1 Do nakatayoka no nyaya, nakahap si Absalom so logan na a pachigobat kan kabalyo na saw, kan dadima poho a mahahakay a taga-bantay na a nanmanma kan iya.*15:1 Pinarin naw nya tan inpaboya nad tawotawo a iya, ki akmay āri. 2 Kanāyon a masāpa a maybangon a mangay a maytēnek do bītaw no rarahanaw a komwan do rowanganaw no syodad. An myan mangyangay so kāso do āryaw tan ipaokom na, tawagan na kan iyahes ni Absalom a kāna, “Āngo idi a nakayapwan mo?” Atbayen no tawowaw a kāna, “Yaken a pachirawatan mo, ki yapo akwaw dyirad asa dyirad trībo no Israel.” 3 Do dāwri, ibahey ni Absalom dya a kāna, “Na, maganay kan kosto kaya do dawri a kāso mo, ki sayang abayaw mangitēnek dyimo do āryaw a makadngey dyimo.” 4 Batahen na pa ni Absalom a kāna, “Ay, an yaken sawen iyaw no maitongdo a hwis do dyaya tana! An komwan aket, kāda myan so riklāmo mana kāso, maparin naw mangay dyaken kan torohan konchi iya so kalintegan.” 5 As kan, kāda myan maypasngen di Absalom a magrōkob do salapen na a mangdaw so sidong na, rawaten naw tachay naw, kakepkep na sya, as kadadek na sya. 6 Komwan dadakay a inpaboya ni Absalom dyirad tabo Israelita saw a nangay do āryaw a mangdaw so kinalinteg. As dawa, ināgaw naw kapodno da no tawotawo no Israel.

7 Do nakapakahabas naw no apat a katawen, binata ni Absalom do āryaw a kāna, “Palobōsan mo pa yaken a mangay do Hebron tan tongpalen ko iyaw no insapata kwaw di ĀPO. 8 Ranan no nakayan ko a pachirawatan mo do Gesor do Aram, insapata ko a kon ko, ‘An paybidihen yaken ni ĀPO do Jerosalem, magdaydāyaw akonchi dya do Hebron.’ ”

9 Binata no āryaw dya a kāna, “Na, mangay ka sitatalna ah.” Dawa, nangay do Hebron.

10 Ki nanoboy si Absalom a sililimed so tobotoboyen na sa dyirad tabo trībo no Israel, kan ipaibahey na dyira a kon da, “Apāman a madngey nyonchiw no ōni naw no trompīta, iwaragāwag nyonchi a kon nyo, ‘Si Absalom danaw āri do Hebron!’ ” 11 Nachangay di Absalom dadwa gasot a mahahakay a yapo do Jerosalem. Naawis sa a nachangay dya, kan nangay sa a abaw chapatak da do ranta naw ni Absalom. 12 Ranan na a mangidāton ni Absalom siras dātonaw, inpatawag na pa si Ahitopel a Gilonita a asa dyirad mamagbagaw ni Dabid a mangay a yapo do Giloh a idi na. Nahay aba, as nakapaypāro dana no minononot di Absalom. Dawa, naypaypayit iyaw pangta na a magribīldi di Dabid.

13 Myan tobotoboyen a nangay kan nangibahey di Dabid a kāna, “Iyaw no kapodno dan Israelita, ki nahap dana ni Absalom.”

14 Do dāwri, binata ni Dabid dyirad tabo opisyalis naw a myan dya do Jerosalem a kāna, “Ta na! Machita taw mayyayo a sigīda, ta āngwan abonchi dyaten makalības di Absalom. On, kalistwan ta, ta īto dana mangadas dyaten a mangyangay so karārayawan ta, as dimanen na saw omyan do syodadaya do ispāda.”

15 Tinbay dan opisyalisaw no āri a kon da, “Yamen a pachirawatan mo, ki sisasagāna kami na mamarin so aran āngo a disisyon mo.”

16 Dawa, komnaro iyaw no āryaw, as minonot sa dyaw tabo kapamilyaan kan siraw opisyalis na. Ki tinokos na saw asa pohwaw a minabakes na a magbantay so palasyo. 17 As do kakaro daw no āryaw kan tabo tawotawo a minonot dya, ki nagsardeng sa do manawdyaw a bahay do syodad.†15:17 Mana “do manawdyaw a bahay a midyo mateng do syodad”. 18 Ninanaya da sa tabo bōyot naw a homabas a manmanma sa kan sira. Tabo saw Keretita, tabo saw Peletita, kan tabo anem saw a gasot a Gittita a nachirārayay dya a yapo do Gat, ki nagmarcha sa do panmanaw no āri.

