42
1 Tọ dụ iya bụ; Jobu abya
eyeeru Ojejoje ọnu; sụ iya:
2 “Ojejoje; ya makwaru-a
l'ọ bụ nggu bụ ike,
kakọta-ike ọdo;
l'ẹ tọ dụdu iphe,
ị tụberu k'ememe,
nweru onye a-agbashị-ghe iya nụ.
3 Ị jịru mu iphe, meru iphe mu
jeru je eye ọnu l'iphe ẹ te dodu mu ẹnya.
Ọ kwa oswi-okfu;
mu yeekwaru ọnu l'iphe,
ẹ te dodu mu ẹnya;
mbụ iphe, dụ-tabe biribiri;
k'ọphu bụ l'ẹ to nwedu
l'oo doo mu ẹnya.
4 Ị sụkwaru mu phụ tẹ mu
ngabẹ nchị; t'ị jịa mu ajị.
Teke ị jịtsuaru mu ajị;
tẹ mu yeeru ngu iya ọnu.
5 Ọ kwa nchị bẹ mu shi
egudeje anụ ọtu-ọnu ngu.
Obenu lẹ nta-a; bẹ mu
gudewa ẹnya mu phụ ngu.
6 Nta-a bẹ mu dụakwa onwomu ashị.
Izimana laakwaru mu azụ;
ọwaa ẹka mu; ọwaa ikpere mu l'alị.”
Ọkpochi okfu ọbu ishi
7 Tọ dụ iya bụ; Ojejoje ekfutsuaru Jobu iphe ono; bya asụ Elifazu, bụ onye Témanu: “L'iphe eghukwa yẹbe Nchileke eghughu; kẹle nggu l'ọ̀nyà ngu phẹ; ẹphe ẹbo te kfuduru mu iphe, gbaru nụ ẹge nwozi mu, bụ Jobu kfuru. 8 Iphe, unu e-me nta-a bụ t'unu kpụta oke-eswi ẹsaa yẹle ebyila ẹsaa jekfu nwozi mu, bụ Jobu t'e gude iya gwoo ngwẹja-ukfuru nụ mu l'okfu ẹhu unu. Jobu e-kfuru nụ mu l'okfu ẹhu unu; mu anụa ya; mu te emehe unu iphe, mu rịru lẹ mu ga eme unu k'eswe ono, unu meru ono; kẹ l'unu te kfudu okfu mu ẹge gbaru nụ; ẹge nwozi mu, bụ Jobu kfuru.” 9 Tọ dụ iya bụ; Elifazu, bụ onye Témanu yẹle Bilidadu kẹ Shuha; mẹ Zofa, bụ onye Nema egbeshi je emee iphe ono, Ojejoje sụru t'ẹphe mee ono. Jobu abya ekfuru nụ Ojejoje l'okfu ẹhu ẹphe; Ojejoje anata iphe, o kfuru nụ iya.
10 Ya ndono; Jobu ekfutsulephu nụ Nchileke l'okfu ẹhu ọ̀nyà iya phẹ ono; ẹphe ẹto; Ojejoje abya emee ya; yọ byakwa bya enweru ẹku ọdo. Yo mee; iphemiphe ọbule, o shi nweru abya aha ẹge o shi ha ugbo ẹbo. 11 Unwunne iya; ndu k'unwoke; mẹ ndu k'ụnwanyi; mẹkpo onyemonye ọbule, shi mahawaru iya nụ abyalahaa nk'iya ọdo; ẹphe l'iya erilahaa nri. Ẹphe akpọlahaaru iya ifu iya; dụlahaa ya ike k'iphe-ẹhuka ono l'ọ ha, Ojejoje pakfutaru iya ono. Onye, byatashia; yo guderu iya okpoga; gudekwaru iya phụ echi mkpọla-ododo.
12 Ojejoje abya agọoru Jobu ọnu; iphe abya akaru iya lẹ mma l'ikperazụ; karia ẹge o shi dụru iya l'ọdungu. Atụru, o mekochaaru nweru dụ ụkporo ụnu atụru l'ụnu atụru iri l'ise. Ịnya-kamẹlu iya adụ ụnu iri l'ise. Eswi iya, a tụru njịgba ẹbo ẹbo adụ ụnu njịgba eswi ẹbo l'ụkporo njịgba eswi iri. Nkakfụ-ịgara iya adụ ụnu nkakfụ-ịgara labụ l'ụkporo iri. 13 Ọ byaru bya amụta unwoke ẹsaa; waa ụnwanyi ẹto. 14 Onye ọphu bụ ada iya b'ọ gụru Jemima. Onye ọphu etsota iya nụ b'ọ gụru Kezaya; bya agụa onye k'ẹto Kerenu-Hapuku. 15 L'alị ono gbaa mgburumgburu te nwedu ụnwanyi ọdo, makpuru ụnwu Jobu ono lẹ mma. Nna ẹphe; mbụ Jobu ekevuru ẹphe iphe, o nweru teke o keru ụnwu iya ndu k'unwoke iphe.
16 Lẹ Jobu jetsuaru iphe-ẹhuka ono b'ọ nọfuaru ụkporo afa iche iche ugbo ẹsaa b'ọ nwụhuderu. Ọ nọ ndzụ gude ẹnya iya phụ ụnwu iya; mẹ ụnwunwa iya; mẹ ụnwu nwanwaranwa iya. 17 E metsua; Jobu akaa nka; laa l'oge nka-ezekuna nk'iya.