1 Do nakapakachibawa naw so dēkey ni Dabid do tōtokaw no tokon, myan si Siba a pachirawatan ni Mepiboset a mangnanaya a machibayat dya. Myan dadwa a asno na a nakakarga so dadwa gasot a natāpi a tināpay, asa gasot a kaormaan a napihpih a pasas, asa gasot a kaormaan a napihpih a nakolay a igos, kan palek a myan do lālat a sopot.

2 Inyahes no āryaw di Siba a kāna, “Āngo ta nangyangay ka siras syay?”*16:2 No inyangay ni Siba, ki dyira naba, ta yapo do āpit a dyira ni Mepiboset. 2 Sam. 9:10, 19:24-30

Tominbay si Siba a kāna, “Siraw asnwaya, ki para do kapamilyaan no āri a pagsakayan da. Iyaw no tināpay saya kan protas, ki para dyirad mahahakayaw a kanen da. As iyaw palekaya, ki para dyirad nahopag saw do let-ang a inomen da.”

3 Inyahes dana no āryaw a kāna, “Na, dino yanan apoko naw a mahakay no āmo mwaw?”

Binata dya ni Siba a kāna, “Aryaw a nabidin do Jerosalem, ta binata na a kāna, ‘Sicharaw, ki pabidyen da no Israelita saw dyaken pagāryan no āpong kwaw a si Saulo.’ ”

4 Do dāwri, binata no āryaw di Siba a kāna, “Tābo a dyira ni Mepiboset, ki dyira mo na.”

Binata ni Siba a kāna, “Sipapakombaba ako a magdāyaw dyimo. Nāw ko pakono a makahwahok dyimo mo āpo a āri ko.”

5 Do nakapakarapit naw ni Āri Dabid do idi a Bahorim, myan iyaw mahakay a yapo do kaliposan ni Saulo a minohtot. No ngaran na, ki Simey a pōtot ni Gera. Ranan naw no kahtot na, tinongtong naw mangabay. 6 Inagsigsidan na si Dabid kan tabo saw opisyalisaw no āri a aran nadibon si Dabid no bōyot na saw kan siraw taga-bantay naw. 7 Ranan kapangabay ni Simey, binata na a kāna, “Komaro ka! Komaro ka dya, imo a mangdimdiman, imo a abos sinpaspangan a tawo! 8 Binahes naymo ni ĀPO do tabo a pinawyog mos raya do pamilya ni Saulo a ināgaw mo a nagāri. Intoroh dana ni ĀPO iyaw no pagāryanaw di Absalom a pōtot mo. Nadas mo naw karārayaw mo maynamot ta mangdimdiman ka a tawo!”

9 Do dāwri, binata ni Abisay a anak ni Seroyas do āryaw a kāna, “Āngo ta naipalōbos nya a akmay nadiman a chito a mangabay so āpo kwaya a āri? Nolay mo pa yaken a mangay a mangteb so oho naya.”

10 Ki binata no āryaw a kāna, “Āngo bibyang ko dyinyo, inyo a anak ni Seroyas? An mangabay iya maynamot ta inbahey ni ĀPO dya a kāna, ‘Abayen mo si Dabid,’ sino paro maparin a mangyahes sya a ‘Āngo ta pinarin mo komwan?’ ”

11 As binata ni Dabid di Abisay kan dyirad tabo opisyalis na saw a kāna, “Si Absalom a pōtot ko a bōkod ko a asi kan raya, ki padāsen na yaken a dimanen. Dyori a mangamangay pa do dyaya a Benhaminita? Nolay nyo. Palobōsan nyo a mangabay, ta si ĀPO nangibahey sya. 12 Maparin pakono a si ĀPO, ki makaboya so pakariribokan ko, kan paybidihen nanchi dyaken maganay a tādi no nya kaabay na dyaken sicharaw.”

13 Dawa, tomnongtong si Dabid kan bonggoy na saw a mahahakay do rarahanaw. Ki si Simey, tomnongtong do bakrang naw no paytokonan a somalap dyira a mangababay do kayam naw, as nangagsigsid so bato kan mangpelkat so tana dyira. 14 Iyaw āryaw kan siraw tabo tawotawo a myan dya, ki nahah sa do nakarapit daw do angayan daw a Oksong a Jordan. Dawriw naynahahan da a napabidi so ayit da.

15 Ranan na a napariparin nya, si Absalom kan tabo Israelita a myan dya, ki nakarapit dana sa do Jerosalem, as myan si Ahitopel dyira. 16 Do dāwri, si Hosay a Arkita a sīt ni Dabid, ki nangay di Absalom, kan binata na dya a kāna, “Manayon pakono byay no āri! Manayon pakono byay no āri!”

17 Inyahes ni Absalom di Hosay a kāna, “Iyawriw nyaw kapangipaboya mos adaw mod sīt mwaw? Āngo ta dyi ka nachangay do sīt mwaw?”

18 Tinbay ni Hosay si Absalom a kāna, “Komwan aba ah, ta nāw ko a myan do tawowaw a pinidi ni ĀPO, kan dyirad nyaya tawotawo, kan dyirad tabo a Israelita. 19 Machirohno pa, sino paro pagsīrbyan ko? Magsīrbi ako abawri dyimo a pōtot na? Akmas nakapagsīrbi ko di āmang mo, komwan kapagsīrbi ko dyimo.”

20 Do dāwri, binata ni Absalom di Ahitopel a kāna, “Ibahey mo na dyamen pamagbaga mwaw ah. Āngo parinen ta?”

21 Initbay ni Ahitopel a kāna, “Oknoden mo saw minabakes nayan āmang mo a tinokos na a mangaywan so palasyo. Tabo tawotawo no Israel, ki madāmag danchi a taywara a pinangyobek mo inawan mo do momodan ni āmang mo, kan maypayit sanchiw no tabo tawotawo a myan dyinyo.” 22 Dawa, napatnek sa so tolda do dapagaw a atep no palasyo a para di Absalom. Do kapanyideb no tabo Israel, somindep kan nachoknod dyirad minabakes na saw ni āmang na.

23 Do dāwri sa a araw, iyaw no pamagbagaw a intoroh ni Ahitopel, ki narawat a akmay naispiritwan a minsāhi no Dyos. Komwan nakaibidang ni Dabid kan Absalom so tabo pamagbaga ni Ahitopel.