19
No Kaipadto a Kaisalākan no Jerosalem
1 Do nakadngeyaw sya ni Āri Hesekyas so nyaya, pinirit naw laylay naw kan naylaylay so makersang, kan nangay do timplowaw ni ĀPO. 2 Tinoboy na sa Elyakim a iyaw manyidechidebaw so palasyo, Sebna a sikritaryo, kan siraw panglakayen daw no papādyaw, as kan nakalaylay sa tabo so makersang a mangay di propīta Isayas a pōtot ni Amos. 3 Inbahey da dya a kon da, “Nyayaw binata ni Hesekyas: ‘Sicharaw, ki araw no kariribok, kapangdōsa no Dyos, kan kapakasnesnek a akmas kaiyanakaw no adekey, kan apabaw ayit a mangyanak sira. 4 Arānchi a madngey ni ĀPO a Dyos mo tabo chirinaya no komanderaw. Iya, ki tinoboy no āmo naw a āri no Assirya, tan mangoyaw so sibibyay a Dyos. An komwan, maparin pakono a taywaraw kapaydabdab ni ĀPO a Dyos mo a para do inchirin naw. Dawa, paydasal mo sanchiw makalāsat saw.’ ”
5 Do nakawara daw no opisyalis ni Āri Hesekyas di Isayas, 6 binata ni Isayas dyira a kāna, “Ibahey nyo do āmo nyowaw a kon nyo, ‘Nyayaw bata ni ĀPO: “Mamo kaba a maynamot do nadngey mwaw a pamaraparahet a chirin a maikontra dyaken a yapo dyirad pachirawatanaw no āryaw no Assirya. 7 Adngeyen nyo! Mapangay akonchi so ispirito dya, tan anchan madngey naw dāmag, ki maybidinchi do bōkod na a tana, as kan dawrinchiw pangipadimanan ko sya do ispāda.” ’ ”
8 Do nakadngeyaw sya no komanderaw a kinarwan āryaw no Assirya iyaw Lachis, naypabidi kan nasarakan naw āryaw a myan a machilāban do Libna.
9 Do dāwri, narawat ni Sennakerib a āri no Assirya iyaw dāmagaw a si Tirhaka a āri no Kos, ki mangyangay so bōyot na a machilāban dya. Dawa, nanaboy a minirwa siras tobotoboyen naw a mangay di Hesekyas a kāna, 10 “Ibahey nyo di Hesekyas a āri no Jodaw nya: ‘Ipalōbos mwaba allīlawen naymo no Dyos mo a pachinarngan mo do kabata na sya a “Maiparawat abanchiw Jerosalem do kakamay no āryaw no Assirya.” 11 Masyirto a nadngey mo an āngo pinarin āryaw no Assirya do tabo a nasnasyon a hinanyib na sa a rinārayaw. Maisalākan ka paro? 12 Naisalākan sawri no dyos daw no kadwan saw a nasnasyon do nakarārayaw siran aāmang namen? Taywaran naisalākan sa no dyos da saw no nasyon a Gosan, Haran, Resep, kan tawotawowo no Eden a myan do Telassar. 13 Asyo, dino danaw yanan no āryaw no Hamat, āryaw no Arpad, āryaw no syodad no Separbaim, āryaw no Hena mana āryaw no Ibbah?’ ”*19:13 2 Ār. 18:34
No Dasal ni Hesekyas
14 Narawat ni Hesekyas tolasaw a intoroh dan natoboy saw, kan bināsa na. Do dāwri, somnonget a nangay do timplowaw ni ĀPO, kan binolay naw tolasaw do salapen ni ĀPO. 15 Naydasal si Hesekyas di ĀPO a kāna, “Mo ĀPO a Dyos no Israel a naitrono do payawan daw no sinan parswa a naypanyid, imo lang moyboh a Dyos do tabo pagāryan saya do tanaya. Imo namarinaw so kahanyihanyitan kan tanaya. 16 Iwangan mo paw tadyinya mom ĀPO, kan adngeyen mo pa. Iwangan mo paw mata mo, mo ĀPO, kan chiban mo paw tolasaya. Adngeyen mo paw chirin saya ni Sennakerib a inpaiyangay na a mangoyaw so sibibyay a Dyos.
17 “O ĀPO, oyod a siraw ar-āryaw no Assiryaw, ki nangrārayaw sa siras nasnasyon kan tana da sa. 18 Pinagsid dan ar-āri saw siraw dyos daw no nasnasyon do apoy, kan rinārayaw da sa, ta dyos saba an dyi sa kayo kan bato a pinarin kakamay no tawo. 19 Sichangori, mo ĀPO a Dyos namen, isalākan mo pa yamen do kakamay na tan tabo pagāryan do tanaya, ki mapatakan da pakono a imo lang ĀPO iyaw Dyos.”
