1 Pinaychichipeh ni Dabid saw mahahakayaw a myan dya, as kan nanongdo so komander dan tayisaw a rībo kan komander dan tayisaw a gasot. 2 Pinayam ni Dabid saw bōyot naw. Iyaw pagkatlo naw, ki indaōlwan ni Joab. Iyaw asaw a pagkatlo, ki indaōlwan no kakteh naw a mahakay ni Joab a si Abisay a anak ni Seroyas. As iyaw asa paw a pagkatlo, ki si Ittay a Gittita iyaw nangidaōlo sira. Binata no āryaw dyira a kāna, “Yaken a mismo, ki machangay ako pa dyinyo a machilāban.”

3 Ki binata da no mahahakayaw a kon da, “Basta dyi ka machangay dyamen. Ta an mapīlitan kami a maglilības, abaw bibyang da dyamen. Aran madiman paw no kagodwa no bidang namen, alit na abo bibyang da. Ki no kapateg mo, ki akmay asa poho a rībo do bidang namen. Dawa, maganaganay pa an tod mo yamen a sobaybayan a yapo do syodadaya.”

4 Inatbay sa no āryaw a kāna dyira, “Parinen ko aran āngo a ibidang nyo a maganay.”

Dawa, naytēnek dana lang āryaw do bīt naw no rowangan ranan da a naychahbohbot a nagmarcha no tabo bōyot saw do tayisa gasot kan tayisa rībo. 5 Inbilin no āryaw a kinalyak da Joab, Abisay, kan Ittay a kāna, “Ranggasan nyo abaw baro kwaw a si Absalom a maynamot do kāsi nyo dyaken.” As nadngey da tabo no bōyot da saw iyaw bīlinaw no āryaw dyirad komander saw a maynamot di Absalom.

6 Minohtot saw bōyot saw do syodadaw a mangay a machigobat do Israel. Iyaw paggogobatan da, ki do kahasan no Epraim. 7 Inābak da saw bōyot saw no Israel no soldādo saw ni Dabid. Taywara a kāro no nadiman do dāwri a araw a dadwa poho a rībo a mahahakay. 8 Nayparahawaw naglalabānan da do intīro a tana. Siraw nadiman do dilikādwaw a kahasan do dāwri a araw, ki arwaro kan siraw nadimanaw do ispāda.

9 Do dāwri, nabayat ni Absalom bōyot saw ni Dabid. Nakasakay si Absalom do mola naw. Kominwan mola naw do ohbwaw no matokpoh saw a sangasanga no rakoh a lōgo a kayo, nachisadyit oho naw ni Absalom do kaywaw. Natokos a nalōdyit. As iyaw mola naw, ki tinongtong naw nayyayo.

10 Do nakaboyaw no asa a mahakay so naparinaw, inbahey na di Joab a kāna, “Naboya ko si Absalom a nalōdyit do lōgwaw a kayo.”

11 Binata ni Joab do nakaibaheyaw sya no mahakayaw a kāna, “Āngo! Naboya mori? Āngo ta dyi mo pa diniman daw? Aysa, an komwan, chasoyot ko a torohan imo so asa poho a kapidāso a pirak kan sintorong no taga-gobat!”

12 Ki inatbay no mahakayaw a kāna, “Aran makarawat kakamay ko saya so karahmet no asa rībo a kapidāso a pirak, dimanen kwabaw pōtotaya no āryaw. Sigon do nadngey namen, inbilin no āryaw dyimo kan di Abisay kan Ittay a kāna, ‘Aywanan nyo baro kwaw a si Absalom a maynamot do kāsi nyo dyaken.’ 13 Ki an igasanggāsat ko byay ko,*18:13 Mana, “an rinanggasan ko byay na”. alit na inonolay nyonchi yaken, ta abaw maitayo do āryaw.”

14 Binata ni Joab a kāna, “Pī! Mangbalabalay ngah!” Dawa, nangay a nanghap so tatdo a chibot, as nakaichibot na sya do barōkong naw ni Absalom a sibibyay pa a nachisadyit do lōgwaw a kayo. 15 Do dāwri, asa poho a babbaro iyaw taga-sahabit so armas ni Joab nangdibon di Absalom a nang-ōloy sya a nanda do nakadiman na.

16 Sinpangan na, inalopan ni Joab iyaw no trompītaw, kan naybidi saw bōyot saw a yapo do nakapanglakat daw siras Israelitaw, ta pinenpen narana sa ni Joab. 17 Inhap daw bangkayaw ni Absalom, as nakaipoha da sya do rakohaw a abot do kahasan, as kinatohos da pinōnan so bato. Ranan a napariparin nya, tabo Israelita saw a mapodno di Absalom, ki naychapayyapayyayo sa somnabat do bahabahay da.

18 Do nakabyay na paw ni Absalom, ki nanghap so rakoh a bato a pakanaknakman so inawan na, kan pinatnek na do Payahosonganaw no Āri, ta iniktokto na a kāna, “Abayaw pōtot ko a mahakay a mangpanakenakem so ngaran ko.” Pinangaranan naw pinatnek naw a bato so mismo na a ngaran, kan nayngaran so Mohon ni Absalom manda sichangori.

