11
Ọnu, Zofa eye
1 Tọ dụ iya bụ; Zofa, bụ onye Nema abya eyee ọnu; sụ:
2 “?Aa-ha oye ọnu l'iphe
ọwaa, i kfushiru-wa tọo?
?Iikfushi iphe-a l'ọo
t'a haaru ngu enge tọo?
3 Bẹbebe ono, iikfu ono;
?oo-me tẹ madzụ dobe ọnu
ndoo tọo.
I -jagee ndiphe ewena ono,
ịija ono; ?t'ẹ b'ọ dụ onye
a-gbọru ngu chaa tọo?
4 Ị sụru Nchileke l'iphe,
i kwetaru te nwedu ntụpo;
bya asụkwaphu l'ị bụ
onye dụ-geru nụ l'ẹnya Nchileke.
5 Ọle; ọ dụkwanu mu t'a sụ lẹ
Nchileke e-ye ọnu l'onwiya;
mbụ kpuhaa ọnu gbakụshi ngu iya;
6 mbụ kpuhaa mmamiphe gheberu ngu ọnu;
kẹ l'ọkpuberu mmamiphe
enweje ifu labụ.
Iphe, ịi-maru; Jobu;
bụ lẹ Nchileke gbe
tụ-zetakwa nụ ẹka l'àhụ̀hù,
ọohu ngu; ma l'ẹge iphe,
dụ ẹji, i meru ha.
7 ?Ịi-dụghe ike maru ẹge
Nchileke habe ogvu?
?Ịi-dụ ike vọo vọfuta ẹge
Ọkaribe-Kakọta-Ike beru?
8 Ọ kakwa akpamigwe l'eli;
?nanụ ẹge ii-me iya.
Ọ kakwa alị-maa ogvu;
?bụ ngụnu bẹ ịi-dụ ike maru.
9 Ọ kakwa mgboko-a ogologo;
kakwaphu eze ẹnyimu ụsa.
10 Nchileke -bya nta-a;
bya akpụta ngu tụ-chia;
kpụru ngu jeshia ụlo ikpe;
?bụ onye a-kpọ-shighe iya?
11 Nchileke makọtakwaru-a ndu ẹjire.
Teke ọ phụru iphe, dụ ẹji;
?tọo tụbejedu iya nvọ tọo?
12 Iphe, ọ bụ bụ l'ọ ka ntse ọzufuta
nkakfụ-ịgara-ọswa
t'ọ wata ome l'ọ bụ madzụ;
karia ome onye eswe
t'o nweru egomunggo.
13 Obenu l'i -wowaru obu ngu
tụ-pyo l'ẹke Nchileke nọ;
machịaru iya ẹka ngu ẹphe ẹbo;
14 bya esefukota ẹka l'iphe,
bụ iphe, dụ ẹji, iimeje;
tii kweje t'o nweru iphe,
dụ ẹji, a-nọ l'ufu ngu;
15 ono teke ịi-pali ifu apali;
iphere ta adụhe ngu.
Ọo ya bụ; nggu evudo kemukemu;
tịi tsụhe egvu.
16 Ono teke ịi-tụko
iphe-ẹhuka ngu l'ọ ha zahakọta.
Yọ dụ ngu l'ọ bụ ẹge ono,
utso abyatsuje; yọ laa ono.
17 Ndzụ ngu abya egbufu;
ka echi oke-eswe onwu enwunwu.
Ọchi abya asahụru ngu l'ọ bụ nchi-abọhu.
18 Ii-buru lẹ domangu rimangu;
kẹ l'o nweru iphe iile ẹnya iya.
Nggu anọdu tụfu ume l'ẹhu-gudangu.
19 Ịi-la l'ụlo; tọ dụ onye a-bya ngu oye egvu.
A dụ l'igwe byalahaa t'i yeru ẹphe ẹka.
20 Obenu lẹ ndu ẹjo iphe;
bẹ ụzo ẹphe e-mekochaa chihu;
ẹphe ta aphụ ụzo, ẹphe
e-shi nahụ.
Iphe, ẹphe a-nọdu ele
ẹnya iya nwẹnkinyi abụru anwụhu.”