No Kaipadto ni Isayas so Kasday ni Sennakerib
20 Sinpangan na, nangipaw-it si Isayas a pōtot ni Amos so minsāhi na di Hesekyas a kāna, “Nyaw bata ni ĀPO a Dyos no Israel: ‘Nadngey ko dasal mo dyaken maynamot di Sennakerib a āri no Assirya.’ 21 Nyaw chirin a inbahey ni ĀPO a maikontra dya:
“ ‘Iyaw birhin a balāsang no Sion,
ki mahanyinyi kan mangoy-oyaw dyimo.
Anak a mabakes no Jerosalem,
ki maylilinlin do dichodan mo do kapayyayo mo.
22 “ ‘Sino iyaw inoyaw kan pinaraherahet mo?
Sino iyaw inagayan mo?
Sino iyaw pinakakokokorirat mo do pangas mo?
Iya, ki iyaw Masantwanaw no Israel!
23 Dyirad natoboy mo saw, inpaoyaw mo si Āpo.
Binata mo a kon mo, “Do kāro no logan ko a pachigobat,
sinonget ko kakarangan daw no tokotokon,
do makatayrahem saw a yanan do Lebanon.
Tinongeh ko kakarangan saw a kayokayo a sidro
kan siraw napidyaw a kayokayo a saleng.
Narapit ko katētengan saw a yanan na
a iyaw kapipintasan saw a kakaywan na.
24 Naychadi ako so bobon sa do gan-ganaet a tana,
kan mininom so ranom da daw.
Do rapan da no kokod ko,
inabkohan ko tabo oksong do Egipto.”
25 “ ‘Nadngey mo abawri
a inkeddeng ko nya do kaychowa pa?
Do panman pa syan araw, inplāno ko na,
kan inpatongpal ko sichangori
a pinayparin mo naahadan saw a syodad
a nayparin a nakawpwan no karārayaw.
26 Siraw omyanaw daw, ki abaw toray da.
Namo sa kan nasnesnekan.
Akma say mohamoha do bengkag.
Akma say mawnged a ablak.
Akma say tamek a tomobo do dapagaw a atep,
kan mahayo sa sakbay a mayparakoh.
27 “ ‘Ki chapapatak ko kapaydisna mo,
kan kayam mo kan kapaybidi mo,
as kan maypāngo kasoli mo so kontra dyaken.
28 Maynamot ta insoli mo a maikontra dyaken,
kan nadngey ko saw chirin no kapangas mo,
pangayen konchiw sadyit ko do momodan mo
kan no prino ko do dangoy mo,
as kan paybidihen konchimo
do rarahan a nakayapwan mo!’ ”
29 Sinpangan na, binata ni Isayas di Āri Hesekyas a kāna, “Nyayaw pakaboyan monchi, mo Hesekyas:
“Nyaya tawen, koman kanchis tod sa a tomobo.
Do somaronwaya a tawen, kanen monchiw tomobwaw a yapo dyira.
Ki do chatatdo naw a tawen, maymoha kan magāpit ka.
Maymoha ka siras kaobasan, kan kanen mo asi da.
30 Siraw makalasataw do pagāryan no Joda,
akma sanchiw omyamot do irahem no tana,
kan may-asinchi do tohos naw.
31 Ta mohtot sanchiw matokos saw do Jerosalem,
kan mohtot sa pa do Tokon a Sion a bonggoy no makalāsat.
“No kapodno ni ĀPO a Manakabalin do Tābo, ki ipatongpal nanchiw nyaya.
32 “As dawa, nyayaw bata ni ĀPO maynamot do āryaw no Assirya:
“ ‘Makasdep abanchi do dyaya syodad
mana makaipana so dāwa no bai do dya.
Makangay abanchi do salapen na a sisasarāpa
mana makapatnek so pakakayatan do syodadaw a pangdarop sya.
33 Do rarahan a nakayapwan na, maybidinchi.
Somdep abanchi do dyaya syodad, bata ni ĀPO.
34 Salakniban konchiw nya syodad kan isalākan ko
a maynamot do kaidāyaw ko kan di Dabid a pachirawatan ko.’ ”
35 Do dāwri a ahep, nangay anghilaw ni ĀPO do kampo daw no taga Assirya, kan diniman naw 185,000 a soldādo. Minhep do kamabekas naw, do nakapaybangon daw no kadwan saw a tawotawo, myan dana sa daw bangkayaw do omdibon daw! 36 Do dāwri, komnaro si Sennakerib a āri no Assirya. Naybidi do Ninebeh kan nagyan daw.
37 Do asaw a karaw, do kadamaw ni Sennakerib a magdaydāyaw do timplo ni Nisrok a dyos na, ki diniman iya no dadwa a pōtot na a sa Adrammelek kan Sareser so ispāda, kan naglības sa a kominwan do tana no Ararat. Si Esarhaddon a pōtot na, ki nachitādi dya a āri.