1 Iyaw nya tolas, ki yapo dyaken a si Jodas a kakteh ni Santiago kan asa adīpen ni Āpo Jeso-Kristo, kan mangay dyinyo a tinawagan no Dyos Ama a mayparin a tawotawo na. On, inyo danaw chadaw no Dyos, kan aywanan naynyo a mandanchan kapaybidi ni Āpo Jeso-Kristo.

2 Sichangori, maypaypangay pakono a myan dyinyo iyaw maboslon a kāsi, kapya, kan adaw a yapo do Dyos.

3 Chadaw kwa kakakteh, myan panggep ko a maytolas dyinyo maynamot do pakaisalakānan taya di Kristo, ki tinongtong kwaba. Ki sichangori, napilitan ako a naytolas dyinyo, ta masisīta bagbagaan koynyo a nāw nyo a onotan kan aywanan a maganay iyaw kapanganohedaya a intalek ni Āpo Dyos dyaten a tawotawo na. On, intalek ni Āpo Dyos nyaya dyirad tawotawo na, as kan polos a dya matādyan nya. 4 Ta natwatonngan nyo aba a myan dana dyinyo sichangori siraw dya mamo do Dyos a sililimed a makasdep do yanan nyo. Siraw nya saya a mabayataw a tawo, ki dyido sawen kapanganohed da, as kan baliwan daw no oyod a nanawo. Maddi sa, ta ibahey da a marahet kono aba an parinen nyo aran āngo a klasi a kinaderrep, ta alit na māsisyen no Dyos a mangpakawan so tawotawo do gatos. Asa pa, ki dayāwen dabaw no oyod a maynamot di Jeso-Kristo a maychatanyi a Āpo ta a pagsīrbyan ta. No dōsa da, ayket, am-āmang dana naikeddeng do Masantwan a Tolas.*4 2 Ped. 2:1

5 Sichangori, aran sīgod a chapatak nyo naw nya saya, ki alit na chakey ko a ipanakem dyinyo iyaw no nakapagdōsaw no Dyos†5 Do kadwan saw a adan a kopya no nya tolas, binata na, “Āpo Jesos”. dyirad nakagatosaw kaychowa. Sigorādohen ko a nanakem nyo a do katayoka ni Āpo Dyos a nangisalākan siras Israelita saw do panakabalin no āryaw do Egipto, ki alit na diniman na saw āro dyira do dyi daw a panganohdan do bilin naw dyira.‡5 1 Kor. 10:1-5 6 As komwan naknakmen nyo saw no anghilis saw a naygatos do panman syan araw do kadyi daw a kapnekan do katoray daw a intoroh no Dyos dyira, as kinarwan daw nairantaw a yanan da. Dawa, maynamot do dyaya, kinawaran na san Āpo Dyos so kawar a dya polos a mapakaro, as kan pinosek na sa do kasarisaryan a pamahodan a pangnanayan das arawaw no kapangokom no Dyos.§6 2 Ped. 2:4 7 Manakem nyo pa a masaw naparinaw dyirad tawotawo saw do syodadaw a Sodoma kan do Gomorra kan siraw myanaw a idiidi do omdibon daw, ta malit gatos daw kan siraw anghilis saw do kapaychakatekateh daw do dya maipalōbos a asi. Dawa, sinosohan na sa ni Āpo Dyos. Nyaw pakaballāagan ta a masyirto a madōsa sa do abos pandan a apoy siraw dya manganohed do Dyos.*7 Gen. 19; Deot. 29:23. Myan saw makabata a kinaoknod dan anghil saw mabakes saw do lōbongaya. Gen. 6:2-4; 2 Ped. 2:4

