1 Sinpangan na, binata ni ĀPO di Moyses a kāna, 2 “Do primīro no dāmwaw a bohan, patneken nyonchiw tabirnakolwaw, iyaw Toldaw a Pachibayabayatan. 3 Ipapasdep mo Lakāsanaw no Tōlag kan ipalibeng mo so kortinaw. 4 Ipaisdep mo paw lamisaanaw, as kaipapangay mo siras rimīnta na saw. As ipaisdep mo pamadatōkanaw so soho kan ipapangay mo saw soho naw. 5 Ipapangay mo balitokaw a altar a paysosohan so insinso do salapenaw no Lakāsan no Tōlag, kan ipalōdyit mo kortinaw do asdepanaw do tabirnakolwaw.

6 “Ipapangay mo altaraw a paysosohan so dāton do salapenaw do asdepanaw do tabirnakolo, iyaw Toldaw a Pachibayabayatan. 7 Ipapangay mo palangganaw a paylablaban do baet daw no Toldaw a Pachibayabayatan kan altaraw, as kaipapangay mo syas ranom. 8 Ipalōdyit mo saw kortinaw a omlikmot so atataw, as ipakortina mo asdepanaw.

9 “Sinpangan na, hapen mo lanaw a pangpasanto, as warsyan mo a itatārek a para di ĀPO iyaw tabirnakolwaw kan tabo saw rimīnta naw. Tan komwan, masantwan dananchi. 10 Katayoka na, warsyan mo a itatārek a para di ĀPO iyaw altaraw a paysosohan so dāton kan tabo rimīnta na saw. Tan komwan, masantwan dananchi. 11 Masaw a warsyan mo a itatārek a para di ĀPO palangganaw kan dadātok naw.

12 “Yangay mo sa Aaron kan pōtot na saw a mahahakay do asdepanaw do Toldaw a Pachibayabayatan, kan riyosen mo sas ranom.*40:12 Eks. 29:4 13 Katayoka na, pakhangen mo si Aaron so masantwan saw a laylay, kan padwan mos lanaw oho naw a mangitatārek dya tan magsīrbi dyaken a pādi. 14 Paypasngen mo saw pōtot naw a mahahakay, kan pakhangen mo sas naabelaw a laylay da. 15 Padwan mos lanaw oho daw a akmas pinarin mwaw di āmang da tan magsīrbi sa dyaken a pādi. Iyaw nakapado mwaya dyira so lana, ki magpādi sanchi kan tongtongen dan īto saw a kapotōtan da.” 16 Pinarin a tabo ni Moyses akmas inbilinaw dya ni ĀPO.

17 Dawa, iyaw tabirnakolwaw, ki napatnek do primīro no dāmwaw a bohan do somaronwaw a tawen. 18 Pinatnek da Moyses tabirnakolwaw. Inpinsan da saw pangsapatos na saw, as nakapatnek da siras parey na saw, as nakapaōsok da siras sintas naw, as nakapatnek da do parey saw. 19 Somnarono, namolay sa so pinatalob da a tolda do tabirnakolwaw, as pinatapidan da so makatayhapot a tolda a akmas inbilinaw dya ni ĀPO.

20 Inhap ni Moyses matatāpi saw a bato, as nakapangay na sira do lakāsanaw. Nakaipapaōsok nas iisiw saw do lakāsanaw, as nakaipatohong na so tohongaw no pachipakawanan so gatos do hapotaw no lakāsan. 21 Sinpangan na, inpaisdep naw Lakāsanaw no Tōlag do tabirnakolwaw, as nakaipalōdyit na so kortinaw a lilibeng kan inpalibeng naw Lakāsanaw no Tōlag a akmas inbilinaw dya ni ĀPO.

22 Inpapangay ni Moyses lamisaanaw do irahemaw no tolda do mangket do ammyānanaw a bīt no tabirnakolwaw do gaganaw no kortina, 23 kan inpapadātok naw tināpayaw do salapen ni ĀPO a akmas inbilinaw dya ni ĀPO.

24 Inpapangay naw pamadatōkanaw so soho do Toldaw a Pachibayabayatan do anmwaw no lamisaanaw do bīt naw do mangket do abagātan, 25 kan inpapangay na saw sohwaw do salapen ĀPO a akmas inbilinaw dya ni ĀPO.

26 Inpapangay pa ni Moyses balitokaw a altar do irahemaw no Tolda a Pachibayabayatan do salapenaw no kortina, 27 as nakaipasosoh nas mabanglo a insinso a akmas inbilinaw dya ni ĀPO. 28 As inpalōdyit naw kortinaw do asdepanaw do tabirnakolo.

29 Do salapenaw no asdepan do tabirnakolo a iyaw Toldaw a Pachibayabayatan, inpapangay na daw altaraw a paysosohan so dāton, as nakapangidāton da so dāton a masosohan kan dāton a irek†40:29 Eks. 29:41; 30:9 a akmas inbilinaw ni ĀPO dya.

30 Inpapangay naw palangganaw do naypayawan daw no Toldaw a Pachibayabayatan kan altaraw, as nakaipapangay na syas ranom a paylablaban. 31 As si Moyses, Aaron, kan pōtot na saw a mahahakay, inosar da a paylablaban siras kakamay kan kokod da saw.‡40:31 Eks. 30:19-21 32 Maylablab sa kāda somdep sa do Toldaw a Pachibayabayatan mana maypasngen do altaraw a akmas inbilinaw ni ĀPO di Moyses.

33 Sinpangan na, inpalikmot naw atataw do omdibonaw no tabirnakolo kan altaraw. Inpalōdyit naw kortinaw do asdepanaw do atataw. Dawa, pinatayoka da tabo da Moyses tarabākwaw.

34 Do dāwri, inabongotan no demdem Toldaw a Pachibayabayatan, kan iyaw ranyag no dayag ni ĀPO, inapno naw tabirnakolwaw. 35 Ki nakasdep aba si Moyses do irahemaw no Toldaw a Pachibayabayatan maynamot ta dinitā pa no demdemaw, kan iyaw ranyag no dayag ni ĀPO, nāw na inapno tabirnakolwaw.

36 Do tabo a nakapayadiyadis dan Israelitaw, nawri lang nakapaydis da so pagkampwan an naypatohos demdemaw. 37 Amnan dya naypatohos demdemaw, ki nayadis saba a nanda do araw a naypatohos demdemaw. 38 Do tabo a nakapayadiyadis dan Israelita saw, myan iyaw kayan ni ĀPO dyira. Ta iyaw demdemaw, ki nāw na do tabirnakolwaw an māraw. As an mahep, ki myan apoy do demdemaw.