19 Sinpangan na, binata ni Ahimaas a pōtot ni Sadok a kāna, “Palobōsan nyo pa yaken a mayyayo a mangyangay so dāmag do āryaw a insalākan ni ĀPO iya a yapod toray dan kabōsor naw.”

20 Binata ni Joab dya a kāna, “Imo abaw mangay a mangipadāmag sicharaw. Yangay mo nanchi a ipadāmag do matarek a araw. Basta dya changori, maynamot ta nadiman pōtot naw no āryaw.”

21 Do dāwri, binata pa ni Joab do tawowaw a yapo do Kos a kāna, “Yangay mo na ibahey do āryaw an āngo naboya mo.” Nagrōkob iyaw tawowaw a yapo do Kos do salapen ni Joab, as nakapagrobwat na a nayyayo.

22 Ki pinirwa narana ni Ahimaas a pōtot ni Sadok a inbahey di Joab a kāna, “Bāli dana an āngonchiw maparin. Palobōsan mo yaken a mayyayo a mangyangay pa so dāmag a rarayay no tawowaw a yapo do Kos.”

Ki binata ni Joab a kāna, “Barok, āngo ta chakey mo mangay? Abayaw dāmag a yangay mo do āryaw tan maitoroh anchi dyimo gon-gona mo.”

23 Binata narana a kāna, “Bāli an āngonchiw maparin. Chakey ko mayyayo.”

Dawa, binata ni Joab dya a kāna, “Na, mayyayo ka na ah!” Do dāwri, nayyayo si Ahimaas do ayamanaw do katanapan, kan inadas naw tawowaw a yapo do Kos.

24 Naydisna si Dabid do payawanaw no makatayrahem kan myanaw do gaganaw a rowangan no syodad. Iyaw taga-wanawanaw, ki komnayat a nangay do dapagaw a atep, kan naytēnek a masngen do ahadaw do ayamanaw do rowanganaw. Do nakatangay naw, naboya naw mahakayaw a mayyapayyayo a maychatanyi. 25 Intawag no taga-wanawanaw do āryaw kan inpadāmag na.

Binata no āryaw a kāna, “An maychatanyiw nawri, ariw maganay a ipadāmag na.” Iyaw mayyapayyayowaw, ki maypaypasngen.

26 Do dāwri, nakaboya danaw taga-wanawanaw so asa pa a somarsarono a mayyapayyayo, kan intawag na do mangiwaywangaw so rowanganaw a kāna, “Chiban pa, tori payaw asa maychatanyi a mayyayo!”

Binata no āryaw a kāna, “Ay, aran iya met, ki mangyangay so maganay a dāmag!”

27 Binata no taga-wanawanaw a kāna, “No kapayyayo no manmaya, ki akmayas kapayyayo ni Ahimaas a pōtot ni Sadok.”

Tinbay no āryaw a kāna, “Na, maganayaw nawri a tawo, kan mangay a mangiyangay so maganay a dāmag.”

28 Sinpangan na, do nakapakarapitaw ni Ahimaas, kinalyak na a binata do āryaw a kāna, “Matalna dana tabo!” Nagrōkob do tana do salapen no āryaw, kan binata na a kāna, “Madāyaw si ĀPO a Dyos mo, ta inābak na saw mahahakay saw a nachiribīldi dyimo a āpo a āri ko.”

29 Inyahes no āryaw a kāna, “Maganayoriw kayayan no barwaw a si Absalom?”

Tinbay ni Ahimaas a kāna, “Do nakatoboyaw ni Joab so pachirawatanaw no āri kan yaken,†18:29 Malawag aba do Hebreo a chirin. Maparin pa a “Do nakatoboyaw ni Joab a pachirawatan mo,” mana “Do nakatoboyaw ni Joab dyaken a pachirawatan mo.” naboya kwaw rakoh a kariribok dan tawotawo, ki chinapatak kwabaya an āngo nawri.”

30 Binata no āryaw a kāna, “Maytēnek kad bītaya kan mangnanaya ka dya.” Dawa, domnakwang a naypapayis kan naytēnek daw.

31 Sinpangan na, nawaraw tawowaw a yapo do Kos, kan binata na a kāna, “Mo āpo a āri ko, adngeyen mo paw maganayaya dāmag! Ta si ĀPO, ki insalākan naymo sicharaw yapo do toray dan tabo a nachiribīldi dyimo.”

32 Inyahes no āryaw do tawowaw a kāna, “Maganayoriw kayayan no barwaw a si Absalom?”

Initbay no taga Kosaw a kāna, “Sira pakono kabōsoraw ni āpo a āri ko kan tabo a machiribīldi dyimo a nangipangta so pamaynyin dyimo, ki machiyengay sa pakono do barwaw.”

33 Naigpet na paba no āryaw inawan na do kaliday na. Komnayat a nangay do kwartwaw do paggwardyaanaw a myan do anmwaw no rowanganaw, as nakatanyis na. Do kadama naw a komayat, binata na a kāna, “O anak ko a Absalom! Anak ko, anak ko a Absalom! Maganaganay pa yaken nadiman a dya imo, O Absalom a anak ko, anak ko!”