1 Iyaw adekeyaw a si Samwel, ki nagsīrbi di ĀPO do kainanawo sya ni Eli. Do dāwri sa a araw, no chirin ni ĀPO, ki manmano kan masanyib abaw kayan no parmata.

2 Do asa mahep, myan si Eli a maypoktad do gagāngayaw a yanan na, ki nangrogi dana a maychawsewsep kapakaboya na kan īto danaw kapaypaypabosa na. 3 Myan pa sisosoho sohwaw*3:3 Iyaw soho, ki myan do irahem no tabirnakolo do gaganaw no kortina do salapen no Lakāsanaw no Tōlag, as nāw na somdeb. Eks. 27:20; Leb. 24:2 no Dyos, kan myan pa maypoypoktad si Samwel do timplowaw ni ĀPO do masngenaw do yananaw no lakāsanaw no Dyos. 4 Sinpangan na, tinawagan ni ĀPO a kāna, “Samwel! Samwel!”

“Ari ako dya!” initbay na, 5 kan nayyayo a nangay do yanan ni Eli. Binata na a kāna, “Chako dya, ta tinawagan mo yaken.”

Ki tinbay ni Eli a kāna, “Taywaran tinawagan koymo? Maybidi ka nad pakaychehan mwaw.” Dawa, nangay dana do pakaychehan naw.

6 Nanawag dana mirwa si ĀPO a kāna, “Samwel!” Kan naybangon dana a nangay do yanan ni Eli. Binata na a kāna, “Chako dya, ta tinawagan mo yaken.”

Tinbay dana ni Eli a kāna, “Namna, ta nanawag akori? Maybidi ka nad pakaychehan mwaw.”

7 Do dāwri a chimpo, ari na pad chapatak ni Samwel si ĀPO, kan ari pad naipakatoneng no chirin ni ĀPO dya.

8 Pitdo danan katawag ni ĀPO si Samwel, kan naybangon dana a nangay di Eli. Binata na a kāna, “Chako dya, ta tinawagan mo yaken.”

Naktokto ni Eli a si ĀPO manawatawag so adekeyaya. 9 Dawa, inbahey na di Samwel a kāna, “May ka nad pakaychehan mwaw. An manawag panchi, no itbay mo, ki kon mo, ‘Maychirin kam ĀPO, ta mangadngey pachirawatan mwaya.’ ” Dawa, nangay dana si Samwel do pakaychehan naw.

10 Nangay si ĀPO kan naytēnek daw, as tinawagan narana akmas nakapanawag naw a kāna, “Samwel! Samwel!”

Tominbay si Samwel a kāna, “Maychirin ka, ta mangadngey pachirawatan mwaya.”

11 Binata ni ĀPO di Samwel a kāna, “Chiban mo, myan anchiw parinen ko do Israel a aran sinonchiw makadngey sya, mamirpir anchi. 12 Do dāwrinchi a araw, tongpalen konchiw tabo inbahey kwaw a maikontra di Eli kan pamilya na a mangrogi do rogi mandad pandan. 13 Ta inbahey ko na dya a okomen ko sanchiw pamilya na abos pandan maynamot do gatos a sīgod a chapatak na. Tod da yaken a dyābat no potōt na saw a mahahakay, ki napenpen na saba. 14 Dawa, insapata ko do pamilya ni Eli a kon ko, ‘Abanchiw sakripīsyo mana dāton a makapakaro sya.’ ”

15 Naypoypoktad pa si Samwel a nandad mabekas. Do kamabekasanaw, iniwangan na saw pantaw no bahayaw ni ĀPO. Chamo ni Samwel a ibahey di Eli iyaw maynamotaw do parmata naw. 16 Ki tinawagan ni Eli, kan binata na a kāna, “Samwel, anak ko.”

Tominbay si Samwel a kāna, “Ari ako dya.”

17 Inyahes ni Eli a kāna, “Āngo inbahey na dyimo? Itayo mwaba dyaken. Dosāen pakono imo ni ĀPO so taywara an itayo mo dyaken aran āngo a inbahey na dyimo.” 18 Dawa, inbahey ni Samwel a tabo dya a abaw intayo na, kan binata ni Eli a kāna, “Iya si ĀPO. Parinen na pakono sigon do pagayatan na.”

19 Do nakapayparakoh ni Samwel, nāw ni ĀPO dya. Abaw inpadto ni Samwel a dya natongpal. 20 Tabo tawotawo no Israel a yapo do Dan manda do Beerseba, natonngan da a si Samwel, ki oyod a propīta ni ĀPO. 21 Minirwa dana a napaboya si ĀPO do Silo, ta do dawri napaboya di Samwel maynamot do chirin na.