10
1 “Ọnodu ndzụ atsụwa mu l'ẹhu.
Ọo ya bụ tẹ mu bya
ekfushikota ẹke, ọotsu mu l'ẹhu; mbụ
kfushikota ẹge o ghu mu.
2 Mu a-sụ Nchileke:
T'ẹ b'ọ nmashịnu mu ikpe!
T'ọ gụshinuaru mu iphe, mu meru ọbu!
3 ?Tọo iphe, dụ ngu mma;
nggụbe Nchileke bụ t'ị nụa mu aphụ;
mbụ t'i mebyia iphe,
i gude ẹka ngu mee;
idzu, ndu ẹjo iphe egbe
bụleru ngu-a ọnu-ọchi.
4 Ẹnya ngu;
?ọ bụ ẹnya madzụ tọo.
T'ọ bụ ẹge madzụ
ele ẹnya l'iphe b'i leje iya.
5 ?Bụ ẹge nka kẹ madzụ beru;
bẹ nke ngu beru.
?Tọ bụ ẹge ịikata-be nka;
bẹ madzụ akatabe,
6 mekwanuru iphe, bụlephu
ẹke ọonmaru mu;
bẹ ịinoduje avọ;
l'achọkashi ẹke mu mesweru.
7 Obenu l'ị makwaru-a
l'ikpe ta nmadu mu;
ọphu ọ dụdu onye a-dụ ike
nafụta mu l'ẹka ngu.
8 ?Tọ bụdunua nggụbedua
gude ẹka ngu moo mu;
bya emee mu.
?Ịi-bya aghakọbe nta-a;
woru mu mebyishia tọo?
9 Nyatakwa l'ị kpụru mu l'ọ bụ ụra.
?Ịi-bya nta-a bya avọkposhia
mu tẹ mu bụru ẹja ọdo tọo?
10 Ọ bụ nggu metaru ụmuda,
e gude yee ime mu;
nggu abya emekwaaphu
tẹ mu nọdu l'ẹpho nne mu kpụa.
11 Nggu abya eworu anụ-ẹhu
yee mu oye uwe;
bya egude ọkpu
yẹle ụmi-ọkpu dzekfua mu.
12 Ọ bụ nggu nụru mu ndzụ;
bya eyeru mu obu.
Yọ bụru ẹge i gude ehe mu
meru iphe ndzụ dzuru mu.
13 Obenu l'o nweru iphe i shi
domiaru mu edomi;
mbụ lẹ mu marua l'ọ bụ iphe,
ị rịkohawaru mu arịko:
14 lẹ mu -mee, iphe dụ ẹji;
bẹ ịi-tụbekpele iya phụ nvọ;
l'ẹ tịi leswetadu ẹke mu mesweru.
15 Ọ -bụru l'ikpe nmaru mu;
t'aphụ bụkwaru nke mu!
Ikpe -laaru mu; bẹ mu
ta apalighekwa ifu apali;
kẹ l'iphere bụwa nke mu;
iphe-ẹhuka, mu eje abyawa mu ori ishi.
16 Mu -je ome lẹ mu paliru ishi;
nggu achịlahaa nta mu
l'ọ bụ agụ.
Nggu egude ike ngu ono,
dụ biribiri ono fụaru mu.
17 Ịikpobataje ndu ọphungu,
a-nọdu agba mu ekebe.
Mu egbe aka ngu ru
oghu eghughu l'ẹnya l'eje ejeje.
Ndu sọja ngu akpọje
iche iche abya mu otso ọgu.
18 ?Bụnua ngụnu meru iphe,
ị haru t'a mụa mu?
Ọ dụ mu t'a sụ lẹ mu
nwụhuru nne mu l'ẹpho.
19 Ọ g'aka mu mma;
ndẹge ọ bụru lẹ mu ta nọbua lẹ phu;
m'ọ kwanu lẹ mu shi l'ẹpho
tụa uswe lashia l'ili.
20 ?Mu a-nọ-bekwadu ịno-be agha?
Kụfunu mu ẹka t'ẹhu kabẹ
tsọo mu nwẹnaa;
21 tẹmanu mu aladẹ ẹke ono,
bụ; a -lawa iya;
ta alatahẹdu ọdo ono;
mbụ l'alị ono, nọdu gẹbeyingu;
gbaa tsụkiribangu ono;
22 ẹke ẹnyashi iya bụ abalị-ìshì;
iphe, nọ iya nụ abụru ẹkpuru-ọchi;
mẹ nwonyonyo,
gbakọtaru tsụbalangu;
bya abụru ẹke dụ gharagharaghara.”