1 Yapo do mabondal a bolabola a matatarek so kīta a asol, obi kan mabaya, nangabel sa Besalel so mapino sa a laylay a para do kapagsīrbi do masantwanaw a yanan. Pinarin da saw laylayaw ni Aaron a akmas inbilinaw ni ĀPO di Moyses.

2 As namarin sa pa so epod a yapo do bolabola a balitok, mabondal a bolabola a matatarek so kīta a asol, obi kan mabaya, as kan mapino a tela. 3 Nangtāpi sa so balitok a mandan tomnaripis, as kan tinabtabas da a akmas bolabola, as kan inlāga da do mabondalaw a bolabola a matatarek so kīta a asol, obi kan mabaya, as kan mapino a tela a pinarin no sanay. 4 Namarin sa pa so dadwa kapidāso a para pakoh a pachipongan dan maybītaw a payis no epod tan maytapang dadwaw a payis na. 5 As iyaw barīkisaw a inabel no sanay, ki naikapet a nachilānang do epodaw, as kan naparin do balitok, mabondal a bolabola a matatarek so kīta a asol, obi, kan mabaya, as kan mapino so kīta.

6 Inkolimas da saw bato saw a onyks do balitok saw a pangikolimasan, as naikitikit a akmay silyo ngarangaran dan asa poho a pōtot a mahahakay ni Israel. 7 Sinpangan na, pinaypong da sa do pidāso saw a para pakoh no epod a pakanaknakman siras pōtot saw a mahahakay ni Israel a akmas inbilinaw ni ĀPO di Moyses.

8 Namarin sa pa so pangbarōkong a pinarin no sanay a akmas nakaparinaw no epod do bolabola a balitok, mabondal a bolabola a matatarek so kīta a asol, obi kan mabaya, as kan mapino a tela. 9 Kwinadrado da kan naytapid a dinobli tan sasyam a polgada so kananaro kan kawobong. 10 Inkolimas da do apat a kalinya siraw mangingīna saw a bato. Iyaw dāmwaw a linya, ki siraw bato saw a sardyos, topasyo, kan garnet.*39:10 Do kadwan a naiyōlog, ki “robi, topasyo, kan berilo”. 11 Do somaronwaw a linya, ki siraw bato saw a esmeralda, sappiro, kan diamante. 12 Do chatatdo naw a linya, ki siraw bato saw a hasinto, agate, kan ametista. 13 As do chapat naw a linya, ki siraw bato saw a berilo, onyks, kan haspe. Naikolimas sa do pangikolimasanaw a balitok. 14 Myan asa poho kan dadwa a bato. Do kāda asa bato, ki naikitikit ngaran kāda asa dyirad pōtotaw a mahahakay ni Israel a pinakainawan dan asa poho kan dadwa a trībo. As siraw nya bato, ki akma say silyo.

15 Namarin sa pa so nahobid sa a nakadina a akmay kordon a para pangbarōkong do pōro a balitok. 16 Namarin sa pa so dadwa balitok a pangikolimasan kan dadwa a balitok a sinan singsing, kan pinaypong da saw sinan singsing do dadwaw a sōli no pangbarōkongaw 17 Pinaypong daw dadwaw a nakadina a balitok do dadwaw a sinan singsing do maybītaw a sōli no pangbarōkongaw. 18 Iyaw maybītaw a tobwan no nakadina, pinaypong da do dadwaw a pakaikolimasan da, as kan pinaypong da do maybītaw a pidāso a para pakoh do salapen naw no epod. 19 Namarin sa pa so dadwa a balitok a sinan singsing, kan pinaypong da do dadwaw a sōli no pangbarōkong do sayranaw, do makatayrahemaw a payis a mangket do epod. 20 Namarin sa pa so dadwa a balitok a sinan singsing, kan pinaypong da do maybītaw a ahbo no pidāso saw a pakoh do salapenaw no epod do sāip naw do anmwaw no barīkis a inabel no sanay. 21 Siraw sinan singsingaw no pangbarōkong, ki naiyitan sa dyirad sinan singsing saw no epod do asol a kordon, tan nachitapang do barīkisaw no epod a inabel no sanay, kan tan dya machiwitwitwit pangbarōkongaw do epod. Pinarin da a akmas inbilinaw ni ĀPO di Moyses.

