1 Do chatatdo naw a kabohan no katayokan nakakaro daw no Israelitaw do Egipto, do dāwri a araw, nakarapit sa do let-ang no Sinai. 2 Nakatayoka no nakakaro daw do Repidim, nawara sa do let-ang no Sinai, as kan dawriw nagkampwan dan Israelita saw iyaw let-angaw a somalap do tokonaw.

3 Sinpangan na, komnayat si Moyses do tokonaw a machibayat di Āpo Dyos. Do dāwri, tinawagan ni ĀPO si Moyses a yapo do anmwaw no tokonaw, kan binata na dya a kāna, “Nyaw ibahey mo dyirad tawotawo saw no Israel a siraw kapotōtan ni Jakob, 4 ‘Mismo nyo a naboyaw pinarin kwaw dyirad taga Egipto saw, kan an maypāngo nakaikaro ko dyinyo a akmas kaisayapaw no agila siras anak na. On, pinarin ko nya tan iyangay koynyo do salapen ko. 5 Sichangori, an oyod a ikāso nyo yaken kan tongpalen nyo tōlag kwaya dyinyo, inyo dananchiw maitatārek a tawotawo ko dyirad tabo tawotawo do intīro a tana. Aran dyaken intīro a tana, 6 inyonchiw magsirsīrbi dyaken a papādi ko,*19:6 1 Pet 2:5, 9; Pal. 1:6; 5:10; 20:6 kan mayparin kamonchi a masantwan a nasyon.’ Siraw nyaw ibahey mo dyirad Israelita saya.”

7 Dawa, naybidi si Moyses, as nakatawag na siras panglakayen saw, as kan binata na tabo dyiraw inpaibilinaw ni ĀPO a inchirin na. 8 As siraw tabo tawotawo saw, nāsa sa a nangatbay sya a kon da, “Parinen namen anchi a tabo naibahey ni ĀPO.” Inpadāmag ni Moyses nya a atbay da di ĀPO.

9 Binata ni ĀPO di Moyses a kāna, “Mangay akonchi dyimo do matokpoh a demdem tan madngey dan tawotawo sayaw kapachisarsarīta ko dyimo kan tan nāw darananchi imo a anohdan.” Do dāwri, inbahey ni Moyses di ĀPO binata daw no tawotawo saw.

10 Ki binata ni ĀPO di Moyses a kāna, “Mangay ka dyirad tawotawo saya, kan itatārek mo sa a para dyaken sicharaw kan an delak a para do kapagdaydāyaw. Paybasabasahen mo sa so laylay da, 11 kan sisasāgana sanchi anchan asa karaw, ta do dāwrinchi a araw, gomchin akonchi a mangay do Tokon a Sinai do pakaboyan da no tabo tawotawo. 12 Ki mapangay kas pachipandan dan tawotawo saw do omdibonaw no tokon, kan ibahey mo dyira a kon mo, ‘Magannad kamo a dya somonget mana mangsalid so tokaranaw no tokon. Aran sino a makasalid so tokonaw, sigorādo a maipadiman. 13 Syirto a maobor mana mapana. Abaw aran tanoro a makasalid so nakasalidaw so tokon. Aran binyay mana tawo, mapalobōsan aba mabyay.’ Ki anchan alopan danchiw trompīta so maypisa kan ipāot daw ōni naw, nawri dananchiw kaparin dan tawotawo saya a maypasngen do tokaranaw no tokonaya.”

14 Nakatayoka no nakawsokaw ni Moyses a yapo do tokonaw a nangay dyirad tawotawowaw, intatārek na saw tawotawo saw para di ĀPO do kapagdaydāyaw da, kan naybasabasa sa so laylay da. 15 Sinpangan na, binata na dyirad tawotawo saw a kāna, “Isagāna nyo inawan nyo para do chatatdo naw a araw. Hātan nyo paw machoknod.”

16 Do kamabekasanaw no chatatdo naw a araw, nayēdey kan nagkimat a nachirayayan matokpoh a demdem do tōtokaw no tokon, kan taywara so kalyak a ōni no trompīta. Tabo tawotawo a myan do kampo, ki namirpir sa do kāmo da. 17 Do dāwri, inpangōlwan sa ni Moyses tawotawo saw a minohtot do kampo daw a mangay a machibayat di Āpo Dyos, kan naytēnek sa do tokaranaw no tokon. 18 Nataloban intīrwaw a Tokon a Sinai so ahob, ta naypabodis si ĀPO do tokonaw a napongosan do apoy. Iyaw ahobaw a maypatohos a yapo do tokonaw, ki matokpoh a akmay ahob no nasosohan a kabyawowan. As no intīro a tokon, ki taywara a nagon-gon. 19 As iyaw ōnyaw no trompīta, ki naypaypalyak. Sinpangan na, naychirin si Moyses, kan inatbay ni Āpo Dyos do adey.

20 Naypabodis si ĀPO do tōtokaw no Tokon a Sinai, kan tinawagan na si Moyses a mangay do tohos. Dawa, somonget si Moyses. 21 Do dāwri, binata ni ĀPO dya a kāna, “Mosok ka kan yangay mo a ballaāgan saw tawotawo saya a dyi da hawahawayen a pilīten iyaw manyideb dyaken a ĀPO. An parinen da, āro dyiraw madiman. 22 Aran siraw papādi saw a gagāngay a maypasngen dyaken, machita a itatārek daw inawan da a para di ĀPO. An dyi da parinen, dosāen ko sa.”

23 Ki binata ni Moyses di ĀPO a kāna, “Somonget sabaw tawotawo saya do Tokonaya a Sinai, ta imo a mismo nangballāag dyamen a kon mo a ‘Mapangay ka so pachipandan do omdibonaya no tokon, kan itatārek a masantwan a para di ĀPO.’ ”

24 Tominbay si ĀPO a kāna, “Mosok ka, ta yangay mo a hapen si Aaron. Ki machita a dyi da hawahawayen a pilīten no papādi saw kan tawotawo saw iyaw mangay dyaken a ĀPO. An parinen da, dosāen ko sa.”

25 Dawa, minosok si Moyses dyirad tawotawo saw, kan inbahey na dyira.