No Manōma A Tolas Ni Apostol Pablo Di Timoteo
No Pakatonngan so Paytābwan no Nya Tolas
Motdeh pa si Timoteo do nakapanganohed naw di Jeso-Kristo. Sigōro, nanganohed di Jesos do kangayaw ni Apostol Pablo do Listra do dāmwaw a kapagbyahi na a nangaskasaba (Ara. 14:6-7). Iyaw ngaran ni āpong na a mabakes, ki si Loyda. As si ānang na, ki si Eunis. Aran Jodyo sa a dadwa, ki mayit kapanganohed da di Jesos (2 Tim. 1:5). No lang chapatak ta a maynamot di āmang na, ki asa Griego a dya monot do dadakay no Jodyo (Ara. 16:1-3).
Do kayanaw ni Pablo do Listra do somnaronwaw a kapagbyahi na, nadāmag naw maynamot do kaganay no katatawo ni Timoteo kan kayitaw no kapanganohed na (Ara. 16:1-3). Dawa, inawis ni Pablo a machirayay dya a somidong a machipangasaba kan machipangnanawo so Maganay a Dāmag. Yapo do dawri, nāw na somnidosidong di Pablo (1 Kor. 4:17; Pilp. 2:20-22).
Iyaw asa a syodad a nangnanawan da, ki do Epeso, as kan dawriw nangarwanan Pablo di Timoteo. Tan komwan, iyaw pinakainawan Pablo a mangipangōlo kan mangnanawo do iglisyaw daw (1:3). Do kamidyo danaw a nakahay ni Timoteo daw, intolas ni Pablo dya iyaw nyaya tolas, as kan hahawen na a mirwa na maboya (3:14; 4:13).
Asa masisīta a inbahey na do dyaya tolas, ki maynamot dyirad mangnanawowaw so bayataw. Dawa, mainget nakabilin ni Pablo si Timoteo a pagsardengen naw innanawo daw (1:3-7; 4:1-3, 7; 6:3-10, 20-21).
Intolas pa ni Pablo di Timoteo an maypāngo iyaw kosto a kabibyay kan kapagsīrbi no tawo a pidyen da a mangipangōlo dyirad nanganohedaw do kakpekpehan da, as kan siraw napidyaw a somidong dyirad mangipangōlo saw. Sigon do tolas ni Pablo, no kasisītaan a dadakay dan pangolwen saw do iglisya, ki abo pakono pakapilāwan da do kabibyay da kan kapanganohed da tan sira danaw pagtolādan dan tawotawo (3:7).
Myan paw inbahey ni Pablo do iglisyaw daw do kapaydasal da kan kapagdaydāyaw da so Dyos (2:1-15), as kan an maypāngo parinen manganohed dyirad kakakteh da saw a bālo, panglakayen, kan adīpen (5:1-6:2).
No Naychakarwan no Nya Tolas
Pakatoneng 1:1-2
No maynamot do bayataw a nanawo 1:3-11
No kapagyamyāman do kāsi no Dyos 1:12-20
No kapaydasal kan kapagdaydāyaw 2:1-15
Siraw mangaywan saw do Iglisya 3:1-16
No kapamagbaga a maynamot so Kapagsīrbi 4:1-16
No parinen dyirad babbālo, panglakayen, kan adīpen 5:1-6:2
Iyaw oyod a kinabaknang 6:3-10
No kabalākad ni Pablo di Timoteo 6:11-21
1 Timoteo
1
Pakatoneng
1-2 Dyimo mo Timoteo a inbidang ko a oyod a anak kod kapanganohed taya:
Si Āpo Dyos pakono a Āmang ta kan si Kristo Jesos a Āpo taw manoroh dyimo so parabor, kāsi, kan kaydamnayan no kapangtokto.
Nyaya tolas, ki yapo do dyaken a si Pablo a asa apostol ni Kristo Jesos maynamot do bilin no Dyos a Mangisalākan ta, as kan maynamot do bilin ni Kristo Jesos a yanan hahawen ta.
