No Kapapatgan A Kanta
No Pakatonngan so Paytābwan no Nya Tolas
Nya libro a Kanta ni Solomon, ki daniw nya a kanta a maynamot do kapangadaw, kapagarem, kan kapaychabahay. No kārwan a naitolas, ki iyaw kapagsarsarīta da no barwaw kan balāsangaw. An kadwan, ki matwatobay sa kan sīt da saw. No kanta daya, ki ipaboya naw kapintas kan kasoyot no kapaysin-adaw dan mahakay kan mabakes.
No kanta aya a maynamot do mahakay kan mabakes, ki masanyib a ibidang dan Jodyo a ladāwan no masinged a kapayasngen no Dyos kan tawotawo na. As siraw manganohedaw di Kristo, ki batahen da a ladāwan no kasinged no kapayasngen ni Kristo kan tawotawo na a iyaw Iglisya.
Naychakarwan no Nya Libro
No manōma a daniw (1:1-2:7)
No chadadwa a daniw (2:8-3:5)
No chatatdo a daniw (3:6-5:1)
No chapat a daniw (5:2-6:3)
No chadima a daniw (6:4-8:4)
No chanem a daniw (8:5-14)
No Kapapatgan a Kanta
1
1 Nyaw kapapatgan a kanta ni Solomon a maynamot do kapangadaw.
No Manōma a Daniw
Iyaw Nobya di Chadaw Na a Baro
2 “Dadadek mo pakono yaken a yapo do dadek no bibi mo.
Ta no adaw mo, ki masdesdep kan palek.
3 Makaay-āyo banglo no bangbanglo mo.
No ngaran mo, ki akmay bangbanglo a napado.
Dawa sawen a no babbalāsang, ki chadaw daymo!
4 Ahapen mo yaken a machangay dyimo. Alisto ta!
Yangay mo na yaken do kwarto mo, imo a āri ko.”
Siraw Babbalāsang di Baro
“Charagsak kan chasoyot namen imo.
Idāyaw namen adaw mo mangamangay pa kan palek.”
Iyaw Nobya di Chadaw Na a Baro
“Ayso kakosto no kadāyaw da dyimo!”
Iyaw Nobya dyirad Babbalāsang a Sīt Da
5 “Inyo a babbalāsang a taga Jerosalem,
mabaheng ako, ki mapintas ako.
On, mabaheng ako a akma siras tolda no Kedar,*1:5 Kedar, ki asa trībo dyirad Ismaelita do Arabya. Gen. 25:13; Sal. 120:5; Isa. 21:16-17. Nagtolda sa do mabaheng a tolda a naparin do mabaheng a lālat no kalding. Eks. 26:7-13
kan akma siras kortina no tolda ni Solomon.
6 Molagātan nyo aba yaken maynamot do nakapanyibaheng ko,
ta pinanyibaheng na yaken no araw.
Siraw babbarwaw ni ānang ko, ki chinahoya da yaken,
kan pinangaywan da yaken siras kaobāsan.
Dawa, nainonolay ko iyaw mismo a kaobāsan ko.”
Iyaw Nobya di Chadaw Na a Baro
7 “Imo a chadaw ko, ibahey mo pa dyaken an dino pagpaarāban mos arban mwaw
kan dino pamabongan mo siras karniro mo an mayegen araw.
Āngo ta akmakoy nakaabōngot a mabakes
do yanan dan arban dan sīt mo?”
Iyaw Baro di Ipatpateg Na a Nobya
8 “Imom a kapipintasan a mabakes, an oyod a dyi mo a chapatak,
ki onotan mo takad da saw no karniro,
kan pagarāben mo saw orbon saw a kalding mo
do masngenaw dyirad tolda dan magpaspastor.
9 Itaha koymom Ipatpateg ko do mabinayi a kabalyo
a myan dyirad kabalyo a manggoyod so logan saw ni Āri Paraon.
10 Siraw pisnyi mo, ki pinapintas dan arītos,
as komwan lagaw mo do sāryo a alāhas.
11 Pamarin namen imo so arītos a balitok
a mapalpaltekan so pirak.”
Iyaw Nobya di Chadaw Na a Baro
12 Ranan kapaylaylalānet ni āri do manaro a paydisnan na,
no bangbanglo ko, ki magwaras angot na.
13 Si Chadaw ko a nobyo, ki akmay mabanglo a mirra do dēkey a sopot
do payawan dan soso ko.
14 Itaha ko si Chadaw ko do maypoypong a bosak no henna†1:14 Henna, ki asa kīta no dēkey a kayo a maosar a parinen a bangbanglo. Siraw maydakaw a sabong, ki myan banglo da a akmay rosas, kan maosar a pamanyibaya so boboh, koko, kan kakamay.
a yapo dyirad kaobāsan do En-gedi.‡1:14 En-gedi, ki asa logar do abagātan a dayāen no Jerosalem do laōden a aptan no Nadiman a Tāw. Dawri, myan maraboy a kayokayo kan ranom, ki let-ang do omdibon.
Iyaw Baro di Ipatpateg Na a Nobya
15 “Ay, āngo a kapintas mom Ipatpateg ko!
Ay, āngo a kapintas mo! Siraw mata mo akmay boyit.”
Iyaw Nobya di Chadaw Na a Baro
16 “Ay āngo a kagwapo mom Chadaw ko!
Makahwahok kaya taywara dyaken!
No maraboy a katamtamkan, ki akmay katri ta.
17 No wanan no bahay ta, ki sidro a kayo,
as no balatbat na, ki aroo a kayo.”
*1:5 1:5 Kedar, ki asa trībo dyirad Ismaelita do Arabya. Gen. 25:13; Sal. 120:5; Isa. 21:16-17. Nagtolda sa do mabaheng a tolda a naparin do mabaheng a lālat no kalding. Eks. 26:7-13
†1:14 1:14 Henna, ki asa kīta no dēkey a kayo a maosar a parinen a bangbanglo. Siraw maydakaw a sabong, ki myan banglo da a akmay rosas, kan maosar a pamanyibaya so boboh, koko, kan kakamay.
‡1:14 1:14 En-gedi, ki asa logar do abagātan a dayāen no Jerosalem do laōden a aptan no Nadiman a Tāw. Dawri, myan maraboy a kayokayo kan ranom, ki let-ang do omdibon.