8 Ki siraw nya mabayataw a mamaistro, ki kapayngay da sa, ta kayarig daw makaychehaw a maytaytayēnep. Nawri lang tongtongpalen da iyaw tinaytayēnep daw a pangabsobsoy so inawan da do malapos kan makabābaba a kaparin da. Itoltoleng da paw no aran sino a myan so toray, as kan maychirin sa pa so marahet dyirad anghilis saw do hanyit. 9 Ki chiban nyo pinarin ni Migel iyaw katotorayanaw a anghil. Do nakapaydiman daw kan Satanas maynamot do bangkayaw ni Moyses, naitored aba ni Migel naychirin so marahet dya. No inbahey na lang ki, “Si Āpo Dyos pakono makatoneng a mangahoya dyimo.” 10 Ki siraw nya tawotawo a mangnanawo so bayataw, makospag sa a mangoyaw so dyi daw a maawātan. Kan akma saw masawek a binyay a abos aktokto, ta nawriw maawātan daw chakeyaw no inawan da. Dawa, nyaw pakayapwan pakarārayawan da. 11 Kapakāsi da pa, ta naokom dana sa! Ta naybibyay sa a akmas marahetaw a dadakay ni simna Kain kaychowa,†11 Gen. 4:1-8; 1 Jn. 3:12 kan naygatos sa a akmas kakōsitaw ni Balaam a maynamot do āgom da do kwarta.‡11 Nom. 22-24; 31:16; 2 Ped. 2:15-16 Asa pa, machikontra sa do Dyos a akmas simna Kore a asa nagribīldi kaychowa do chimpon Moyses. Dawa, komwan anchiw kadōsa da akmas kadōsaw ni Kore.§11 Nom. 16:1-35 12 Ta do kapachihanghang da dyinyo do kāda komonyon nyo, ki kayarig daw mancha a mangrārayaw so pintas kan linis no binasan.*12 2 Ped. 2:13 Aysa! Makasnesnek nawri, ta mamo saba do Dyos do kasaraw da kan kaynom da! Nawri lang iktokto daw kapagbokatot no mismo a inawan da. Kayarig daw demdem saya a tod a pasoysoysoyen salawsaw a abos chimoy.†12 2 Ped. 2:17 Mana kayarig daw kayowaw a dya makapay-asi do kosto a ōras mana chimpo a may-asi, mana iyaw kayowaw a nahoto dana a nabagot. 13 On, akma pa sa so rarakohaw a abkas a dya makasakasayid a homabohabotab a maynamot do kapirmi da mamarin so makasnesnek kan malapos. Mapagtalkan saba a akma siras layapaw a dya monot do naikeddengaw a ayaman da. As dawa, insagāna danan Dyos iyaw no kasarisaryan a yanan da a bahodan a abos pandan.

14 Myan inpadto kaychowa ni simna Enok, iyaw chanem naw a kapotōtan a yapo do Adan. Inpadto na a maynamot dyira a kāna, “Chiban nyo! Mangay anchi si Āpo kan siraw riborībo saw a anghilis na 15 tan okomen na saw tabo tawotawo. On, okomen na saw tabo a dya mangbigbig so Dyos a maynamot do tabo marahet kan dya madyosan a pinarin da, as kan maynamot do tabo marahet a chirin da a kapachikontra do Dyos.” Nawriw inpadto ni simna Enok a maynamot dyirad dyi saw a nadyosan a tawotawo. 16 Siraw nya tawotawo, ki maganay sa a maydabadabay kan mapagatos, as kan mapnek saba do chakeyaw no inawan. Ipangas daw mismo a inawan da, as kan mangpasablog sa tan mahap daw chakey da.

17 Ki inyo a chadaw ko a sīt, naknakmen nyo inbahey daw no apostolis saw ni Āpo Jesos. 18 Binata da dyinyo a kon da, “Do kapanawdyan saw a araw, ki myan sanchiw mangay a mangoy-oyaw a tawotawo a mononot lang do marahet a chalakam no inawan da.”‡18 1 Tim. 4:1; 2 Tim. 3:1-5; 2 Ped. 3:3 19 Siraw nyaw tawowaw a pakayapwan kapaysisyay nyo, tod sa mononot do bōkod da a kapangtokto a nainlōbongan, ta aba dyiraw Ispirito Santo.

20 Ki inyo a chadaw kwa sīt, payiten nyo kapanganohed dan rārayay nyo do kaipasnek nyo a manginanawo so masantwanaya a kapanganohed ta. Kan maynamot do kapawnonot no Ispirito Santo dyinyo, ipasnek nyo pakono kapaydasal nyo do Dyos.§20 Roma 8:26 21 Paaywan nyo katakatayisa dyinyo do adaw no Dyos do kayayan nyo paya mangnanaya so kāsyaw ni Āpo Jeso-Kristo a mangay anchi a manoroh dyaten so byay ta a abos pandan.

22 Chāsi nyo kan sidongan nyo saw kadwan dyinyo a magmangamanga do kapanganohed. 23 Ahwahoken nyo sa a paybidyen kadwan saw a maychawaw do kapanganohed. Ta an komwan parinen nyo, kayarig na a alneten nyo sa a isalākan do apoy. As maynamot dyirad mamarinaw so marahet, ki chāsi nyo sa, ki siaannad kamo ah! Ta aran myan kāsi nyo, ki alit na ipsok nyo karahet daw. On, kayarig daw mangmanchaw a kayo. Dawa, ihawa nyo tan dyi kamo a mamanchaan.

24 Changori, kakakteh ko, madaydāyaw pakono Dyos, ta iya lang myan so panakabalin a mangaywan dyinyo do solisog saya a pakachichadan nyo. Iya lang maparin a mapakaro so tabo a gatos ta tan maparin nanchi yaten a patēneken do salapen na do hanyit a sidadalos kan siraragsak.*24 Roma 14:4; Ep. 3:20 25 Iyaw moyboh a Dyos ta a Mangisalākan ta a maynamot di Jeso-Kristo a Āpo ta. On, madaydāyaw pakono si Āpo Dyos, iyaw myan so dāyaw, katan-ok, panakabalin, kan toray yapo do kaychowa, changori, kan abos pandan! Amen.†25 1 Tim. 1:17