47
Adada Bábyilọnu
1 “Nggụbe Bábyilọnu;
nyizitakwa bya anọdu l'alị!
Shi l'aba-eze ngu nyizita
bya anọdu l'alị nggụbe Bábyilọnu!
Kẹ l'ẹ to nwedu
l'ekukwadua ngu nwiru-alị;
mẹ onye dụ pẹlepele ọdo.
2 Wota o-ji-l'ẹka mkpuma gude gwee nri;
nggu aphụfu ụlari-ifu ngu!
Yefu uwe ngu; gbaru ọkpa ọtu;
je erughakota nggele!
3 Ịi-gbaru ọtu; ẹ te kpuchidu iphere ngu.
Mu e-melata; ọphu
ọ dụkwa onye mu a-ha.”
4 Mbụ l'onye mgbafụta ayi ono;
bẹ ẹpha iya bụ Ojejoje.
Ọ yẹbedua bụ
Ọkaribe-Kakọta-Ike;
bya abụru Onye nsọ kẹ ndu Ízurẹlu.
5 Dalẹkwaphu ashị!
Je anọdu l'ẹke gbakọtaru ọchi;
nggụbe nwada ndu Bábyilọnu.
Kẹle nta-a b'e te ekuhedu
ngu eze nwanyi, nwetsuaru alị-eze.
6 Ndibe mu meru;
iphe eghulahaa mu eghughu.
Mu eworu ndu ono,
bụ oke mu ono meru.
Mu nwuru ẹphe nụ ngu;
tịi phụduru ẹphe imiko.
I boru ẹphe ivu ẹra jeye
lẹ ndibe ẹphe, kahụru akahụ.
7 I kfuru sụ l'ịi-bụwaru
eze-nwanyi jeye lẹ gbururu.
Ọphu ị rị-vukpodua
iphemiphe ọbule-a;
iphemiphe ọbule-a;
m'ọ bụ t'egomunggo
gbarua ngu l'ẹge
o-mekocha dụ ẹphe l'ikperazụ.
8 Ọo ya bụ; ngabekpoduaphu nchị;
nggụbe ọ-nọdu-tụsaru-ẹhu ono;
mbụ nggụbe ọphu arịje
l'ẹ tọ dụdu iphe eme ngu nụ;
mbụ ị sụje onwongu
l'ọ bụ nggu nwẹnkinyi nọ;
l'ẹ tọ dụhedu onye ọdo;
a -gụfu nggụbedua;
l'ị tị byadụ abụ nwanyi,
nji iya nwụhuru;
nji iya nwụhuru;
ọphu ume nwa emedu ngu.
9 Iphe labụ-wa a-fụru ngu
lẹ beregedengu;
lẹ beregedengu;
mbụ l'ujiku lanụ;
bẹ ụnwu ngu a-nwụshihu;
nji ngu anwụhu.
Iphe labụ ono a-bya bya
emee t'ishi rua ngu alị.
Ẹ ti metakwa iya l'agwọgwoo.
10 “Kẹ l'ị dụwa onwongu mma
l'ẹnya l'iphe dụ ẹji, iime;
nggu ekfua sụ l'ẹ tọ dụdunu
onye phụru ngu nụ.
Yọ bụru mmamiphe ngu
yẹle iphe ị mụtaru bẹ dephuru ngu nụ;
mee ngu; nggu asụ l'ọ bụ
nggụbedua nwẹnkinyi ngu nọ;
l'ẹ tọ dụhedu onye ọdo a gụfu ngu.
11 Obenu lẹ ndakfu a-dakfu ngu-a;
to nwe iphe i gude adzọ onwongu.
Mbụ l'ukpuruku, e-kpu
ngu nụ b'ẹ tịi kọdu l'akọ.
Ụtsuruku, atsụ ngu lẹ
beregedengu b'ẹ tii phụdu l'ụzo.
12 Mekpelekwaphu amamanshi ẹge iime iya!
Nggu agbashịkpelephu
ọgbo maa ẹge ịigba iya,
bụ iphe i shiru lẹ nwata meta;
m'ọ -bụru l'o nweru-a uru,
i rita iya;
i rita iya;
mbụ; m'ọ -bụru lẹ nke ngu e-meghe-e.
13 Ishi iphe i kpatakọtaru bụ iphe o gbe
mee ngu bụ ike agvụgvu.
Ngwanụ; tẹ ndu ono,
edzejeru ngu mkpọkpo-odo;
maru iphe e-me nụ ono;
mbụ ndu ono, eleje ẹnya
lẹ mkpọkpo-odo;
kashịa iphe e-me
l'ọnwa l'ọnwa ono lụfutanu
bya adzọo ngu l'iphe
abyaru ngu amụru!
14 Ẹphe dụ l'ọ bụ ẹswa akpe,
kpọhuru nkụ.
Ọku a-dzukota ẹphe.
Mbụ ẹphe ta adzọ-ghedu onwẹphe;
t'ọku ono be nwu
phuraphura kefu ẹphe.
To nwedu icheku,
e gude anya ọku a-nọ l'ẹke ono;
ọphu ọ dụdu ọku,
aa-nọdu lẹ mgboro iya nyaa.
15 Ọ bụakwaphu iphe
ẹphe a-dụ ike meeru ngu ndono;
mbụ ndu-a, unu l'ẹphe
shi teke ị bụ nwata seta
akanya-a; zụta aswa-a.
Ẹphe ha e-shiswekotalephu ụzo;
ọphu ọ dụdu mẹ onye lanụ,
byaru bya adụ ike dzọo ngu.”