1 Sinpangan na, binata ni ĀPO di Moyses a kāna, “Mapaparin ka so altar a yapo do akasya a kayo a paysosohan so insinso. 2 Machita a kwadrado a asa kan godwa a kadapan so kanaro, kan asa kan godwa a kadapan so kawbong, kan tatdo a kadapan so kakarang. Siraw sinan olongaw, ki lānang kan altaraw. 3 Makalopkopan so pōro a balitok do rabaw naw, mangdibon do payis naw, kan siraw sinan olongaw, as kan mabarikīsan so dikorasyon a balitok do maynyopos naw. 4 Mapaparin ka so dadwa a sinan singsing a balitok para do altaraw do ahbwaw no dikorasyon. Mapaybīt daw pamaosōkanaw siras iisiwaw a pangatkatan. 5 Mapaparin ka siras iisiw a yapo do kayo a akasya, as mapakalopkopan sa so balitok. 6 Ipapangay mo altaraw do gaganaw no kortina a somalap do Lakāsan no Tōlag, do salapen no tohongaw no pachipakawanan so gatos a myan do rabawaw no lakāsan. Dawrinchiw pachibayatan ko dyimo.

7 “Machita ni Aaron a sosohan mabanglwaw a insinso do altaraw do kāda mabekas do kangay na a mapaysonong siras sohwaw. 8 Machita a pirwahen narana a sosohan insinswaw do kapasdeb naw siras sohwaw do kapaysarisari. Iyaw insinswaw, ki nāw na masosohan do salapen ni ĀPO do īto a kapotōtan nyo. 9 Basta dya sosohan matarek a insinso mana dya sosohan aran āngo a dāton mana dāton a irek do dyaya altar, kan dya mapado so dāton a inomen.

10 “Machita a maypisa do asa a katawen a mangidāton si Aaron so dāton a para do pachipakawanan so gatos do sinan olong saw a pangdalos so altaraw. Nya kaparin do kāda tawen, ki machita parinen do raya no dāton no pachipakawanan so gatos,*30:10 Leb. 16:18-19 kan machita a parinen aran dyirad īto saw a kapotōtan nyo. Nya altar, ki taywara a masantwan di ĀPO.”

11 Sinpangan na, binata ni ĀPO di Moyses a kāna, 12 “Anchan magsinsos ka siras Israelitaw, kāda tawo, machita a magbwis di ĀPO a bāyad no byay na do kayan na masinsos. Tan komwan, mapisti saba anchan magsinsos ka. 13 Kāda tawo a masinsos, machita a bayādan naw godwa a sekel sigon do naikeddeng do pagtimbanganaw a naosar do masantwanaw a yanan.†30:13 No godwa a sekel, ki malābit anem a kagramo no pirak. Naosar daw pagtimbanganaw do masantwanaw a yanan, ta dawriw nangapyan da siras sekel. Iyaw nya, ki dāton di ĀPO. 14 Kāda tawo a masinsos, mangrogi do dadwa poho a katawen a maypatohos, machita a manoroh so dāton di ĀPO. 15 Iyaw mabaknang, manoroh aba so sobra. As no mapobryaw, ki kōrang abaw itoroh na. Iya lang godwaw a sekel, itoroh nyo a dāton di ĀPO anchan parinen nyo pachipakawanan so gatos no byay nyo. 16 Rawaten mo kwartaw a para pachipakawanan so gatos dyirad Israelitaw, as osaren mo para do sirbisyo do Toldaw a Pachibayabayatan. Nyaw pakanaknakman dan Israelitaw do salapen ni ĀPO a pachipakawanan so gatos nyo.”

17 Sinpangan na, binata ni ĀPO di Moyses a kāna, 18 “Mapaparin ka so tombāga a paylablaban kan tombāga a dadātok na. Mapay sa do payawan daw no Toldaw a Pachibayabayatan kan do altaraw, as mapayan so ranom. 19 Do dyayaw paylablaban da Aaron kan pōtot na saw a mahahakay so tanoro kan kokod da. 20 Kāda somdep sa do Toldaw a Pachibayabaytan mana do kapaypasngen da do altaraw a magsīrbi a maysosoh so dāton a para di ĀPO, machita a maylablab sa so ranomaw tan dyi sa madiman. 21 On, machita a lablaban daw tanoro kan kokod da tan dyi sa madiman. Nyaw manayon a pangeddeng a para da Aaron kan siraw kapotōtan na kan aran siraw īto pa a kapotōtan.”

22 Sinpangan na, binata ni ĀPO di Moyses a kāna, 23 “Mapahap ka so anem a kakīlo do kagaganayanaw a bangbanglo a mirra a maranom, tatdo a kakīlo a mabanglo a ‘cinnamon,’ tatdo a kakīlo a mabanglo a ‘cane,’ 24 kan anem a kakīlo a kodit no ‘cassia,’‡30:24 “Cane,” ki akmay byawo, kan “cassia,” ki asa kīta no kayo. sigon do naikeddeng a kīlo da. Rapan mo pa so apat a kalitro a lana a olibo. 25 Parinen mo saw nya a masantwan a lana a pangpasanto akmas tarabākwaw no mamariparin so bangbanglo. Masantwan anchiw nyaya lana a maosar a pangpasanto. 26 Osaren mo nya lana a pangpasanto so Toldaw a Pachibayabayatan a yanan no Lakāsanaw no Tōlag, 27 lamisaan kan tabo longlongan na, pamadatōkan so soho kan siraw rimīnta na, altaraw a paysosohan so insinso, 28 kan altaraw a paysosohan so dāton kan tabo rimīnta na, as kan paylablabanaw kan pachidatōkan naw. 29 Itatārek mo sa a para dyaken tan taywara a masanto sa, kan aran āngo a makasalid sira, masantwan anchi.

30 “Padwan mo so lana sa Aaron kan pōtot na saw a mahahakay, kan itatārek mo sa tan magsīrbi sa dyaken a pādi. 31 Ibahey mo dyirad Israelitaw, ‘Nyaw mayparin a masantwan a lana ko a pangpasanto a para dyirad īto a kapotōtan. 32 Padwan mo abaw inawan dan gagāngay a tawo, kan mamarin kamo aba so matarek a akmas nya a lana a machiyengay do dyaya. Masantwan nya, kan ibidang nyo a masantwan. 33 Aran sino a mamarin so bangbanglo a akma syay, kan aran sino a mapangay do matarek a dya pādi, ki machita a mapaksyat dyirad tawotawo na.’ ”

34 Sinpangan na, binata ni ĀPO di Moyses a kāna, “Mapahap ka siras bangbanglo a estakte, onycha, galbanom, kan pōro a prankinsinso. Siraw nya apat, ki machita a malit kāro da. 35 Parinen mo saw nya a mabanglo a insinso a nasagesagel a akmas tarabākwaw no mamariparin so bangbanglo. Asinan mo tan pōro kan masantwan. 36 Homhomken mo kadwan a manda do kakma naw kolbos, as kan payen mo nya do salapenaw no Lakāsan no Tōlag do irahem no Toldāw a Pachibayabayatan. Dawrinchiw pachibayatan ko dyimo. Ibidang mo nya a taywara a masantwan dyinyo. 37 Parinen nyo abaw aran āngo a insinso a akma syay a para do mismo a inawan nyo. Ibidang nyo a masantwan di ĀPO. 38 Aran sino a mamarin so akma syay a osaren na a bangbanglo, ki machita a mapaksyat dyirad tawotawo na.”