeje
ẹpha Ojejoje eri nte;
l'akpọ-kuje Nchileke
kẹ ndu Ízurẹlu;
ọbu l'ẹ tọ dụkwa ọphu
unu eme l'ire-lanụ;
m'ọ bụ l'odobe-ẹka-ndo;
2 mbụ unubẹ ndu ono,
kuru onwunu ndu shi
lẹ mkpụkpu, dụ nsọ ono;
bya adakobe Nchileke kẹ ndu Ízurẹlu,
bụ Ojejoje,
bụ Ọkaribe-Kakọta-Ike,
bụ ẹpha iya.
3 Ọ bụru teke teruru ẹnya bẹ
mu kfuru iphe mewaru nụ.
Mu gudekpoo ọnu mu
kfua ya; raa ya arara;
a makọtaru;
a bya ele ẹnya;
mu emewaphu; yo emekota.
4 Kẹle mu mahawaru ẹge
ị bụ okwe-ịkpokponyi;
mbụ ẹge i kweberu
ike b'i shihuleruphu
ike l'ọ bụ ígwè;
mbụ l'ishi kpọru ngu
nkụ l'ọ bụ ígwè.
5 Yọ bụru iphe ono meru iphe
mu kfuhawaru ngu
iphe-a teke teruru ẹnya.
Tẹmanu yo mede;
bẹ mu vuhawaru ụzo
raaru ngu iya arara;
k'ọphu ẹ tịi sụkwanu l'ọ bụ
nte ngu meru iphe ono;
l'ọ bụ nwọgvu ono,
ị pyịru apyịpyi ono;
m'ọ bụ nwọgvu ngu
ọphu i gude igwe kpụa;
bẹ meru iya nụ.
6 Ị nụkotawaru iphemiphe ọbule-a.
Lekotawa iya ru ẹnya!
Tii kwetadu iya?
Nta-a bẹ mu abya ọwata
ngu okoshi iphe ọphungu,
bụ iphe e domiru edomi,
ẹ tii madu.
7 Iphe ono bụkwa-a nta-a;
b'e meru iya;
e te mehaakwa iya teke teru ẹnya.
Mbụ l'i tịi nụbudua ya
'abụdu ntanụ-a.
Ọo ya bụ l'ị tịi sụ-ghedu
l'ị matsụhawaru iya.
8 Ị tịi nụbudua ya;
ọphu ịimahaakwa ya;
mbụ keshinu ndiche
teke e te medua tẹ
nchị gụ-phongu ngu.
Kẹle mu maru l'ị bụ
ọkpobe onye ẹregede;
mbụ; e shirue teke a mụru
ngu kuta ngu o-kweru-ike.
9 Ọ kwa l'okfu ẹpha; mu meru
iphe mu eselakwadu ẹka azụ
l'oke ẹhu-eghughu mu.
Yọ bụru ẹge ee-me t'a jajẹ
mu ajaja meru iphe mu ta
nụbeheduru ngu oke ẹhu-eghughu mu;
k'ọphu mu te emedu ngu t'ị chịhu.
10 Tii ledu; lẹ mu nụ̀akwaru ngu anụ̀nu;
ọle ẹ tọ bụkwa l'ọ bụ
mkpọla-ọcha.
Mu abyakwaphu bya ahụ̀a
ngu l'ọku-ụzu kẹ iphe-ẹhuka.
11 Ọ kwa l'okfu ẹhu mu;
mbụ l'okfu ẹhu nke mu;
bẹ mu gude eme iya.
?Nanụ ẹge mu e-gbe haa
t'e mebyia ẹpha mu?
Mu te ewokwaru ugvu,
gbaru mu nụ onye ọdo.
Ízurẹlu enweru onwiya
12 “Ngabẹduduru mu phu nchị nggụbe Jékọpu;
mbụ nggụbe Ízurẹlu, bụ mu kuru iya:
Ọ kwa mbẹdua b'ọ bụ.
Ọ kwa mu bụ onye k'ọdungu;
bya abụru onye ikperazụ.
13 Ọ kwa mbẹdua gude ẹka mu
tọo ntọ-l'alị mgboko-a.
Yọ bụru ẹka-ụtara mu;
bẹ mu gude tọsakota igwe.
Mu -kua ẹphe; ẹphe awụ-lihu byatashia.
14 Unu chịko byakọta l'unu ha bya egebe nchị.
?Nanụ nte ọphu a-dụ ike
kfushiaru unu iphe-a:
mbụ l'onye ono,
mụbe Ojejoje fọtaru ono
e-meghe Bábyilọnu iphe
mu a-rị k'ome iya;
mbụ l'ọo-dụ-ghe ike mee
ndu Chalidiya ẹge ọ dụ iya tẹ ya mee ẹphe.
15 Ọ kwa mu; ọ kwa mbẹdua;
bẹ kfuru okfu ono.
Ọ kwa mbẹdua;
bẹ kuru iya nụ.
Ọ bụ mbẹdua;
bẹ dufutaru iya nụ;
oo-me iphe ọ byaru
ememe t'ọ kfụru.
16 Unu bya anọdu mu ntse;
gebe nchị l'iphe-a:
Keshinu keshinu;
bẹ mu te kfubudua okfu l'ezita.
Lẹ mbụlembu bẹ mu nọ l'ẹke oome.”
Nta-a bẹ Nnajiufu, bụ Ojejoje yẹle Ume nk'iya ziwaru mu tẹ mu bya.
17 Ọwaa iphe Ojejoje ekfu;
mbụ onye mgbafụta ngu ono,
bụ onye nsọ ndu Ízurẹlu.
Ọ sụru: “Ọ kwa mu bụ Ojejoje,
bụ Nchileke ngu;
onye bụ iya ezije ngu iphe,
a-dụru ngu lẹ mma;
onye bụ iya akpọ-zijeru
ngu ụzo, ịi-nọdu eshi.
18 Dege ọ bụru l'ị geberu nchị
mee iphe mu sụru t'e meje;
ẹhu-agu gege anọdulephu
atsọru ngu l'ọ bụ ẹnyimu.
Odobe-ẹka-ndoo ngu
a-nọdu atụ biibii l'ọ bụ
eyi eze ẹnyimu.
19 Eri ngu gege aza igweligwe l'ọ bụ ẹja.
Ụnwegirima ngu abụru
'agụta agụta l'ọ bụ akpụru ẹsusa.
Ẹpha ẹphe ta byadụ bya achịhu achịhu;
ọphu ẹphe abyadụ bya
abụru kpurupyata l'ifu mu.”
20 Unu kwafụ lẹ Bábyilọnu!
Unu gbalakwaaru ndu Bábyilọnu!
Unu kpọo geru geru;
kfua ya t'a nụkota iya!
Unu zia nzi t'o rukota ẹke
mgboko jebetsuaru!
Iphe unu e-kfu bụ lẹ
Ojejoje dzọwaru nwozi iya ono, bụ Jékọpu.
21 Ẹgu mini ta gụdu ẹphe teke
o duru ẹphe swee echi-ẹgu;
mbụ o meru; mini eshi
l'ikelegvu atsọshiru ẹphe.
Ọ kụkporu ikelegvu;
mini awata awụshi.
22 “Ndu eme iphe dụ ẹji;
bẹ ẹhu ta dụjekwa agu.”
Ono iphe Ojejoje ekfu ndono.

© 2014 WBT