1 Nagtawen si Josyas so wawaho do nakapagāri na, kan nagāri do Jerosalem so tatdo a poho kan asa katawen. No ngaran ni ānang na, ki si Jedida a pōtot a mabakes ni Adaya a taga do idi a Boskat.*22:1-2 2 Kron. 34:1-2 2 Pinarin naw kosto do kapanyideb ni ĀPO, kan inonotan naw tabo pinarin naw ni Dabid a popoon na, as somniwal aba do kawanan mana kaholi.

3 Do chaasa poho naw kan wawaho a katawen no kapagāri ni Āri Josyas, tinoboy na iyaw sikritaryowaw a si Sapan a pōtot ni Asalya a pōtot ni Meshollam tan mangay do timplowaw ni ĀPO, kan binata no āryaw a kāna,†22:3-20 2 Kron. 34:8-28 4 “Somonget ka a mangay di Hilkyas a matohos a pādi, as kan ipakwinta mo kwartaw a naiyangay do timplowaw ni ĀPO a chinpeh dan papādi a manggwardya‡22:4 2 Ār. 12:9 so asdepanaw dyirad tawotawowaw. 5 Iparawat mo kwartaw dyirad mahahakay saw a naitongdo a manyidechideb so tarabākwaw do timplo. Sira, ki magbayād sa siras trabahador saw a mangapya so timplowaw ni ĀPO. 6 On, machita a magbāyad siras karpintirwaw, masaw do mapatnek saw, kan mayatoy saw. Machita a gomātang sa pa so toroso kan nakchikchid saw a bato. 7 Ki machita paba makwintaw kwartaw a naitalek dyira, ta matalek sa do tarabāko da.”

8 Binata ni Hilkyas a matohos a pādi di Sapan a sikritaryo a kāna, “Nadongso ko libro no linteg do timplowaw ni ĀPO.” Intoroh na di Sapan a mangbāsa sya. 9 Sinpangan na, nangay si Sapan a sikritaryo do āryaw kan inpadāmag na dya a kāna, “Siraw opisyal mo saw, ki nagbāyad dana saw so kwarta a yapod timplowaw ni ĀPO, kan inparawat daranaw dyirad trabahador saw kan siraw manyidechidebaw so kapangapya so timplowaw.” 10 Inpadāmag na pa ni Sapan do āryaw a kāna, “Nanorohaw dyaken si Hilkyas a pādi so asa libro.” Do dāwri, bināsa ni Sapan do salapenaw no āryaw.

11 Do nakadngey naw no āryaw so chirin saw no librowaw no linteg, pinirit naw laylay naw. 12 Inmandar na di Hilkyas a pādi, di Ahikam a pōtot ni Sapan, di Akbor a pōtot ni Mikayas, di Sapan a sikritaryo, kan di Asaya a pachirawatan na a kāna, 13 “Mangay kamo a manahes di ĀPO so para dyaken kan para dyirad tawotawo do tabo Joda a maynamot do chirin saya do dya a libro a nadongso. Ta taywara a nakasoli si ĀPO dyaten maynamot ta siraw popoon ta saw, ki nagtongpal saba do chirin saya do dyaya a libro. Pinarin dabaw sigon do tabo a naitolas daw a maynamot dyaten.”

14 Dawa, si Hilkyas a pādi, Ahikam, Akbor, Sapan, kan Asaya, ki nangay sa do asa mabakes a propīta a si Holda a magyan do Chadadwa naw a Distrito do Jerosalem. Si Holda, ki baket ni Sallom a pōtot ni Tikba a pōtot ni Harhas. Iyaw lakay naw, ki mangay-aywan siras laylay.§22:14 Naibahey aba do Hebreo, ki maparin a laylay ni āri mana dyirad papādi.

15 Binata ni Holda dyira a kāna, “Nyaw bata ni ĀPO a Dyos no Israel: ‘Ibahey nyo do mahakayaw a nanoboy dyinyo dyaken a kon nyo, 16 Nyayaw bata ni ĀPO: “Mangyangay akonchi so didigra do dyaya logar kan do tawotawo na sigon do tābo a naitolas do librowaw a nabāsa no āryaw no Joda. 17 Maynamot ta tomnadyichokod sa dyaken kan nangsosoh sa so insinso do matatarek a didyosen tan pinakasoli da yaken do tabo didyosen a pinarin da do kakamay da, ki mangsosoh anchi iyaw soli ko a akmay apoy do dyaya logar kan mawsep abanchi!” 18 Ki ibahey nyo do āryaw no Joda a nanoboy dyinyo a manahes di ĀPO a kon nyo, “Nyaw bata ni ĀPO a Dyos no Israel maynamot do chirin saw a nadngey mo: 19 Maynamot ta nagbabāwi kan nagpakombaba ka do salapen ni ĀPO do nakadngey mwaw so inbahey kwaw kontra do dyaya logar kan do tawotawo na a mayparin sanchi a marārayaw kan mabay, as kan maynamot ta pinirit mo laylay mo kan tomnanyis ka do salapen ko, ki nadngey ko paymo, bata ni ĀPO. 20 Dawa, parapahen konchi imo a machipaynahah dyirad popoon mo sa, kan maitābon kanchi a sitatalna. Maboya abanchi no mata mo tabo saw a didigra a iyangay konchi do dyaya tana. ” ’ ”

Do dāwri, inyangay daw atbay naw ni Holda do āryaw.