16
Ọnu, Jobu eyeru Elifazu
1 Tọ dụ iya bụ; Jobu abya eyee ọnu; sụ:
2 “Mu anụjehaakwa egbe
okfu-a, unu ekfu-a.
Ọ kwa ọchi;
bẹ unu byaru mu achịchi.
3 ?Bụ teke ole
bẹ unu a-ha okfu ẹge-a?
?Bụ ngụnu kparu iphe
unu ekfu ẹge-a?
4 Ndẹge ọ bụ mbẹdua bụ unu;
m'ọ kwaa ẹge-a, unu ekfu-a;
bẹ mu ga anọdu ekfu.
Mu ga anọdukwa-a
agbaru unu okfu ọgba egbe;
l'azụru unu ukwe.
5 Ọle mu g'akabẹjekwaa
gude ọnu mu adụ unu ike;
ọshi, mu g'anọdu ayọru
unu g'emekwa-a t'ẹhu gụa unu phengu.
6 Obenu; mu -kfua okfu; iphe,
eme mu nụ emele mu-a.
Mu -dobe ọnu ndoo;
too gbe aka mma.
7 Nggụbe Nchileke;
i mewaru mu; ike agvụ mu.
Ị kpụwaru mu ishi;
gbabẹ mu ẹka ọtu l'ufu mu.
8 I mewaru mu; mu agbajọshihu.
Ono abụru iphe ekebe
lẹ mu meruphu ẹjo iphe.
Agvụgvu-a, mu gvụru-a
agbakwaphu ekebe ekpu mu.
9 Nchileke gudewa
ẹhu-eghughu lakashịa mu alakashị.
Mu dụwa iya ashị;
yọo taru mu ikirize.
Onye ọhogu mu eme iya
t'ọ vọ mu ẹnya avọvo.
10 Ndiphe aphụje mu;
mu etee ẹphe ụkfu;
ẹphe echi mu ẹka
l'ishi-nchị; l'eme mu
iphe-iphere.
Ẹphe kpakọru mu akpọko;
l'etso mu okfu.
11 Nchileke nwuwaru mu nụ ndu ẹjo madzụ.
O wowaru mu ye ndu ẹjo
iya ono l'ẹka.
12 Mu shikwa-a buru l'ẹhu-agu.
Yọ bya apyịta mu l'ẹkpiri;
gwee mu egwegwe.
Oodo mu edodo tẹ ya meka mu iphe.
13 Ndu agbaru iya akfụ
nọ-pheru mu mgburumgburu;
l'agbafushi mu meji;
chịshia mu ọtso-ile wụshi l'alị.
Imiko mu ta dụ iya.
14 Ooyele mu phu ọru
n-yepyabe.
Ọonoduje ezipyabe mu
l'ọ bụ onye sọja.
15 Mu dzụwaru uwe-aphụ
kpube onwomu;
woru ifu kpube l'ẹja.
16 Mu rawaru ẹkwa;
ẹnya achaa mu too;
ẹnya gbakọtawaru mu ọchi.
17 Obenu l'ẹka mu ta dụbua l'iphe-kpaa.
Ekfukfu, mu ekfuje anụ
Nchileke buhuru ẹsa.
18 Nggụbe alị;
be ekpuchikwa mee mu iphe!
Tẹ mkpu, mu echi
ba abụkwa k'iphoro!
19 Mbụ lẹ nta-a;
bẹ onye ekebe mu nọkwa l'imigwe.
Onye ọphu ekfu
eyeru mu nụ anọdu oreke-imeli.
20 Ndu ọ̀nyà mu phẹ
egbe achị mu ọchi.
Ọle onye mu ara ẹkwa
araku bụ Nchileke.
21 ?To nwedu onye a-rọru mu Nchileke;
ẹge ono, madzụ arọje l'ẹhu
madzụ ibe iya ono.
22 Ọ bụa nwafa olemole nta-a;
mu ejeshia ẹke, bụ:
mu -jewa iya; mu ta alatahẹdu ọdo.”