1 Binata ni ĀPO di Moyses a kāna, 2 “Ibahey mo dyirad Israelita saya a magor-or sa so itoroh da dyaken. Rawaten mo or-or no kāda tawo sigon do sipopōswaw a manoroh. 3 Siraw nyaw or-or a rawaten mo a yapo dyira: balitok, pirak, kan tombāga; 4 mabondal a bolabola*25:4 Naparin a yapo do boboh no karniro. a matatarek so kīta a asol, obi kan mabaya, kan mapīno a tela; boboh no kalding; 5 lālat no malloko a karniro a napanyibaya; lālat no lombalomba;†25:5 Iyaw lombalomba, ki yapo do Mabaya a Tāw. Do kadwan a naiyōlog, ki “lālat no kalding”. kayo no akasya; 6 lana no olibo a para dyirad paysohwan saw; bangbanglo a mailaok do lanaw a mangpasanto‡25:6 No lana, ki maosar a mangpasanto so tolda mana tabirnakolo kan siraw papādi. Eks. 29:7; 30:23-25 kan para do mabanglo a insinso, 7 mapapateg saw a bato a onyks§25:7 Do kadwan a naiyōlog, ki “bato a karnelya”. kan kadwan pa saw a masileng a bato a mapangay do laylayaw no matohosaw a pādi a mayngaran so epod*25:7 Eks. 28:4 kan do pangbarōkong naw.

8 “As mapaparin ka dyira so masantwan a pagyanan a para dyaken tan machiyan ako dyira. 9 On, parinen daw nya tabirnakolo kan tabo a rimīnta na a eksakto sigon do plastar a ipaboya konchi dyimo.”

10 “Mapaparin ka so lakāsan a yapo do kayo a akasya. No kanaro na, ki tatdo a kadapan kan sasyam a kapolgāda, as dadwa a kadapan kan tatdo a kapolgāda so kawbong, kan dadwa a kadapan kan tatdo a kapolgāda so kakarang. 11 Makalopkopan so pōro a balitok do irahem kan do hapot, as kan malebleban so dikorasyon a balitok. 12 Mapachīpo ka so apat a sinan singsing a balitok, as maiparaot sa do apataw a kokod na. Bāli, dadwa a sinan singsing do maychamībit naw. 13 Sinpangan na, mapaparin ka so iisiw sa a yapo do kayo a akasya, kan mapakalopkopan sa so balitok. 14 Mapaōsok sa do sinan singsing saw do maychamībit naw no lakāsanaw tan pangisiwan. 15 Machita a mabdibdis sabaw iisiw saya do nakaiyosōkan daya a maybīt. 16 Sinpangan na, maposek do lakāsanaya iyaw dadwaw a matatāpi a bato a nakaitolasan dan bilbilin saw†25:16 Eks. 24:12; 31:18; Deut 4:13; 9:9 a itoroh konchi dyimo.

17 “Mapaparin ka pa so tohong no pachipakawanan so gatos‡25:17 Mana “disnan no kāsi” a yanan a pakapakawanan gatos. Heb. 9:5 a pōro a balitok. As no kanaro na, ki tatdo a kadapan kan sasyam a kapolgāda, kan dadwa a kadapan kan tatdo a kapolgāda so kawbong. 18 As mapaparin ka so dadwa a nachīpo a balitok a sinan parswa a naypanyid,§25:18 Do chirin Hebreo, ki “cherobim.” No asa, ki “kerob.” An nasorok asa, ki “cherobim”. Gen. 3:24 as mapaybīt sa do maybītaw a tobwan no tohong naw. 19 Bāli, maymorong sa a lānang do tohong naw. 20 Siraw panyid daw, ki bolayen da a maypatohos tan abongan daw tohong naw. Paysalapan da a chiban tohong naw. 21 Kolongen mo saw dadwaw a matatāpi a bato a itoroh konchi dyimo do lakāsanaw, as kaipatohong mo sya. 22 Dawrinchi, do tohos no tohong no lakāsanaw, do payawan daw no dadwaw a parswa a myan do hapotaw no lakāsan, bayaten konchimo, kan itoroh konchi dyimo tabo bilbilin ko a para dyirad Israelita saya.”

23 “Mapaparin ka pa so lamisaan a yapo do kayo a akasya. As no kanaro na, ki tatdo a kadapan, asa kan godwa a kadapan so kawbong, kan dadwa a kadapan kan tatdo a kapolgāda so kakarang. 24 Mapakalopkopan so pōro a balitok, as kan malebleban so dikorasyon a balitok do maynyopos naw. 25 Malebleban so tatdo a kapolgāda so kawbong a maynyopos, kan mabarikīsan so dikorasyon a balitok. 26 Mapaparin ka so apat a sinan singsing a balitok a para do lamisaanaw, as maiparaot sa do apataw a sōli na do yananaw no kokod na. 27 Siraw sinan singing saw, ki mapangay sa do masngenaw do lebleb naw a pachiosōkan iisiw saw. 28 Mapaparin ka so iisiw a yapo do kayo a akasya, as mapakalopkopan sa so balitok, as kan nawrinchiw maosar a pangisiw so lamisaanaw. 29 Mapaparin ka so tatakan sa kan bāso a yapo do pōro a balitok, as kan pronggo sa kan sabak sa a maosar anchi para do kapado so maidāton. 30 Mapadatōkan lamisaanaya so tināpay a maidāton dyaken*25:30 Do chirin Hebreo, ki “tināpay (a maidasar) do Salapen (di ĀPO)”. Eks. 39:36; 40:23; Leb. 24:5-9 tan nāw na daw do salapen ko.”

31 “Mapaparin ka pa so pamadatōkan so soho a yapo do machīpo a pōro a balitok. Mapaparin ka pa so lānang a disnan na, atngeh na, bāso na sa a akmay sabong, bōsel na sa, kan bosak na sa do pamadatōkanaw so soho. 32 Anem a sanga na. Bāli, taytotdo do maybīt naw. 33 Kāda asa do anemaw a sanga, ki myan tatdo a magsasarono a bāso na a mapōtar akmas sabongaw no almendras†25:33 Gen. 43:11 a myan sas bōsel kan bosak. 34 Iyaw atngeh naw, ki myan magsasarono a apat a bāso a mapōtar akmas sabongaw no almendras a myan sas bōsel kan bosak. 35 Myan asa bōsel do ibaba no kāda asa dyirad tatdwaw a kaparis a sangasanga na. 36 Siraw bōselaw, sangasanga saw, kan pamadatōkanaw so soho, ki lānang sa a maparin do machīpo a pōro a balitok.

37 “Sinpangan na, mapaparin ka pa so papito a soho, as kapangay mo sira do pamadatōkanaw so soho tan ranyagan daw salapenaw. 38 Siraw panopit saw so pabīlo kan pangayan saw so oreb, ki machita maparin pa do pōro a balitok. 39 Iyaw pamadatōkanaya so soho kontodo tabo a rimīnta na, ki machita a maparin do tatdo a poho kan dadima kakīlo a pōro a balitok. 40 Chiban mo ipaparin mo saw a maganay sigon do plastaraw a naipaboya dyimo do dya tokon.”