1 Asa karaw naidāmag di Dabid a machigobat saw Pilisteowaw do Keylah, kan mangsamsam sa so irek dyirad pangirkan da saw daw. 2 Inyahes ni Dabid di ĀPO a kāna, “Yangay ko sawri a daropen Pilisteowaw?”

Initbay ni ĀPO dya a kāna, “Naon. Mangay ka kan isalākan mo sa do Keylah.”

3 Ki tinbay dan mahahakayaw a myan di Dabid a kon da, “Mamo kami paya aran do dya a Joda. Dyi pawri a mangamangay dana an mangay ta do Keylah a yanan dan bōyot no Pilisteo?”

4 Minirwa dana inyahes ni Dabid di ĀPO, kan initbay ni ĀPO dya a kāna, “Mosok ka do Keylah, ta iparawat ko sanchiw Pilisteowaw do tanoro nyo.” 5 Dawa, nangay sa Dabid kan bonggoy na saw a mahahakay do Keylah. Nachigobat sa dyirad Pilisteowaw kan āro diniman da dyira. Inkaro da Dabid binyay da saw no Pilisteo, kan insalākan da saw tawotawowaw do Keylah. 6 (Do nakapaglības naw ni Abyatar a pōtot ni Ahimelek a nangay di Dabid, ki inyononot naw epodaw do Keylah.)

7 Naipadāmag di Saulo iyaw nakangayaw ni Dabid do Keylah, kan naibahey na a kāna, “Inparawataya no Dyos iya do tanoro ko, ta napopokaya do nakasdep naya do naahadan a idi a myan so balonet do rowangan da saw.” 8 Dawa, tinawagan sa ni Saulo tabo bōyot na saw a para gobat, ta mosok sa do Keylah tan yay da lakoben si Dabid kan bonggoy na saw a mahahakay.

9 Do nakapakadāmagaw ni Dabid a inpangta ni Saulo, binata na di Abyatar a pādi a kāna, “Yangay mo epodaw dya.” 10 Binata pa ni Dabid a kāna, “O ĀPO a Dyos no Israel, nadngey no pachirawatan mwayaw plāno naya ni Saulo a mangay do Keylahaya, kan rārayawen naw idyaya a maynamot dyaken. 11 Iparawat danchiwri yaken no omidi saw do Keylah? Mosokori si Saulo dya a akmas nadngey naya no pachirawatan mo? O ĀPO a Dyos no Israel, ibahey mo pa do pachirawatan mwaya.”

Tinbay ni ĀPO a kāna, “On, mosok anchi.”

12 Pinirwa dana inyahes ni Dabid a kāna, “Iparawat danchiwri yaken do tanoro ni Saulo kan bonggoy kwaya no omidi saw do Keylah?”

Tinbay ni ĀPO a kāna, “On, parinen danchi.”

13 Do dāwri, sa Dabid kan bonggoy na saw a mahahakay a myan dya a malābit anem a gasot sa, komnaro sa do Keylah kan mayadiyadis dana sa. Do nakadāmagaw ni Saulo a naglības sa Dabid, tinongtong na pabaw mangay daw.

14 Minyan si Dabid dyirad pagkamītan saw a gwardyado do let-ang, do katokotokonan no Let-ang no Sip. Kararaw a chichwasen iya ni Saulo, ki ninonolay aba no Dyos a maiparawat si Dabid do kakamay na.

15 Do asa karaw do kayan naw ni Dabid do Hores, nadāmag na a īto si Saulo a komwan do Let-ang no Sip a mangay a maychichwas sya tan dimanen na. 16 Si Jonatan a pōtot ni Saulo, ki nangay do yanan Dabid do Hores, kan pinayyit na do kapanganohed na do Dyos. 17 Binata na dya a kāna, “Mamo kaba. Machichwasan naba imo ni āmang ko. Imonchi iyaw no āri no Israel, kan yaken anchiw somarono dyimo do toray. Aran si āmang ko a si Saulo, ki chapatak naranaw nya.” 18 Namarin sa so tōlag da a dadwa do salapen ni ĀPO, ask kan do dāwri, somnabat dana si Jonatan. Ki si Dabid, ki nāw na pa minyan do Hores.

19 Sinpangan na, somnonget saw taga Sip saw a nangay di Saulo do Gibea kan inbahey da a kon da, “Aryaw si Dabid a tomayotayo dyamen dyirad pagkamītan saw a gwardyado do Hores, do paytokonanaw no Hakilah do abagātanaw no Jesimon.*23:19 Maynamot do naparin do 1 Samwel 23:19-24:22, ki intolas ni Dabid do Salmo 54. 20 Mosok ka pa mo āri do kompormi a ōras a chakey mo, ta yamen anchiw makatoneng a mangiparawat sya do kakamay mo, mo āri!”

21 Tominbay si Saulo a kāna, “Bindisyonan pakono inyo ni ĀPO do kapachikakaāsi nyo dyaken. 22 Mangay kamo kan yay nyo a chiban a mirwa tan masigorādo an dino yanan na kan an sino nakaboya sya daw, ta nabata da dyaken a iya, ki masikap. 23 Doktalan nyo tabo saw tayotaywan na saw, kan maybidi kamo dyaken a myan so masigorādo a dāmag. Do dāwrinchi, machangay ako dyinyo. As an myan pa do dya a tana, lakatan konchi aran yay ko pa chichwasen a tayitayisa dyirad rinibrībo no Joda.”

24 Dawa, siraw taga Sip saw, ki pinanman darana somnabat sa Saulo. Ki do dāwri, sa Dabid kan bonggoy na saw a mahahakay, ki myan dana sa do Let-ang no Maon, do Araba a abagatānen no Jesimon. 25 Sa Saulo kan bōyot naw, nangay sa maychichwas dya. Ki do nakaibahey daw sya di Dabid, minosok a nangay do yananaw no bato kan minyan do Let-ang no Maon. Do nakadāmagaw ni Saulo so nya, linakatan narana si Dabid do Let-ang no Maon.

26 Nangay si Saulo do asa bakrang no tokon, as nangay si Dabid kan bonggoy na saw a mahahakay do bakrang naw do bīt no tokonaw a yanan ni Saulo. Nakalyalisto si Dabid kan bonggoy na saw a nachibawa da Saulo kan bōyot na saw do kapaypaypasngen daw di Dabid a mangtiliw sira. 27 Ki do dāwri, nangay tobotoboyenaw a nangibahey di Saulo a kāna, “Alisto ka a somabat! Ari danaw Pilisteo saw a mangraot so tana a Israel!” 28 Dawa, nagsardeng dana ni Saulo iyaw kapanglakat naw si Dabid, kan yangay na sa a ginobat Pilisteowaw. Yapo do dāwri, pinangaranan daw nawri a logar so Bato no Kapaysisyay.†23:28 Mana “Bato no Naglibāsan”. 29 Sinpangan na, somnonget si Dabid a yapo dawri kan minyan dyirad pagkamītan saw a gwardyado do En-gedi.