1 Komnaro si Dabid do Gat, kan naglības a nangay do aschip do Adollam.*22:1 No aschip do Adollam, ki 16 a kakilomitro do abagātan a dayāen no Gat. Do nakadngey daw no kakakteh naw a mahahakay kontodo tabo kadwan do pamilya ni āmang na, ki rinapit da daw. 2 Nagin-īnot a nakpeh dyaw tabo tawotawo a mariribokan mana myan so ōtang mana dyi saw a mapnek. Myan ngata dyaw apat a gasot a mahahakay, kan iyaw mangidaōlo sira.

3 Nakayapo daw nangay si Dabid do Mispa do Moab, kan inbahey na do āri daw do Moab a kāna, “Palobōsan mo pa sa āmang kan ānang ko a omyan dya mandan mapatakan ko an āngo iyaw ipaparin no Dyos dyaken.” 4 Dawa, tinokos na saw inyapwan naw do āryaw no Moab, kan minyan sa daw ranan na myan si Dabid do pagkamītan naw a gwardyado.†22:4 Bata no kadwan a myan do Moab mana masngen do aschip do Adollam do Joda.

5 Ki binata no propītaw a si Gad di Dabid a kāna, “Mabidin kaba dya. Mangay ka do Joda.” Dawa, komnaro si Dabid kan somnalok do kahasan no Heret.

6 Sinpangan na, natonngan ni Saulo yanan da Dabid kan bonggoy na saw a mahahakay. Myan do dawri a maydiydisna si Saulo do sīrokaw no tamaris‡22:6 Gen. 21:33 a kayo do paytokonanaw do Gibea a mangigpet so chibot naw, kan mayteytēnek tabo saw a opisyalis na do omdibon naw. 7 Binata ni Saulo dyira a kāna, “Adngeyen nyo, inyo a kapotōtan ni Benhamin! Manorohoriw pōtot naw ni Jesse dyinyo so hakawan kan kaobāsan nyo? Payparinen nawri inyo a tabo a komander no rinibrībo mana ginasgasot?§22:7 Si Saulo, ki yapo do trībo no Benhamin (1 Sam. 9:1-2). Dawa, siraw opisyalis na, ki Benhaminita sa tabo. Ki si Dabid, ki yapo do trībo no Joda. As no pinarin ni Saulo, ki ināgaw na saw hakawan kan kaobāsan dan tawotawo (1 Sam. 8:14). 8 Iyawriw nyayaw paynamotan na a inranta nyo komontra dyaken? Abayaw nangibahey dyaken so nakapachitōlag nayan pōtot kwaya do pōtot naya ni Jesse. Abaya polos bibyang nyo dyaken a nangibahey a iyaw bōkod ko a pōtot, ki mangsogsog so pachirawatan ko a machikontra dyaken a magdāan a mangsaneb dyaken a akmas parinen nas changori!”

9 Ki si Doeg a Edomita a myan a machipaytēnek dyirad opisyal saw ni Saulo, inbahey na a kāna, “Naboya kwaw pōtot naw ni Jesse a nangay di Ahimelek a pōtot ni Ahitob do Nob. 10 Inyoman naw iya ni Ahimelek di ĀPO. As nakapanoroh nas bahon na kan nakaitoroh na so ispāda naw ni Golayat a Pilisteo.”

11 Do dāwri, nanoboy si āri so mangay a mangtawag so pādyaw a si Ahimelek a pōtot ni Ahitob kan iyaw tabo a kakabagyan na a magsirsīrbi a papādi do Nob. Nangay sa tabo di āri. 12 Binata ni Saulo di Ahimelek a kāna, “Mangadngey ka, imo a pōtot ni Ahitob.”

“On, mo āpo,” initbay na.

13 Inyahes ni Saulo a kāna, “Āngo ta inranta nyo kan pōtot naw ni Jesse iyaw komontra dyaken? Tinorohan mo pa so tināpay kan ispāda. Inyoman mo pa iya do Dyos tan machiribīldi dyaken, kan magdāan a mangsaneb dyaken a akmas parinen naya sichangori!”

14 Ki tinbay ni Ahimelek a kāna, “Namna, sino paro dyirad pachirawatan mo saya iyaw akmas kapodno ni Dabid a manōgang a mahakay no āri, kapitan dyirad magbanbantay dyimo, kan naidāyaw do bahay mo? 15 Taywaran nawri lang a araw nakaiyoman ko sya do Dyos? Engga! Dyi pakono yaken a pagatosen no āri a pachirawatan mo mana tabo saw pamilya ni āmang ko do dyaya, ta aba polos chapatak no pachirawatan mo a maynamot do dyaya banag.”

16 Ki binata no āryaw a kāna, “Sigorādo a madiman ka nam Ahimelek, imo kan tabo no pamilya ni āmang mo!”

17 Do dāwri, inmandar no āryaw dyirad gwardya*22:17 Mana “siraw tobotoboyen”. na saw do maychamībit naw a kāna, “Yay nyo sa dimanen nya sa papādi ni ĀPO, ta nachonot saya di Dabid! Chapatak daya pinayyayowan na yaken, ki inbahebahey dabaya dyaken!”

Ki siraw pachirawatan saya ni āri, ki chinakey da saba a dimanen papādi saya ni ĀPO.

18 Do dāwri, minandaran no āryaw si Doeg a kāna, “Imo danaw mangdiman siras papādyaya.” Dawa, si Doeg a Edomita iyaw nagrikos kan nangdiman so wawaho a poho kan dadima a papādi a nakalaylay so epod do dāwri a araw. 19 Sinpangan na, nangay do Nob a idi da no papādyaw. Inispāda na a diniman saw mahahakay kan mababakes, adedekey kan siraw tagībi saw, kan tabo bāka, asno, karniro kan kalding.

20 Si Abyatar lang a asa dyirad pōtot saw ni Ahimelek a pōtot ni Ahitob, nakalības kan nayyayo a nangay di Dabid. 21 Inpadāmag na di Dabid a inpadiman sa ni Saulo papādi saw ni ĀPO. 22 Inbahey ni Dabid di Abyatar a kāna, “Chinapatak ko naw do nakaboya kwaw di Doeg a Edomita do dāwri a araw a sigorādo a ibahey na di Saulo. Changori, yaken naynamotan nakadiman dan pamilya ni āmang mo. 23 Nāw mo dyaken, kan mamo kaba. Ta iyaw tawowaw a makey a mangdiman dyaken, ki aran imo, chichwasan naymo. An myan ka dyaken, abaw pakaan-anwan mo.”