1 Sinpangan na, binata ni Ahitopel di Absalom a kāna, “Palobōsan mo yaken a mamidi so 12,000 a mahahakay, kan magrobwat ako a manglakat si Dabid sichahep. 2 Madas konchi a ranan na a mahopag kan maōpay. Itopak konchiw kataranta dya, as tabo tawotawo a myan dya, ki mayyayo sanchi. Iyanchi lang āryaw dimanen ko, 3 kan paybidihen konchiw tabo tawotawo saw dyimo akmas kapaybidi naw no nobya do lakay na. Asa lang a byay no tawo iyaw no chichichwasen mo, kan maan-ano sabanchiw tawotawo.” 4 Iyaw nyaya a pamabaga, ki akmay maganay da Absalom kan siraw tabo panglakayen saw no Israel.

5 Ki binata ni Absalom a kāna, “Patawagan mo pa si Hosay a Arkita tan madngeyan ta met an āngo iyaw no mabata na.” 6 Do nakangay naw ni Hosay dya, binata ni Absalom a kāna, “Inbagbaga naw komwan ni Ahitopel. Parinen tawri akmas inbahey naw? An engga, ibahey mo pa dyamen an āngo mabata mo.”

7 Inatbay ni Hosay si Absalom a kāna, “Iyaw no pamagbagaya ni Ahitopel dyimo, ki maganay aba sichangori a ōras. 8 Chapapatak mo si āmang mo kan bonggoy na saw a mahahakay. Mabibīleg sa a taga-darop, kan taywara sa a napasoli a akmay mabinayi a oso do kahasan a natakawan so anak. Malaksid pad dawri, si āmang mo, ki sanay a machigobat, kan pahabasen nabanchiw ahep a machisan dyirad bōyot na saw. 9 Aran changori, ari a tomnayo do asa dyirad aschipaw mana do kadwan a akma syay. An daropen na saw bōyot mwaya a manmanma as abāken na saw kadwan, no aran sino a makadngey sya, ki maibahey nanchi a kāna, ‘Ay, anyan a karanggas no nakapangdiman da so bōyot saw ni Absalom.’ 10 Aran iya paw katotoredanaw a soldādo a magpospōso a akmaw katored no lion, ki arabanchiw tored na do taywara a kāmo na, ta chapatak no tabo tawotawo a Israel a mabīleg a machigobat si āmang mo, kan matotored pa saw myanaw dya.

11 “No ibagbaga ko dyimo, ki akpehen mo sa tabo soldādwaw no Israel a makayapo do Dan a komwan do Beerseba a akma sas kārwaw no anay do payis no kanayan, as imo iyaw no mangidangōlo dyira do paggogobatan. 12 Do dāwri, daropen tanchi iya do aran dino a pakachichwasan ta sya. Daropen tanchi iya a akmas kapaychahesdayaw no apon a mamōn so tana. Iya kan bonggoy na saw a mahahakay, ki abanchiw matokos dyira a sibibyay. 13 An magatras do asa dyirad syodad saya, ki mangyangay sanchiw tabo Israel so hobid, kan gorogoden danchiw ahadaw no syodad a iyosok da do payahosongan a mandan abo danaw matokos a aran asa bato.”

14 Si Absalom kan siraw tabo a mahahakay no Israel a myan dya, ki binata da a kon da, “Iyaw pamagbaga naya ni Hosay a Arkita, ki maganaganay kan iyaw pamagbagaya ni Ahitopel.” Nyaw pinanggep ni ĀPO a mangpāay so maganayaw a pamagbaga ni Ahitopel tan iyangay naw didigra di Absalom.

