1 No manma kan kasisītaan a ibahey ko, ki machita paydaydasal nyo sa tabo tawotawo. Ipasnek nyo sa pangdakdaw, kan nāw na magyāman kamo di Āpo Dyos a maynamot dyira. 2 On, paydasal ta saw āryaw kan siraw tabo a myan so toray tan matalnaw byay ta a dya mariribok do kapagsīrbi ta do Dyos kan kaparin tas maganay dyirad kapayngay ta a tawo. 3 An komwan kapaydasal ta, ki maganay, as kan makahwahok pa do Dyos a Mangisalākan ta, 4 ta rakoh kakey na matonngan tabo tawotawo oyod a nanawo as maisalākan sa. 5 No kaoyodan na, ki asa lang Dyos kan asa lang maparin a makapaychapya so Dyos kan tawo. Iyaw nyaya, ki moyboh a si Kristo Jesos a nayparin a tawo. 6 Inparawat naw byay na a pangisalākan so tabo a tawotawo do gatogatos da. Iyaw nakadiman naw do inkeddengaw no Dyos a chimpo, ki inpaneknek na a chakey no Dyos a maisalākan tabo tawotawo. 7 No nyayaw naynamotan na pinidi na yaken a asa a apostol a asa mangikasaba kan manginanawo dyirad Dya-Jodyo so Maganay a Dāmag tan manganohed sa di Āpo Jesos. Masigorādo nyaya, as kan maybayataw akwaba.

8 Dawa, no chakey ko, ki do kāda kakpekpehan dan manganohed saw, ki siraw mahahakayaw mangidaōlo so kapaydasal. Ki basta madalos aktokto da do salapen no Dyos kan abwa polos kasoli mana kapachidiman da dyirad kapayngay da a tawo.*2:8 Do kapaydasal da no Jodyo saw, ki patohosen daw tachay da a pangipaboya da so kabon itayo da mana kabon kapagdwadwa da do salapen no Dyos. Sal. 141:2; 143:6

9 Chakey ko pa siraw mababakes saw, ki machita maylaylay sa so gagāngayaw kan maikosto do mababakes. Dyi da pakono a sobsobraan a ornosen boboh da kan mangyosar so mangingīna saw a alahas a akmas balitok mana perlas mana mangingīna saw a laylay,†2:9 1 Ped. 3:3 10 basbāli a maipadaday sa pakono do maganay a kaparin da. Nawriw kosto do mabakes a mabata a managdaydāyaw di Āpo Dyos. 11 Machita maolimek kan mapakombaba sa do kapachinanawo da so chirin no Dyos.‡2:11 1 Kor. 14:34-35 12 Asa pa, ipalōbos ko saba mangnanawo so mahahakay mana pay-imarahen da sa. On, machita a dyi da ringgoran saw mahahakay a mangnanawo. 13 Nawri pakono parinen da maynamot ta naparswa nanmanma si kapoonan ta a simna Adan as nakasarono ni Eba. 14 Asa pa, naallīlaw aban Satanas si Adan, an dya basbāli a si Ebaw naallīlaw kan nanma a nakagatos di Āpo Dyos.§2:14 Gen. 3:6, 13; 2 Kor. 11:3 15 Dawa, intoroh no Dyos kaynyin kan kalidyat no tabo mababakes a maymanganak. Ki aran komwan, chāsi na pa sa no Dyos a isalākan an tongtongen daw manganohed dya, madaw do kapayngay da a tawo, kan masingpet kan madalos so kapangtokto do kaparin da so chakeyaw no Dyos.