1 Do kadamaw ni Esra a naydasal kan nangipodno so gatos da ranan na tomnanyis kan nagrōkob do salapen no bahay no Dyos, nagaribongbong saw Israelitaw a mahahakay, mababakes, kan adedekey do omdibonaw dya. Aran sira, taywara sa a tomnayis. 2 Do dāwri, si Sekanya a pōtot ni Jehiel a asa kapotōtan ni Elam, binata na di Esra a kāna, “Mapodno kami aba do Dyos ta do kapachikabahay dyirad gan-ganaet a mababakes do tawotawo a omdibon dyamen. Ki aran komwan, ariw namnāma para di Israel. 3 Dawa, machitōlag ta do Dyos ta a boyawen ta sa tabo nya saya mababakes kan siraw anak da sigon do bagbaga mo, mo āpo kan siraw maychamirpirpiraw a māmo do bilin no Dyos ta. Parinen ta sigon do linteg, ah. 4 Maytēnek ka pa, ta rebbeng mo, kan machitēnek kami dyimo. Dawa, sigi, payiten mo aktokto mo kan parinen mo, ah.”

5 Do dāwri, naytēnek si Esra kan inmandar na dyirad pangpangōlo dan papādi, siraw Lebitaw, kan tabo tawotawo no Israel a magsapata sa mamarin so naibaheyaw. Dawa, nagsapata sa. 6 Sinpangan na, komnaro si Esra do salapenaw no bahay no Dyos kan nangay a minisan do kwartwaw ni Jehohanan a pōtot ni Elyasib. Do kayan naw daw, komninan kan mininom aba, ta tinongtong naw magdong-aw a maynamot do dyi da kapodno no naakaw saw a naybidi.

7 Sinpangan na, myan pakatoneng a naiwaras do intīro a Joda kan Jerosalem a siraw tabo naybidi a naakaw, ki machita a makpeh do Jerosalem. 8 Aran sino a dya mangay do irahem no tatdo a karaw, sigon do bilin dan opisyalisaw kan siraw panglakayenaw, tabo dyira na, ki masamsam kan mapaksyat do kakpehpehan dan naakaw saw a naybidi.

9 Do irahem no tatdo a karaw, tabo saw mahahakay do Joda kan Benhamin, nakpeh sa do Jerosalem do chadadwa poho a karaw do chasasyam a kabohan. Naydisna sa tabo tawotawo do atataw do salapen no timplo, as kan naychamirpirpir sa a maynamot do dyaya riribok kan maynamot do mawyas a chimoy. 10 Sinpangan na, naytēnek si Esra a pādi, kan binata na dyira a kāna, “Mapodno kamo aba do nakapachikabahay nyo do gan-ganaet a mababakes. Mainayon nya do gatos no Israel. 11 Changori, ipodno nyo gatos nyo di ĀPO a Dyos dan aāmang ta, as parinen nyo chakey na. Patarken nyo inawan nyo dyirad tawotawo do omdibon nyo kan dyirad gan-ganaet a babbaket nyo.”

12 Kinalyak dan tabo a nakpehpeh daw a inatbay a kon da, “On, kosto ka. Machita namen a parinen akmas bata mo! 13 Ki āro sayaw tawotawo dya, kan chimpwaya a machimoy. Maparin kami aba a maytēnek do gagan. Otro, do nyaya bata mo, ki maparin aba a tongpalen do asa mana dadwa karaw, ta naygatos kami so rakoh a maynamot do nya banag. 14 Palobōsan mo saw opisyalis namen a pinakainawan do tabo a nakpeh dya. As palobōsan mo tabo do idiidi namen siraw nangabahayaw so gan-ganaet a mababakes, ki mangay do naikeddeng a ōras a kontodo siraw panglakayenaw kan siraw hwis saw do kāda idi manda do kaydit dyamen no taywaraya a kasoli no Dyos ta do dya a banag.” 15 Ki si Jonatan a pōtot ni Asahel kan Jahseyah a pōtot ni Tikbah, sira lang mangipsok syay. As kan si Mesollam kan Sabbetay a Lebita, ki ayōnan da sa.

