10
Ẹtu, Sólomọnu nmashịru
1 Ọwaa ẹtu, Sólomọnu nmashịru:
Nwata, maru iphe;
emeje t'ẹhu tsọ nna iya ẹna.
Obenu lẹ nwata, eme eswe;
abụjeru aphụ tsọ nne iya.
2 Ẹku, a kparu l'ụzo,
ẹ-ta dụdu mma; ta agajẹkwa mkpa.
Obenu l'odobe-ẹka-ndo
adzọfutaje madzụ l'ọnwu.
3 Ojejoje ta ahajẹkwa onye
doberu ẹka ndoo t'ẹgu mee ya.
Obenu l'ẹjo madzụ;
b'ẹ too kwejedu t'iphe
agụ iya nụ rube iya ẹka.
4 Ẹnyiri atụjekwa madzụ ụkpa.
Obenu l'akanya emeje madzụ t'ọ bahụ.
5 Onye kpataru iphe ọ kọru
kwakọbe l'oge bụ onye
nweru egomunggo.
Obenu l'onye bụ mgbẹnya;
bẹ ookuje teke aakpata iphe
akpata bụ iphe-iphere b'ọ bụ.
6 Onye doberu ẹka ndoo;
bụ ọnu-ọma etsoje iya.
Obenu l'ẹjo madzụ edomije
ẹjo iphe nọ iya l'obu.
7 Ọobuje; a -nyata onye
doberu ẹka ndoo;
ẹhu atsọo madzụ ẹna.
Obenu l'ẹjo madzụ; bẹ aazahajẹ.
8 Onye maru iphe l'obu iya
emeje iphe a sụru t'o mee.
Obenu l'onye ekfu yayaya alajẹ l'iyi.
9 Onye ntụpo ta nọdu l'ẹhu
anọje ndzụ iya lẹ domangu rimangu.
Obenu l'onye ntuphu-ire;
bẹ ee-mekochaa kparu.
10 Onye ajị-buru madzụ ẹnya;
kwa iphe-ẹhuka b'ọ
kwakọberu onye ọbu.
Obenu l'onye atụ mba iya too;
kwa nchị-ọdu-ndoo b'ọ chọ.
11 Ọnu onye doberu ẹka ndoo
bụ nggele mini ndzụ.
Obenu l'ẹjo madzụ edomije
ẹjo iphe nọ iya l'obu edomi.
12 Ndụmashi akpatajẹ okfu.
Obenu lẹ n-yemobu
ekpuchije ẹjo iphe iphe.
13 Mmamiphe bụ l'ọnu
onye iphe edoje ẹnya
b'a chọ-vuje iya.
Obenu l'onye eswe;
bẹ ẹchachi anọduje eche echeche.
14 Ndu maru iphe akwakọbeje
iphe ẹphe maru akwakọbe.
Obenu l'ọnu onye eswe
bụ iphe-ẹhuka b'ọ nọduje eku oku.
15 Ẹku bụ ike, onye nweru.
Ụkpa abụkwanuru iya egbuje onye ụkpa.
16 Ụgwo ozi, onye
doberu ẹka ndoo bụ ndzụ.
Obenu l'ẹjo iphe emeje
tẹ madzụ kabaaru ome ẹji.
17 Onye angabẹje nchị teke
a kpọ-ziru iya ụzo bụkwa
ụzo ndzụ bẹ ootso.
ụzo ndzụ bẹ ootso.
Obenu l'onye a baru mba;
yọ jịka iya kwa ụzo bẹ oophu.
18 Onye madzụ dụ ashị;
yo me t'ẹ b'a ma kwa onye ẹjo-ire b'ọ bụ.
Onye ntụmatu abụru onye eswe.
19 Okfu -paa l'igwe;
ẹjo iphe abata iya.
Obenu l'onye kwaru
ẹnya atajẹ ire iya ẹra.
20 Ire onye doberu ẹka ndoo
dụ l'ọ bụ ọkpobe
mkpọla-ọcha.
mkpọla-ọcha.
Obenu l'ọriri ẹjo madzụ
ta kwatajẹkwa aga mkpa.
21 Okfu onye doberu ẹka ndoo
azụje igweligwe madzụ.
Obenu lẹ ndu eswe eyifuje;
okfu l'ẹphe te nwe egomunggo.
22 Ọnu-ọma, shi Ojejoje l'ẹka
emeje tẹ madzụ nweru iphe;
ọphu 'onwedu iphe-ẹhuka, ooyekobeje iya.
23 Iphe adụje onye eswe mma bụ ome ẹjo iphe.
Obenu l'ọo mmamiphe
bụ iphe adụje onye iphe doru ẹnya mma.
24 Ọ kwa iphe ẹjo-madzụ atsụ
egvu bụ iphe emekochajẹ byaru iya.
Obenu l'ọ kwanụ iphe agụ
onye doberu ẹka ndoo e-meru iya.
25 Ọ bụ ẹge oke phẹrephere epheje; pheswee
bụ ẹge ndu ẹjo madzụ aphụ-sweje.
Obenu l'onye doberu ẹka ndoo
e-vudoshi ike gbururu jeye.
26 Ọ bụ ẹge mẹe, shihuru ụka anwụje ọnu;
mbụ ẹge ẹnwuru-ọku ahụje
ọku l'ẹnya bụ ẹge onye
ẹnyiru adụje onye ezi iya ozi.
27 Ọtsu Ojejoje egvu emeje tẹ madzụ kaa nka.
Obenu lẹ ndu ẹjo madzụ
agbajihuje agbajihu.
28 Iphe onye doberu ẹka ndoo
anọduje ele ẹnya iya bụ ẹhu-ọtso-ẹna.
Obenu l'iphe ẹjo madzụ
ele ẹnya iya ta gajẹduru iya.
29 Oshi ụzo kẹ Ojejoje bụ
agbabe-a-dzụru kẹ ndu doberu ẹka ndoo.
Obenu lẹ ndu ẹjo madzụ b'ọ bụjeru iyi.
30 Ndu doberu ẹka ndoo;
b'ẹ ta agwafụ-ghekwa agwafụ.
Obenu lẹ ndu ẹjo madzụ tee bukwa l'alị ono.
31 Ọnu onye doberu ẹka ndoo
bụ iphe eshije iya nụ bụ mmamiphe.
Obenu l'onye te kfujedu
ire-lanụ;
ire-lanụ;
bẹ ee-mekochaa bufu ebufu.
32 Onye doberu ẹka ndoo
maru iphe bụ: o -kfua ya;
yọ kfụru nhamụnha.
Obenu l'iphe eshije
ẹjo madzụ ọnu bụ ẹjo okfu.