1 Do dāwri sa araw, nagganyit si Hesekyas kan kadidiman narana. Nangay dya si propīta a Isayas a pōtot ni Amos, kan binata na a kāna, “Nyaw bata ni ĀPO: ‘Mamilbīlin ka na siras myanaw do bahay mwaya, ta īto kadiman mo. Mapyan ka paba.’ ”

2 Inyidit ni Hesekyas rōpa naw do dyindyinaw kan naydasal di ĀPO a kāna, 3 “Nakmen mo pa mo ĀPO an maypāngo a inonotan koymo a sipopodno kan nainpapōswan, as kan nakapamarin ko so maganay do kapanyideb mo.” Do dāwri, taywaraw nakatanyis ni Hesekyas.

4 Ki sakbay a komnaro si Isayas do mamanhobokaw a atat, inpakatoneng ni ĀPO chirin na dya a kāna, 5 “Maybidi ka kan ibahey mo di Hesekyas a pangōlo dan tawotawo ko a kon mo, ‘Nyaw bata ni ĀPO a Dyos ni popoon mos Dabid: Nadngey ko dasal mo kan naboya ko saw hō mo. Pyahen konchimo. Do chatatdo naw anchi a araw a mangrogi sichangori, mangay kanchi do timplowaw ni ĀPO. 6 Rapan ko panchi so asa poho kan dadima a katawen no kabyay mo, kan isalākan ko panchimo kan nyaya syodad do kakamay no āryaw no Assirya. Salakniban konchiw nyaya a syodad a maynamot do pakaidayāwan ko kan di Dabid a pachirawatan ko.’ ”

7 Sinpangan na, binata ni Isayas a kāna, “Mangisagāna kamo so pangāgas a yapo do napihpih saw a igos.”*20:7 Mana “kaormaan a napihpih a nakolay a igos”. Pinarin dan magsirsīrbyaw, kan intāpal da do hapotaw no barot ni Hesekyas, as napyan.

8 Sakbay a napyan si Hesekyas, inyahes na di Isayas a kāna, “Āngonchiw pakaboyan a papyahen na yaken ni ĀPO, kan tan mangay akonchi do timplowaw ni ĀPO do chatatdo naw anchi a araw a mangrogi sichangori?”

9 Inatbay ni Isayas a kāna, “Nyaw pakaboyan mo a yapo di ĀPO a tongpalen nanchiw inkari naw. Chakakey mori a iyaw anyinwaw, ki maypatohos so asa poho a kadakwang do ayran mana maypabodis so asa poho a kadakwang do pāngal no ayran?”

10 Binata ni Hesekyas a kāna, “Maydamnay a maypatohos anyinwaw so asa poho a kadakwang. Basbāli a paypabodisen na so asa poho a kadakwang do pāngal no ayran.”

11 Do dāwri, nangdaw si propīta Isayas di ĀPO, kan pinaypabodis ni ĀPO anyinwaw so asa poho a kadakwang do ayranaw ni Ahas.

12 Do dāwri a chimpo, si Merodak-baladan a pōtot ni Baladan a āri no Babilonya, ki nanoboy siras pinakainawan na a mangyangay siras tolas naw kan rigālo na di Hesekiah, ta nadāmag na a maganyit si Hesekyas. 13 Rinawat sa ni Hesekyas natoboy saw, kan inpaboya na dyiraw tabo a myan do pangapyan na saw. Siraw pirak, balitok, rikrikādo, mangingīna saw a lana, siraw armas saw, kan tabo kadwan, ki myan sa daw do pangapyan na saw. Aba polos do palasyo naw mana do tabo pagāryan naw iyaw dyi na inpaboya ni Hesekyas dyira.

14 Sinpangan na, nangay si Isayas a propīta di Āri Hesekyas, kan inyahes na a kāna, “Āngo binata dan nya saya mahahakay, kan dino nakayakayapwan da?”

Inatbay ni Hesekyas a kāna, “Yapo sa do mateng a tana. Yapo sa do Babilonya.”

15 Inyahes no propītaw a kāna, “Āngo naboya da do palasyo mwaya?”

Binata ni Hesekyas a kāna, “Na, naboya da tābo iyaw myan do palayso kwaya. Aba polos dyirad pangapyan ko saw iyaw dyi kwa inpaboya dyira.”

16 Do dāwri, binata ni Isayas di Hesekyas a kāna, “Adngeyen mo chirinaya ni ĀPO: 17 Masyirto a ītonchiw araw a tābo do palasyo mwaya kan tabo a kinapya daw no aāmang mo manda sicharaw, ki maiyangay sanchi do Babilonya. Abanchiw matokos, bata ni ĀPO. 18 Siranchiw kadwan do kapotōtan mo a dyiran bōkod mo a āsi kan raya a maiyanak a pōtot mo, ki maikaro sanchi, as kan mayparin sanchi a yonoko do palasyo no āryaw no Babilonya.”

19 Inatbay ni Hesekyas a kāna, “No chirinaya ni ĀPO a inchirin mo, ki maganay.” Ta iniktokto na a kāna, “Bāli, ta myan anchiw talna kan maganay a kayayan do ōnos no byay ko.”

20 Siraw kadwan saw a napariparin do nakapagāri ni Hesekyas, tabo napatayoka na saw, kan maypāngo nakaparin naw so līnaw kan kanal do irahem no tana a pinamawyog nas ranom do syodadaw, ki naitolas sabawri do librowaw no pakasaritāan dan ar-āri no Joda? 21 As nachipaynahah si Hesekyas dyirad aāmang na saw. Si Manasses a pōtot na, ki nachitādi dya a āri.