No Chatatdo A Tolas Ni Juan
No Pakatonngan so Paytābwan no Nya Tolas
Nyaw tolas ni Juan di Gayo a asa nangipangōlo so nanganohed do asa kapilya da. Iya, ki asa sīt ni Apostol Juan. Padayāwan ni Juan si Gayo do maganayaw a dadakay na a mangrispitar siras magbibyahi saw a mangaskasaba. Binallaāgan na do marahetaw a dadakay ni Diotrepes, ta rawaten nabaw tinoboy saw ni Juan.
No Naychakarwan no Nya Tolas
Pakatoneng 1-4
No kaipadāyaw ni Gayo 5-8
Sa Diotrepes kan Demetrio 9-12
No kapanawdyan na 13-15
3 Juan
1
Pakatoneng
1 Dyimo mo Gayo*1 Ara. 19:29 a chadaw ko:
Yaken si Juan a asa panglakayen dan manganohed. Nyaw tolas ko dyimo a oyod kwa chadaw do kapanganohed taya.
2 Imo a chadaw kwa sīt, maganay pakono tābo a kayayan mo kan masalon-at pakono inawan mo. Ki an maynamot do kapanganohed mwaya, sīgod ko na chapatak a mayit. 3 Taywaraw kasoyot ko do nakawara daw dya no kadwan saw a kakakteh ta a yapo dyimo, ta pinaneknekan daw kanāw mo do oyod a nanawo kan nāw mo kono a maybibyay do oyodaya. 4 Abaw makaitoroh dyaken so rakorakoh pa a soyot, an dya iyaw nakadāmag kwaw a siraw naibidangaw a anak ko, ki maybibyay sa do oyod a nanawo.
No Kaipadāyaw ni Gayo
5 Imo a chadaw kwa sīt, oyod a maganay ka a mangrispitar dyirad kakakteh saw a mangaskasaba a naginbirna do yanan nyo. On, aran istranghiro sa dyimo, maganay ka kono a somidong. 6 Inpakatoneng da pa dyirad manganohedaw do iglisya do dya maynamot do adaw mo dyira. An mirwa sa maginbirna, parobwatan mo pa sa tan myan dyira tabo machita da do katongtong da so kapagbyahi da.†6 Tito 3:13 On, torohan mo sa so sidong a akmay Dyos panorohan mo. 7 Ta an sira, ki nangay sa a mangaskasaba a maynamot di Āpo Jesos, ki dadakay daba rawaten aran āngo a sidong dyirad dya manganohed. 8 Dawa, rebbeng ta pakono a manganohed somidong dyirad dyaya a tawo tan mairāman tad kaipakatonengaya no oyod a nanawo.
Sa Diotrepes kan Demetrio
9 Naytolas ako na dyirad manganohed saw daw, ki alit na inkaskāso naba yaken ni Diotrepes, ta bigbigen nabaw toray ko. No lang chakey na, ki iya danaw pangōlo nyo. 10 Dawa, anchan mangay ako dyinyo, pahtoten konchya tabo pariparinen naya kan kaparaherahet naya dyamen. Nawri aba lang, ta imbes a rispitaren na saw magbyahyaya a kakakteh ta, ki enggaya, ta baywan na pa sayaw makeyaw a mangrawat sira, as kan padāsen na pa saya a pahboten do iglisya nyo an parinen daw komwan.
11 Chadaw kwa sīt, tahatahan mwabaw marahet, basbāli a tahatahan mo maganay, ta anak no Dyos aran sino a mamarin so maganay. No mamarin so marahet, abaw chapatak na maynamot do Dyos.
12 Ki si Demetrio, maynana maganay dāmag dan manganohed a maynamot dya. Iyaw no kabibyay naw, ki mangipaneknek pa so maynamot dya a nāw na monot do oyod a nanawo. On, aran yamen, ki paneknekan namen, kan masigorādo mo a oyod ibahebahey namenaw.
No Kapanawdyan a Pakatoneng
13 Āro payaw chakey ko a ibahey dyinyo, ki itolas kwaba dyinyo sichangori do papil kan tinta. 14 On, hahawen kwaya mahay pabaw kapayboboya ta, as kan makapagsasarīta tanchi do rōpanrōpa.
15 Myan pakono dyimo kaydamnayan no kapangtokto. Pakomostaan daw imo no tabo sīt mo saya dya, as komwan tayisahen mo sanchi a pakomostaan sīt ta saw daw.