1 Binata pa ni ĀPO di Moyses a kāna, “Mapaparin ka so tabirnakolo a tolda. As myan so asa poho a kortina a mapīno a tela kan mabondal a bolabola a matatarek so kīta a asol, obi kan mabaya. Mapabordaan sa so sinan parswa a naypanyid dyirad sanay saw.*26:1Eks. 25:18 2 Machita paripariho rokod dan tabo kortina a asa poho kan apat a kayarda so kananaro kan dadwa kayarda so kawobong. 3 Mapagsasāip saw dadimaw a kortina a payparinen a asa manaro a kapidāso. As komwan met maparin do dadimaw a kortina. 4 Mapaparin ka so pamaosōkan saw a asol a tela a mapaonor do payis naw no tobwan no nasāipaw a kortina do manōmaw a pidāso. 5 Mapaparin ka so dadima poho a pamaosōkan a para do asaw a kapidāso a kortina. As komwan met do somaronwaw a pidāso, as kan mapaysalap saw pamaosōkanaw. 6 Mapaparin ka pa so dadima poho a sasadyit a balitok, kan maosar sa a pamaytapang so dadwaya napagsasāip a kortina a manglikmot so tabirnakolwaya a mapayparin sya a asa.

7 “Mapaparin ka pa so asa poho kan asa panalob a kortina so tabirnakolwaw a naparin do boboh no kalding. 8 Kāda asa dyirad dyaya a asa poho kan asa, ki paripariho rokod da. On, kāda asa, ki asa poho kan dadima kayarda so kananaro kan dadwa a kayarda so kawobong. 9 Mapagsasāip saw dadimaw a kortina a payparinen a asa manaro a kapidāso. As komwan met do anem saw, ki mapayparin sa a asa kapidāso. Mapaytopid chanem naw a kortina tan maytapid a mapangay anchi do asdepanaw do toldaw. 10 Mapaparin ka pa so dadima poho a pamaosōkan a mapaonor do payisaw no tobwan no nasāipaw a kortina do manōmaw a pidāso. As komwan met do asaw a pidāso. 11 Sinpangan na, mapaparin ka pa so dadima poho a sasadyit a tombāga, as mapaōsok do pamaosōkan saw tan maytapang saw dadwaya pidāso a mayparin a asa. 12 Iyaw sobraw do kanarwanaw no kortina, machibalaybay dananchi do dichodaw no tabirnakolo. 13 Iyaw sobraw a godwa a kayarda do maychamibīt naw do kanarwan naw, ki mapabalaybay do payisaw no tabirnakolo tan nawriw mangtalob sya.

14 “Mapaparin ka pa so dadwa a panalob so tabirnakolwaya a yapo do lālat saw no malloko a karniro a napanyibaya kan mapakatayhapotan so lālat saw no lombalomba.†26:14 Do kadwan, naiyōlog so “lālat no kalding”.

15 “Mapaparin ka pa so parey sa a yapo do kayo a akasya a mapatnek a para do tabirnakolo. 16 Kāda parey, ki asa poho kan dadima kadapan so kananaro, kan dadwa poho kan papito a polgada so kawobong, 17 as kan myan dadwa mayengay a kokod na do kāda parey tan maimoha sa dyirad pangsapatos naw a mapaytatapang sira. Komwan met maparin do tabo kadwan saw a parey. 18 Mapaparin ka pa so dadwa poho a parey do mangketaw do abagātan no tabirnakolo, 19 kan apat a poho a pirak a pangsapatos. Taydodwa pangsapatos do kāda parey tan igpet naw dadwaw a kokod na. 20 Do bīt naw do mangket do ammyānan no tabirnakolo, mapaparin ka so dadwa poho a parey, 21 kan apat a poho a pirak a pangsapatos. Taydodwa pangsapatos do kāda parey. 22 Mapaparin ka pa so anem a parey do dichodan naw do mangket do lāod no tabirnakolwaw, 23 kan mapaparin ka pa so dadwa parey para do dadwaw a panōli na do dichodan. 24 Siraw nya dadwa a parey do sōli, ki magdobli sa yapo do ibaba a maypatohos, as maikapet a maganay do tohos a maynamot do asa sinan singsing. Siraw nya dadwa a parey do panōli, ki komwan kaparinan da. 25 Dawa, myan wawaho a parey kontodo asa poho kan anem a pirak a pangsapatos. Bāli, dadwa pangsapatos do kāda parey.

26 “Mapaparin ka pa so asa poho kan dadima sintas a yapo do kayo a akasya. No dadima, ki para dyirad pareyaw do asaw a bīt na no tabirnakolo. 27 No dadimaw, ki para do bīt naw, as kan dadimaw do mamanlāodaw do dichod no tabirnakolwaw. 28 Iyaw mamanghobokaw a sintas do hobok daw no parey, ki magderecho a mandad tobwan naw. 29 Mapakalopkopan saw pareyaw so balitok, kan mapaparin ka so sinan singsing a balitok a pakaikaptan dan sintas saw. Aran siraw balabat saw, ki pakalopkopan mo so balitok. 30 Maipapatnek tabirnakolwaw sigon do plānwaw, ta naipaboya dana dyimo do tokon.

31 “Mapaparin ka pa so kortina a maabel do mabondal a bolabola a matatarek so kīta a asol, obi, kan mabaya kan mapīno a tela. Mapabordaan sa so sinan parswa a naypanyid dyirad sanay saw. 32 Mapalōdyit kortinaw do sasadyit saw a balitok do apataw a parey a maparin do kayo a akasya. Makalopkopan sas balitok parey saya, kan mapatnek sa do apat saw a pirak a pangsapatos. 33 Mapalōdyit kortinaw do sasadyitaw, kan mapangay lakāsanaw no tōlag do dichodanaw no kortina. Iyaw kortinaw, mapaytawa so Masantwanaw a Yanan kan Kasasantwanaw a Yanan. 34 Mapadātok tohongaw no pachipakawanan so gatos do Lakāsanaw no Tōlag do Kasasantwanaw a Yanan. 35 Do gaganaw no Kasasantwanaw a Yanan, mapangay lamisaanaw do ammyānanaw no tabirnakolo. As mapangay pamadatōkanaw so soho do abagātanaw no tabirnakolo.

36 “Do asdepanaw do tabirnakolo, mapaparin ka so kortina a maparin do mabondal a bolabola a matatarek so kīta a asol, obi kan mabaya, kan mapīno a tela, as kan mabordaan do rinayit no rayem. 37 As mapaparin ka pa so para do dyaya a kortina so dadima parey a maparin do kayo a akasya a mapakalopkopan so balitok, kan mapangayan so balitok a sasadyit. Mapaparin ka pa so dadima tombāga a pangsapatos siras nya parey.”