1 Naipakatoneng ni Samwel chirin ni ĀPO do tabo tawotawo no Israel.

Do dāwri, minohbot Israelita saw a machigobat dyirad Pilisteo saw. Nagkampo saw Israelita saw do Ebeneser, kan siraw Pilisteo saw do Apek. 2 Domnarop saw Pilisteowaw dyirad Israelita saw, as do nakapaggogobat daw, naābak saw Israelitaw. Nangdiman saw Pilisteowaw so malābit a apat a rībo do paggogobatan daw. 3 Do nakapaybidi daranaw no soldādo saw do kampo da, inyahes dan panglakayen saw no Israel a kon da, “Āngo ta inpalōbos ni ĀPO a inābak da yaten Pilisteo saw sicharaw? Yangay ta pa hapen lakāsanaw no tōlag ni ĀPO a yapo do Silo tan myan dyaten kan isalākan na yaten do bīleg dan kabōsor ta sa.”

4 As dawa, nanoboy sa siras tawo a mangay do Silo, kan inhap daw lakāsanaw no tōlag ni ĀPO a Manakabalin do Tābo a naitrono do payawan daw no sinan parswa a naypanyid.*4:4 Do Hebreo a chirin, ki “kerobim”. Gen. 3:24, Eks. 15:17-22 As siraw dadwaw a pōtot ni Eli a sa Hopni kan Pinehas, ki nachonot sa do lakāsanaw no tōlag no Dyos.

5 Do nakawara naranaw no lakāsanaw no tōlag ni ĀPO do kampo daw, nangngēngengey sa tabo Israelitaw so taywaras kalyak a nakagon-gonan no tana. 6 Do nakapakadngey daw no Pilisteo saw so kapangngēngengey daw, inyahes da a kon da, “Āngo chakey na batahen kapangēngengey dayan Hebreo do kampo da?”

Do nakapatak daw no Pilisteo saw a nawaraw lakāsanaw ni ĀPO do kampo daw, 7 namo sa a kon da, “Ariw nawara dyos do kampo da. Aysa, madidigra ta! Ari pad abo naparin a komwan do nakarahan. 8 Kapakāsi ta pa! Sino makaisalākan dyaten dyirad mabibīleg saya a dyos? Siraw nawriw dyos saw a nangpisti siras taga Egipto saw do tabo klāsi no didigra do kayan dan Israelita do let-ang.†4:8 Siraw pisti, ki naparin aba do let-ang, an dya do mismo tana a Egipto (Eks. 7-12). No naibahey dya, ki naibasar do nakadngey dan Pilisteo. 9 Mangyit kamo, inyo a Pilisteo! Ipaboya nyo a mahakay kamo tan dyi daynyo a payparinen a adīpen no Hebreo saw a akmas nakapayparin taw sira adīpen. On, ipaboya nyo a mahakay kamo kan machilāban kamo!”

10 As dawa, nachilāban Pilisteo saw, kan naābak Israelita saw kan nayyayo kāda asa a nangay do bahay na. Taywara maranggas nakapangdiman da, ta nadiman 30,000 a manakenakey a soldādo no Israel. 11 Nahap daw lakāsanaw no Dyos, kan nadiman saw dadwaw a pōtot ni Eli a sa Hopni kan Pinehas.

12 Do dāwri met lang a araw, myan asa mahakay a yapo do trībo no Benhamin a nayyayo a yapo do paggogobatan daw a kominwan do Silo. Hinagahagay naw laylay naw, kan pinangayan nas ahbek oho naw do kaliday na. 13 Do nakapakarapit naw do Silo, myan a maydisna si Eli do disnan naw do bīt naw no rarahan a mangnangnanaya, ta chinabakel naw lakāsanaw no Dyos. Do nakapakasdep danaw no mahakayaw do idi daw, as nakaipadāmag na an āngo napasamak, nagarimbāngaw sa tabo omidyaw daw. 14 Nadngey ni Eli iyaw arimbāngaw daw kan inyahes na a kāna, “Āngo chakey a batahen nya ringgor?”

Nakalyalisto a nangay di Eli iyaw mahakayaw. 15 Magtawen dana si Eli so sasayam a poho kan wawaho, kan makaboya paba. 16 Inbahey na di Eli a kāna, “Kayayapo ko do paggogobatan. Nakalības ako sichangori lang a araw.”

Inyahes ni Eli, “Āngo naparin, mo anak ko?”

17 Tominbay mahakayaw a nangipadāmag a kāna, “Nayayowan daw no Israelita saw Pilisteo saw, kan taywaraw nakadidigra dan soldādo saw. Aran siraw dadwaw a pōtot mo a sa Hopni kan Pinehas, ki nadiman sa, kan naāgaw da pa iyaw lakāsanaw no Dyos.”

18 Do nakaibahey naw so maynamot do lakāsanaw no Dyos, nalba a naytatangay si Eli do disnan naw do bīt naw no rowangan. Naypotot lagaw naw, kan nadiman maynamot ta laklakayan dana kan mataba. Apat a poho a katawen a inpangōlwan naw Israel.

19 Iyaw manōgang naw a baket ni Pinehas, ki mabōgi, kan makalo dana maymanganak. Do nakapakadāmag naw so nakapakaāgawaw no lakāsanaw no Dyos kan iyaw nakadiman naw no katogāngan naw kan si lakay na, naychihat a nagpasikal kan naymanganak. 20 Do nakapaybiybitos danaw no byay na, binata no mabakesaw a nangpartīra sya a kāna, “Mamo kaba, ta mahakay anak mo.” Ki tominbay aba kan nangikaskāso paba.

21 Pinangaranan naw adekeyaw so Ikabod a kāna, “Iyaw dayag, ki komnaro dana do Israel.” Nyaw paynamotan na a naāgaw lakāsanaw no Dyos kan nadiman si katogāngan na kan si lakay na. 22 Binata na a kāna, “Iyaw dayag, ki komnaro dana do Israel, ta naāgaw danaw lakāsanaw no Dyos.”