1 Sinpangan na, binata ni ĀPO di Moyses a kāna, 2 “Chiban mo. Pinidi ko si Besalel*31:2 No chakey na batahen Besalel, ki “do anyino no Dyos” mana “do kaaywan no Dyos”. An maynamot di āpong na, ki chiban nyo do Eks. 17:10; 24:14. a pōtot ni Ori a apoko ni Hor a yapo do trībo no Joda. 3 Inapno ko iya so Ispirito no Dyos, siglat, kabaelan, kan kapakatoneng do tabo kīta no kapangar-arti, 4 tan makaar-arti so mapipintas, kan kāya na a parinen do balitok, pirak, kan tombāga, 5 tan makapōtar kan makaikolimas so bato, makakitikit so kayo, kan tabo a kīta no ar-arti. 6 Pinidi ko pa si Oholiab a pōtot ni Ahisamak a yapo do trībo no Dan a kasidong ni Besalel. Masaw a tinorohan ko so siglat tabo magaganay saw a maytarabāko tan maparin da tabo inbilin ko dyimo a 7 akmas Toldaw a Pachibayabayatan di ĀPO, lakāsanaw no tōlag, kan iyaw tohong naw no pachipakawanan so gatos, as kan tabo warawaraw do toldaw. 8 Siraw mamarin so lamisaanaw kontodo warawara na saw, kan iyaw porwaw a balitok a pamadatōkan so soho kontodo warawara na saw, kan iyaw altaraw a yanan pangsosohan so insinso, 9 kan altaraw a yanan dāton a masosohan kontodo tabo warawara na, iyaw palangganaw kan pamadatokanaw sya, 10 kan aran sira paw maabel saw a laylay, pachiramānan dan masantwan saw a laylay a para di Aaron a pādi kan siraw laylay da saw no pōtot na saw do kapagsīrbi da a pādi. 11 Masaw lanaw a mangpasanto kan iyaw mabanglwaw a insinso a para do Masantwanaw a Yanan. Parinen da saw nya sigon do tābo a nakaibahey ko sya dyimo.”

12 Sinpangan na, binata ni ĀPO di Moyses a kāna, 13 “Ibahey mo dyirad tawotawo no Israel, ‘Machita ngilīnen nyo Araw a Kapaynaynahah, ta iyaw nyaw sinyal do nagbabaetan ta manda do tabo kapotōtan nyo tan matonngan nyo a yaken a ĀPO mangpasanto dyinyo. 14 Ngilīnen nyo Araw a Kapaynaynahah, ta masantwan nya dyinyo. Aran sino a tod na dyābat nya araw, machita a maipadiman. As aran sino a maytarabāko do dawri a araw, machita mapaksyat dyirad tawotawo na. 15 Myan anem a karaw a kapaytarabāko nyo, ki do chapapito naw a karaw, ki Araw a Kapaynaynahah a masantwan di ĀPO. Aran sino a maytarabāko so aran āngo do Araw a Kapaynaynahah, ki machita a maipadiman. 16 As dawa, machita ngilīnen dan tawotawo no Israel Araw a Kapaynaynahah, kan silibraren daw nya no kapotōtan da a magnanayon a tōlag. 17 Iyanchiw nyaw sinyal do baet ko kan tawotawo no Israel a magnanāyon, ta do anem a karaw yaken a ĀPO pinarin ko kahanyihanyitan kan tanaya, ki do chapapito naw a karaw, nagsardeng ako a naytarabāko kan naynahah ako.’ ”

18 Do nakatayokaw ni ĀPO a naychirin di Moyses do Tokon a Sinai, intoroh na dyaw dadwaw a matatāpi a bato a nangitolasan a mismo ni ĀPO siras bilbilin naw.†31:18 Do Hebreo a chirin, ki “intolas no kakamay ni Āpo Dyos”.