16 Dawa, pinarin dan naybidyaw a naakaw iyaw naibaheyaw a plāno. Namidi si Esra a pādi siras pangpangōlo dan pampamilya a pinakainawan dan partīdos. Tabo sa, ki tinongdo na sa do ngarangaran da. Do primīro no chaasa poho naw a kabohan, naydisna sa a magimbistigar so nya banag. 17 As do primīro no dāmwaw a bohan, natayokaw disisyon da a maynamot do tabo mahahakay a nangabahay dyirad gan-ganaet a mababakes.

18 Yapo dyirad kapotōtan dan papādi, nya saw nangabahay dyirad gan-ganaet a mababakes: Yapo dyirad kapotōtan ni Jeswa a pōtot ni Josadak, kan kakakteh na, ki sa Maaseyah, Elieser, Jarib, kan Gedalyah. 19 Inkari da a tabo a payyayohen da saw babbaket da, kan para do gatos da, mangidāton kāda asa so tōro a karniro a naikeddeng a dāton do gatos. 20 Yapo dyirad kapotōtan ni Immer, ki sa Hanay kan Sebadyas. 21 Yapo dyirad kapotōtan ni Harim, ki sa Maaseyah, Elyas, Semayas, Jehiel, kan Ossias. 22 Yapo dyirad kapotōtan ni Pas-hor, ki sa Elyoenay, Maaseyah, Ismael, Netanel, Josabad, kan Elasah.

23 Yapo dyirad Lebita, ki sa Josabad, Simey, Kelayah a si Kelita, Petayah, Joda, kan Elieser. 24 Yapo dyirad taga-kansyon, ki si Elyasib. Yapo dyirad maggwardyaw do rowangan no timplo, ki sa Sallom, Telem, kan Ori.

25 Nyaw yapo dyirad kadwan saw a Israelita: Yapo dyirad kapotōtan ni Paros, ki sa Ramyah, Issyah, Malkihah, Mihamin, Eleasar, Malkihah, kan Benayas. 26 Yapo dyirad kapotōtan ni Elam, ki sa Mattanyah, Sakaryas, Jehiel, Abdi, Jeremot, kan Elyas. 27 Yapo dyirad kapotōtan ni Satto, ki sa Elyoenai, Elyasib, Mattanyah, Jeremot, Sabad, kan Asisa. 28 Yapo dyirad kapotōtan ni Bebay, ki sa Jehohanan, Hananyah, Sabbay, kan Atlay. 29 Yapo dyirad kapotōtan ni Bani, ki sa Mesollam, Mallok, Adayah, Jasob, Seal, kan Jeremot. 30 Yapo dyirad kapotōtan ni Pahat-moab, ki sa Adna, Kelal, Benayas, Maaseyah, Mattanyah, Besalel, Binnoy, kan Manasses. 31 Yapo dyirad kapotōtan ni Harim, ki sa Elieser, Issihah, Malkihah, Semayas, Simeon, 32 Benhamin, Mallok, kan Semaryah. 33 Yapo dyirad kapotōtan ni Hasom, ki sa Mattenay, Mattattah, Sabad, Elipelet, Jeremay, Manasses, kan Simey. 34 Yapo dyirad kapotōtan ni Bani, ki sa Maaday, Amram, Oel, 35 Benayas, Bedeyah, Kelohi, 36 Banyah, Meremot, Elyasib, 37 Mattanyah, Mattenay, kan Jaaso. 38 Yapo dyirad kapotōtan ni Binnoy, ki sa Simey, 39 Selemyah, Natan, Adayah, 40 Maknadebay, Sasay, Saray, 41 Asarel, Selemyah, Semaryah, 42 Sallom, Amaryah, kan Jose. 43 Yapo dyirad kapotōtan ni Nebo, ki sa Jeyel, Mattitiah, Sabad, Sebina, Jadday, Joel, kan Benayas. 44 Tabo saw nya, ki nangabahay sa so gan-ganaet a mababakes. As siraw kadwan dyira, ki myan pōtot da.*10:44 Mana “As inpayyayo da sa kontodo pōtot da sa”.