15
Ọnu k'ẹbo, Elifazu eye
1 Tọ dụ iya bụ; Elifazu, bụ onye Témanu abya eyee ọnu; sụ:
2 “Onye maru iphe;
?ookfuje okfu, ẹ te nwedu ishi;
m'ọ bụ gude okfu,
ẹ-ta gadu mkpa eme t'ọ dzọo onwiya?
3 ?Bụ mkpọkoro-okfu;
bẹ onye maru iphe
egudeje eye ọnu l'okfu tọo;
?mbụ l'ekfu okfu,
ẹ ta dụdu m'ọo nanụ,
baru uru?
4 Obenu l'i woleruphu k'ọtsu
Nchileke egvu fua l'alị;
l'akpọshikwaphu t'e bẹ
eekfujehe anụ Nchileke.
5 Ọ bụ ẹjo ụdudu ngu ezi ngu iphe, ii-kfu;
yọ bụru ẹregede b'i gude ekfu iya.
6 Ọ kwa ọnu ngu anma ngu ikpe;
ẹ tọ kwa nke mu;
bụru ọnu ngu agba ngu ekebe.
7 ?Bụ nggu bụ onye ọdungu,
e vuru ụzo mụa.
?Ọ dụ ngu l'i vu ugvu ugvu
ụzo nọdu lẹ mgboko.
8 ?Ị nụjewaru idzu,
Nchileke chịru tọo?
?T'ịiri l'ọo nggu nwẹnkinyi; bẹ maru iphe?
9 ?Bụ ngụnu b'ị maru, ayịbedua ta madu?
?Bụ ngụnu bụ iphe,
edoje ngu ẹnya, ẹ te edojedu ayịbedua?
10 Ndu bụ ọgurenya;
mẹ ndu ishi-ẹwo bẹ ayi
l'ẹphe nọkwa l'ẹke-a;
mbụ ndu, bụ nna ngu phẹ ọgurenya.
11 Ike ono, Nchileke adụ ngu ono;
?ọ ha ngu nwanshị l'ẹnya tọo;
mbụ okfu ono, e ruberu
ẹhu erube l'ekfuru ngu ono.
12 ?Nanụ ẹge ọ dụ;
bẹ ọkpoma ada ngu kitikiti.
?Nanụ ẹge ọ dụ;
bẹ ịivo ẹnya ẹge ono;
13 kẹ t'i woru ẹhu-eghughu ngu
atụ-koshi Nchileke;
egbe okfu ọwaa eshi ngu l'ọnu awụshi.
14 ?Bụ ngụnu bẹ madzụ bụ
kẹ t'ọ dụebe mma?
Madzụ ono, nwanyi mụru ono;
?ngụnu b'ọ bụ kẹ t'ọ bụru
onye doberu ẹka ndoo?
15 Ọ -bụru lẹ Nchileke
te gudedu ire ụnwu ojozi nk'iya ẹka;
imigwe l'onwiya ta dụebe iya mma l'ẹnya;
16 ?bụchia madzụ, anọduje eme
alị-pata-chigbua;
l'angụ iphe, dụ ẹji ọngu mini
e-gbe dụ iya mma l'ẹnya.
17 Ngabẹ nchị; tẹ mu mee
t'iphe doo ngu ẹnya;
tẹ mu kọoru ngu iphe,
mu gudewaa ẹnya mu phụa;
18 mbụ iphe, ndu maru iphe kfuru;
tọgbo iya ẹba;
ọphu ọ dụdu iphe,
ndiche ẹphe kfuru,
nweru ọphu ẹphe domiru edomi.
19 Ọ bụ ndiche ẹphe ono
gẹdegede b'a nụru alị-a;
ọphu ọ dụdu ndu
mbyamubya, swejeru l'ẹke ẹphe nọ.
20 Ẹjo madzụ anọduje atsụ ude
jeye teke ọo-nọ-bebe;
mbụ taa chịchichi gbururu jeye.
21 Iphe, ejiji iya nchị bụ iphe, eye egvu.
Teke ọ dụ l'iphe dụwaru iya lẹ mma;
ono teke ndu abalị-d'egvu
abyajẹ bya afụaru iya.
22 Ẹ too kwejekwa lẹ ya e-shi
l'ẹkpuru-ọchi wafụ.
Ọ bụ l'ogu-mbeke
bẹ oo-mekocha laa.
23 Ọonoduje aghaphe;
maru lẹ ya bụ nri udele.
Ọ manarua lẹ mbọku,
nchi e-jikfu iya bẹ tụwaru iya l'ụkfu.
24 Iphe-ẹhuka; mẹ aphụ bụ
iphe anọduje eye iya egvu.
Ọ kapyabẹ iya ẹka l'ọ bụ
onye eze, rụkotawaru ẹhu k'ọgu.
25 Iphe, kparu iya nụ
abụru l'ootsuru Nchileke ẹka l'iri ise.
Ẹge ono b'ọ nyaru
Ọkaribe-Kakọta-Ike ndụ.
26 Oogudeje igbidigbi iphe,
shihuru ike,
eegudeje ezeru ọgu;
bya t'ẹphe kwagba iya.
27 A makwaru-a l'ọ daru ọkporokpo
jeye l'ifu; bya eyee anụ l'ukfu;
28 obenu l'ẹke, o mekochaaru buru
bụ lẹ mkpụkpu, ẹgbara kfụru;
l'okorobo ụlo, ẹ ta dụdu
onye bu iya nụ; l'ụlo, bụwa mkpọkpo-ọzulo.
29 Ẹ to nwedu iphe,
oo-nwekwadu.
Iphe o nweru enweru
a-bụru iya ẹka-ọla-azụ;
ọphu iphe, o setaru eseta
'ejegbahẹduru alị ono.
30 Ẹ tọo wafụdu l'ẹkpuru-ọchi ono.
Ọ bụ ire-ọku a-nganwụshi iru iya.
Yọ bụru Nchileke
a-phụ iya ọnu phụkashia ya.
31 T'ẹ b'o zihe onwiya okfu
je akpọru obu ye
l'iphe ẹ-ta gadu mkpa;
kẹ l'ẹ tọ dụdu iphe, oo-rita iya.
32 Ụgwo iphe o meru bẹ
aa-kfụ-dzu iya akfụ-dzu;
tẹmanu oge nk'iya erua;
ọphu ẹkali iya 'enwedu l'o rua iru.
33 Ọo-dụ l'ọ bụ vayịnu,
e chikoshiru akpụru iya
l'okurutu; mbụ l'ọ bụ
oshi olivu, tsụtsuaru igu;
yọ nahụ iya rishihu.
34 Iphe, bụ ndu ẹ-ta atsụdu
Nchileke egvu
a-gba ẹka nwa.
Yọ bụru ọku e-tsufu
ụlo ndu yeru obu l'ọna
ẹka-azụ.
35 Egbe ndu ono achịje idzu;
mee iphe, dụ ẹji.
Ó bụ ẹregede bụ iphe
ejije ẹphe ọkpoma ejiji.”