12
1 Naknakmen mo Namarswa mo
do araw sa a kapaychakatobo mo,
sakbay*12:1 Tabo naitolas a “sakbay,” ki maparin a pangārig no byay mana do inawan no magtotobo anchan malkem dana. no araw sa a kangay no riribok
kan do kapaypasngen dan tawen a batahen monchi a,
“Apabayaw masarakan ko a ragsak dyira.’’
2 Naknakmen mo iya sakbay no araw kan sēdang
kan bohan kan bitohen sa a maysāri,
kan makonem a mirwa do katayoka no chimoy,
3 sakbay a maychamirpirpir siraw mangbanbantay no bahay,
kan maydodokot siraw mayiyit a mahahakay,
sakbay a magsardeng siraw manggiling, ta papere dana sa,
kan siraw maylalawong saw do bintan, ki maybohahaw danaw kapanyideb da.
4 Naknakmen mo iya a sakbay a manban siraw anebaw do kalkalsāda,
kan mawsosep danaw tīmek no kapanggiling,
kan matarimbāngon tawo do ōni no manomanok
kan sakbay a siraw kansyon da, ki tod dana ngedngey.
5 Naknakmen mo iya sakbay a mamo ka dyirad matohos a yanan
kan maamak do kadilikādo no kalkalsada,
sakbay a may-oban ka akma siras sabsabong no kayo a almendras,
kan mangiyoy-oyas so inawan mo akmay kabaga,
kan apabaw akakey mo.
Ta no tawo, lomongo dana do manawdyi a sabatan na,
as siraw magdongdong-aw mangay do kalkalsada.
6 Naknakmen mo iya sakbay a mabitos hobid a pirak
mana marārayaw sabakaw a balitok,
sakbay a mapsapsaw angang do oksong,
mana marārayaw moton do bobon
7 kan iyaw no ahbek, ki maybidi do tana a nakayapwan na,
kan iyaw ispirito, ki maybidi do Dyos a nanoroh sya.
8 “Abos sinpaspangan! Abos sinpaspangan!’’ kāna no Mangnanawowaw.
“Tābo, ki abos sinpaspangan!’’
No Paytābwan Na
9 Otro do kasīrib no Mangnanawowaw, nangibīngay pa so kapakatoneng do tawotawo. Inamīris na kan chinichwas na kan inornos na saw āro a panyinyirin. 10 Iyaw Mangnanawowaw, ki chinichwas na saw omno saw a chirin, as kan no intolas na, ki siraw kostwaw kan oyod.
11 Siraw chirin no masīrib, ki akma siras mataremaw a kayo a pangābog no magpaspastor so bāka. As siraw nakpeh saw a panyinyirin, ki akma siras lansa a nailansa a naipinsan. Tabo nyaya, ki intoroh ni Āpo Dyos a maganay a pastor. 12 Anak ko, ballaāgan koymo a anadan mo aran āngo a maparapa do dya saya. Ta machipanda aba no kapaytolas so āro a libro. As no sobra a kapagādal, ki payhohopagan no inawan.
13 Katayoka no nakadngey mo siras nya tabo,
nyaw manawdyi a maibahey ko:
Anyiben mo Dyos kan tongpalen mo saw bilbilin na,
ta nyaw golpi a rebbengen no tawo.
14 Ta no Dyos, ki okomen nanchi a tābo kaparin ta,
magrāman tābo a malīmed a maganay mana marahet a pinarin ta.
*12:1 12:1 Tabo naitolas a “sakbay,” ki maparin a pangārig no byay mana do inawan no magtotobo anchan malkem dana.