22 Namarin sa pa sa Besalel so kagay no epod a maynana asol a tela. 23 Inabotan daw hobok naw so pakakayanan no oho. Inabelan daw maynyopos naw no abot a akmas kwelyowaw tan dya mapirit. 24-26 Do omdibon naw no sayran naw, inabelan da so akmas asyaw no granada a yapo do mabondal a bolabola a matatarek so kīta a asol, obi, kan mabaya, as kan mapino a nahobid a tela. As pinababaetan da so dedekey a komalinitin a pātit a balitok. Pinarin da a akmas inbilinaw ni ĀPO di Moyses.

27 Namarin sa pa so laylay ni Aaron kan pōtot na saw a mahahakay a yapo do mapino a tela a inabel no sanay, 28 iyaw torban kan siraw tabahos a naparin do mapīno a tela, kan makatayrahemaw a laylay do malamōyot a tela. 29 Iyaw barīkisaw, ki naparin do malamōyot a tela kan do mabondal a bolabola a matatarek so kīta a asol, obi kan mabaya, as kan nabordaan do rinayit no rayem. Pinarin da akmas inbilinaw ni ĀPO di Moyses.

30 Sinpangan na, nangtāpi sa so korona a pōro a balitok a kinitikīta no da so nya, ‘Masantwan para di ĀPO’ akmas nakapangikitikitaw do silyo. 31 Pinaypong da do asol a kordon do torbanaw a akmas inbilinaw ni ĀPO di Moyses.

32 Dawa, tabo a tarabāko do tabirnakolo a iyaw Toldaw a Pachibayabayatan, ki natayoka dana. Pinarin da tabo no Israelita saw akmas inbilinaw ni ĀPO di Moyses. 33 Inyangay da di Moyses tabo insagāna da para do kapatnek so tabirnakolwaw a iyaw toldaw kan tabo rimīnta na saw, siraw sasadyit, parey saw, sintas saw, parey saw kan pangsapatos da saw, 34 iyaw panalobaw a lālat da no malloko a karniro a napanyibaya, iyaw panalobaw a lālat da no lombalomba, kan kortinaw a lilibeng, 35 iyaw Lakāsanaw no Tōlag kan iisiw na saw kan tohongaw no pachipakawanan so gatos, 36 iyaw lamisaanaw kan tabo rimīnta na saw, kan iyaw tināpayaw a maidāton do Dyos, 37 iyaw porwaw a balitok a pamadatōkan so soho saw, kan soho na saw a nalinya sa do yanan daw kan tabo rimīnta naw, kan iyaw lanaw a para do sohwaw, 38 iyaw balitokaw a altar, lanaw a pangpasanto, mabanglwaw a insinso, kan kortinaw para do asdepanaw do tolda, 39 iyaw tombāgaw a altar kan tombāgaw a lebleb na, iisiw na saw kan tabo rimīnta na saw, iyaw palangganaw a paylablaban kan dadātok naw, 40 siraw kortinaw do atataw kontodo parey da saw kan pangsapatos da saw, kan kortinaw do asdepanaw do atataw kontodo siraw hobid saw kan pāsok saw, kan tabo rimīnta saw no tabirnakolo a Tolda a Pachibayabayatan, 41 kan naabel saw a laylay dan papādi a naosar do nakapagsīrbi da do masantwanaw a yanan, magrāman masanto saw a laylay para di Aaron a pādi kan laylay saw para dyirad pōtot na saw an magsīrbi sa a pādi.

42 Pinarin dan Israelita saw tabo tarabākwaw akmas inbilinaw ni ĀPO di Moyses. 43 Binisīta ni Moyses tinarabāko daw, as kan naboya na a pinarin da a akmas inbilinaw ni ĀPO. Dawa, binindisyonan sa ni Moyses.