No Maynamot do Bayataw a Nanawo
3 Sichangori, pirwahen ko naw mangdaw dyimo a akmas nakakdaw kwaw sya dyimo do nakakwan kwaw do Masedonya a mabidin ka pad Epeso. On, mabidin ka pa daw tan pagsardengen mo saw tawo saw a mangnanawo so bayataw a nanawo. 4 Ibilin mo dyira a dyi da taktaken ōras da do pinakbokbod saya is-istorya da a yapo do kaychowa kan siraw manaro saw a listaan da no kapoonan da saw. Tod saw nya pakayapwan abos sirsīrbi a kapaydidiman, as kan makasidong saba polos do katongpal no planwaw no Dyos dyaten, ta no katoneng ta so plāno no Dyos, ki yapo lang do kapanganohed ta dya. 5 No pakayapwan na a itoroh ko nyaya a bilin, ki tan myan dyaten oyod a adaw tad katakatayisa dyaten. Iyaw adawaya, ki yapo lang do maganay kan madalos a kapangtokto kan iyaw oyod a kapanganohed di Kristo, 6 ta myan dana saw kadwan a nalyod a nachibawa a yapo do oyod a maynamot do kapaysin-aatbay daya so abos sinpaspangan. 7 Chakey daw mayparin a mangnanawos Linteg ni Moyses a aran dyi da maawātan chakey naw a batahen. On, aran ipapati daw mangnanawo, ki alit da dya maawātan iyaw ichirichirin daw.
8 Ki an maynamot do Lintegaya ni Moyses, chapatak ta a maganay a linteg an osaren tad kosto. 9 Maawātan ta pakono a naparin abaw lintegaya dyirad malinteg saw a tawo, an dya dyirad marahet saya a tawotawo a akma siras nya: siraw dya mangbigbig kan dya manganohed do linteg, siraw mangipsokaw so Dyos kan siraw nailabay dana saw do karahet, siraw abwaw so dāyaw do Dyos kan siraw pachimadēkeyan daw naibidang a masantwan, siraw mangdiman saw so inyapwan da kan siraw mangdimdimanaw so kapayngay da tawo, 10 siraw maychakatekatehaw a machoknod kan siraw magkalikāgomaw a machoknod do kapayngay da mahakay mana mabakes, siraw mangtiliwaw so kapayngay da sa a tawo a ilāko da a maadīpen. On, naparin lintegaw a para dyirad maybayatawaw kan siraw dyaw a mangpaneknek so oyod mana aran sino a mamarin so machitarek do oyod a kapangnanawo. 11 Nyaya oyod a nanawo, ki naibasar do makaskasdāawaw a Maganay a Dāmag a yapo do madaydāyaw a Dyos ta. Intalek na dyaken nya tan paybibidi ko a ibahebahey dyirad tawotawo.
No Kapagyamyāman a Maynamot do Kāsi no Dyos
12 Rakoh kapamahemahes kod Kristo Jesos a Āpo ta, ta iyaw nanoroh so ayit ko do nya tarabāko ko a mangaskasaba so chirin na. Magyāman ako pa dya, ta inbidang na yaken a maikari kan pinidi na yaken a magsīrbi dya. 13 Pinarin naw komwan aran naychirichirin akod nakarahan so maikontra dya, as kan indadanes kan inoy-oyaw ko.* 1:13 Ara. 9:5 Alit na, chināsi na pa yaken Āpo Dyos maynamot ta dyak pa manganohed do dawri, asna chinapatak kwabaw pariparinen ko. 14 Oyod a somawasaway inpaboya ni Āpo Dyos a kāsi na dyaken. Dawa, myan kapanganohed ko di Kristo kan adaw ko dyirad kapayngay ko a nanganohed, ta siraw nyaya, ki myan dyaten a machasa di Kristo Jesos a Āpo ta.
15 No nyaya ibahey ko dyimo, ki oyod, kan machita anohdan no tabo. Nangay si Kristo Jesos do lōbongaya tan yangay na sa isalākan nakagatos saya tawotawo, as yaken oyod a kararahtan dyirad nakagatos saya. 16 On, aran yaken no kararahtan, ki chināsi na yaken ni Āpo Dyos tan maipaboya ni Kristo Jesos abos pandan a kaānos na. Pinayparin na yaken no Dyos a pagmididan tabo tawotawo a manganohed anchi dya tan rawaten daw byay a abos pandan.
17 Si Āpo Dyos a abos pandan a Āri a dya madiman kan dya maboya kan maychatanyi a Dyos, myan pakono dyaw dāyaw kan tan-ok a abos pandan. Amen.
18 Sichangori, imom Timoteo a anak ko, italek ko dyimo nya bilin a maitōnos do inpaichirin naw no Dyos dyirad propīta saw a maynamot dyimo. Dawa, kawayakan mwabaw inpadto da tan maypatored ka a machilaban do marahet. 19 Do kapachilaban mo do marahet, nāw mo a makayit do kapanganohed mo kan madalos do kapangtokto, ta myan saw kadwan a tawotawo a tomnadyichokod do madalos a kapangtokto da kan inīsad da pinarin chapatak da marahet. As dawa, nawriw nakarārayawan kapanganohed da 20 akma sa Himeneo kan Alehandro. Dawa, inparawat ko sad Satanas tan dosāen na sa tan magsardeng dana sa a maychirichirin so machikontra do Dyos.† 1:20 1 Kor. 5:5