19 Binata no āryaw di Ittay a pangōlo dan Gittita a kāna, “Āngo ta machangay ka pa dyamen? Maybidi ka, kan omyan ka di Āri Absalom, ta gan-ganaet kaya a asa napaksyat a yapod mismo mo a tana. 20 Nawara ka lang kakoyab. As changori machipayapayadis kawri dyamen, kan chapatak ko abayaw kwanan ko? Maybidi ka na kan siraw tawo mo saya. Si ĀPO dana pakono mapaboya dyinyo so dya mabdibdis a kadaw na kan kapodno na.”

21 Ki tinbay ni Ittay iyaw āryaw a kāna, “Akmas kasigorādo no kasibibyay ni ĀPO, kan akmas kasibibyay no āpo a āri ko, aran dino a yanan no āri, do kadiman mana kabyayan, dawriw yanan no pachirawatan mo.”

22 Binata ni Dabid di Ittay a kāna, “Sigi, machangay ka dyamen.” Dawa, tinongtong ni Ittay nagmarcha kontōdo tabo saw a tawotawo na mahahakay kan siraw pamilya da a myan dya.

23 Naychatanyitanyis sa so malyak tabo nabidin saw do kaboya daw a homnabas āryaw kan tabo tawotawo saw a myan dya. Naysopo paw no āryaw do Payahosongan no Kidron, kan minonot sa tabo tawotawowaw a kominwan do let-ang.

24 Sa Sadok kan Abyatar a papādi, ki myan sa daw kan tabo Lebita‡15:24 Siraw Lebita do partīdos dan Kohatita, ki siraw makatoneng so lakāsanaw no Dyos. Nom. 3:30-31 saw a mangisiw so lakāsanaw no tōlag no Dyos. Pinadisna daw lakāsanaw no Dyos§15:24 Do kadwan a naiyōlog, ki “Pinadisna daw lakāsan no Dyos, as nangidāton si Abyatar a nandad....do syodadaw”. ranan nakapakahtot da tabo no tawotawo do syodadaw.

25 Do dāwri, binata no āryaw di Sadok a kāna, “Pabidyen nyo lakāsanaya no Dyos dwa syodad. An maboya konchi a mahwahok si ĀPO dyaken, paybidihen nanchi yaken, as maboya konchi a mirwa kan iyaw no niyanan naw. 26 Ki an dya mahwahok dyaken, chako dya, kan maipalōbos a parinen naw aran āngo a ibidang na a maganay dya.”

27 Inbahey na pa no āryaw di Sadok a kāna, “Makaalwad ka pa manyideb.*15:27 Mana “Mamadto kabawri?” Dawa, maybidi ka do syodad a sitatalna. Imo kan si Abyatar, ki maybidi kamo, kan hapen nyo dadwaw a pōtot nyo a mahakay. On, hapen mo si Ahimaas a pōtot mo kan si Jonatan a pōtot ni Abyatar. 28 Mangnanaya akonchi do abtangan saw do let-ang mandan myan dāmag a yapo dyimo a mangipakatoneng dyaken.” 29 Dawa, sa Sadok kan Abyatar, ki pinaybidi daw lakāsanaw no Dyos do Jerosalem, kan minyan sa daw.

30 As si Dabid, ki tomnanyitanyis do kayam naw a somonget do tokon a mayngaran so Olibo. Nakadalongdong kan abos tokap. Tabo saw no tawotawowaw a nachirārayay dya, ki nagdalongdong sa met kan naychatanyitanyis sa a somnonget. 31 Sinpangan na, naibahey di Dabid akma syay: “Si Ahitopel, ki myan dyirad nachiribīldi saw a nachirapa di Absalom.” Dawa, naydasal si Dabid a binata na a kāna, “O ĀPO, badyikden mo pa a kabon arang iyaw pamagbaga ni Ahitopel.”

32 Do nakapakarapit naw ni Dabid do tōtokaw no tokon a yanan magdaydāyaw a tawotawo do Dyos, myan si Hosay a Arkita daw a nachibayat dya a napirit so kagay kan myan ahbek do oho naw. 33 Binata ni Dabid dya a kāna, “An machangay ka dyaken, tod ka mangay a rahmet ko. 34 Ki an maybidi ka do syodad, kan ibahey monchi di Absalom a kon mo, ‘O āri, mayparin ako a pachirawatan mo. Yaken pachirawatan ni āmang mo do nakarahan, ki yaken danaw pachirawatan mos changori.’ An komwan, makasidong ka dyaken a mangpāay so pamagbaga ni Ahitopel. 35 Ari sabawri daw sa Sadok kan Abyatar a papādi a rārayay mo. Ibahey mo dyiraw aran āngo a madngeyan mo do palasyowaw no āri. 36 Siraw dadwa a pōtot da a si Ahimaas a pōtot ni Sadok, kan Jonatan a pōtot ni Abyatar, ki myan pa sa daw. Toboyen mo sa dyaken a mangibahey so aran āngo a madngey mo.”

37 Dawa, si Hosay a sīt ni Dabid, ki nawara do Jerosalem do kasdep naw ni Absalom do syodadaw.