15 Sinpangan na, inbahey ni Hosay da Sadok kan Abyatar a papādi a kāna, “Myanaw pamagbagaw ni Ahitopel di Absalom kan siraw no panglakayen saw no Israel, ki matarek pamagbaga kwaw. 16 Dawa, sichangori, kabelan nyo manoboy so mangay a mangibahey syay di Dabid a kon da, ‘Misan kaba sichahep dyirad pamtanganaw do let-ang. Maybabalay kaba a maysopo do oksongaw, ta āngwan adasen karārayawan iyaw āryaw kan tabo saw tawotawowaw a myan dya.’ ”

17 Si Jonatan kan Ahimaas,*17:17 2 Sam. 15:17 ki omyan sad En-rogel. Myan mabakes a pachirawatan a nangay a nangipadāmag dyira, kan inyangay daw nawri a dāmag di Āri Dabid, ta igasanggāsat dabaw inawan da a somdep do syodadaw. 18 Ki naboya sa no bomarīto, kan inbahey na di Absalom. Dawa, naychinalo sa a komnaro dadwaw, kan nangay sa do bahay no asa mahakay do Bahorim. Myan iyaw no bobon na do atat naw, kan inagchin daw nawri a bobon. 19 Nanghap iyaw baketaw no mahakayaw so pinatalob na a binolay do bobonaw, as nakapangiwakray na so irek do hapot naw. Abaw matarek a nakapatak a myan tawo daw.

20 Do nakangay daw no opisyalisaw ni Absalom do mabakesaw a myan do bahayaw, inyahes da a kon da, “Nangayan da Ahimaas kan Jonatan?”

Tinbay no mabakesaw a kāna, “Naysopo saw do dēkeyaw a oksong.” Naychichwas saw mahahakayaw, ki nachichwasan da saba. Dawa, naybidi sa do Jerosalem.

21 Do nakakaro daranaw no mahahakayaw, komnayat sa Ahimaas kan Jonathan a minohtot a yapo do bobonaw, kan nangay da inpadāmag di Āri Dabid. Inbahey da dya a kon da, “Alisto ka a maysopo do oksongaya ah, ta nangibagbaga si Ahitopel so maikontra dyimo!” 22 Dawa, si Dabid kan tabo tawotawo na saw a myan dya, ki naysopo sa do Oksong a Jordan. Do nakapaysesēdang naranaw, arabaw natokos a dya nakapaysopo do oksongaw.

23 Do nakatonengaw ni Ahitopel a dya nawnotan iyaw no pamagbaga naw, inap-apan naw asno naw, as nakasabat na do īdi na. Do nakatayoka naw a namilbīlin siras myanaw do bahay na, yangay na linodyit a inapseh inawan na. Dawa, nadiman kan naitābon do aschipaw a tanem ni āmang na.

24 Sinpangan na, nangay si Dabid do Mahanaim. As si Absalom kan tabo mahahakay no Israel a myan dya, ki namtang sa do Jordan a oksong. 25 Tinongdo ni Absalom si Amasa a komander no bōyot a tādi ni Joab. Si Amasa, ki pōtot ni Jeter†17:25 Mana “Itra.” 1 Ār. 2:5, 32; 1 Kron. 2:17 a asa a Ismaelita a nangabahay di Abigail. Si Abigail, ki pōtot a mabakes ni Nahas kan kakteh a mabakes ni Seroyas a ānang ni Joab. 26 Siraw Israelita saw kan si Absalom, ki nagkampo sa do tana no Gilead.

27 Do nakangayaw ni Dabid do Mahanaim, si Sobi a pōtot ni Nahas a yapo do Rabba no Ammonita saw, kan si Makir‡17:27 2 Sam. 9:45 a pōtot a mahakay ni Ammyel a yapo do Lo-debar, kan si Barsillay§17:27 2 Sam. 19:31-39 a Gileadita a yapod Rogelim, 28 ki nangyangay sa siras apin, plangplanggana, kan damdamili a longlongan. Nangyonot pa sa so trigo, sebāda, arina no trigo, nakirog a paray, botoh sa no agayap kan botoh sa no balatong, 29 tagapolot no yokan, omnalsemaw a gatas, karniro, kan keso a yapo do gatas dan bāka a para di Dabid kan siraw tawotawo a myan dya tan myan kanen da. Ta naktokto da a kon da, “Maptengan kan mahopag kan mawaw dana saw tawotawo saw do let-ang.”