No Libro A Habakkok
No Pakatonngan so Paytābwan no Nya Libro
Do dyaya libro, mapatakan ta iyaw kapagsarīta da Habakkok kan Āpo Dyos. Naynonohed si Habakkok di ĀPO, ta taywara nariribokan a maynamot dyirad kapayngay na a taga Joda. Ta sira, ki nāw da maybibyay a marahet, ki akmay inonolay na sa ni Āpo Dyos (1:1-4, 13).
Tominbay si ĀPO di Habakkok a do maikeddeng a chimpo, toboyen na sanchiw taga Babilonya (1:5) a mangrārayaw siras tawotawo do Joda a maynamot do gatogatos da.
Mimyan pa nariribokan si Habakkok do nakadngey naw so nyaya, ta āngo ta si Āpo Dyos a masantwan kan malinteg, ki osaren na saw mararahet a tawotawo a mangipatongpal so panggep na do tanaya (1:12 - 2:1)? Dawa, inyahes na di Āpo Dyos an āngo ta palobōsan na siraw taga Babilonya a mangrārayaw siras kapayngay na a taga Joda, ta maraherahet sa Babilonya kan sira (1:6-7).
Inatbay ni ĀPO si Habakkok a batahen na a aran komwan, sigorādo a dosāen na sanchiw Babilonya a maynamot do gatogatos da a akmas kasyirto so kadōsa nanchis tawotawo do Joda do gatotatos da (2:2-20). Ta no tawo a malinteg, mabyay anchi do kapanganohed na. Ki iyaw dya malinteg, makalāsat abanchi. (2:4). Inpakatoneng ni ĀPO di Habakkok a iya, ki Dyos a mismo a mangitorayaw a yapo do masantwan a Timplo na do hanyit (2:20), kan iya paw makatoneng do tābo mapariparin do tanaya.
Do nakadngey ni Habakkok so nyaya, nagdaydāyaw di Āpo Dyos a maynamot do kadyos na kan maynamot do malinteg a kapangokom na do nakarahan dyirad tabo tawotawo kan dyirad miswaw a tawotawo na. Dawa, natonngan na a akmas katalek kan kalinteg ni Āpo Dyos do kapangokom na do nakarahan dyirad tawotawo na, komwan a matalek do kaparin na do masakbayan (3:19).
No Naychakarwan no Nya Libro
No kapaynonohed ni Habakkok di ĀPO a dyi na dosāen saw taga Joda (1:1-4)
No atbay ni ĀPO a palobōsan na saw taga Babilonya a mangdōsa siras taga Joda (1:5-11)
No kapaynonohed ni Habakkok a maraherahet saw taga Babilonya (1:12-2:1)
No atbay ni ĀPO a madōsa sanchiw taga Babilonya (2:2-20)
No dasal ni Habakkok di ĀPO (3:1-19)
Habakkok
1
1 Nyaw minsāhi a inpaltiing ni Āpo Dyos di propīta Habakkok.
No Kapaynonohed ni Habakkok
2 O ĀPO, māngo pa so kahay kapangdaw ko so sidong mo,
ki mangadngey kaba?
Mana kaitanyis ko dyimo so “Kinaranggas!”
ki mangisalākan kaba?
3 Āngo ta ipaboya mo dyaken kabon kinalinteg?
Āngo ta nonolay mo madi a kaparin?
Karārayawan kan kinaranggas, myan sad salapen ko,
as kan nāw na myan kapagsosopyat kan kapaydidiman.
4 Dawa, abaw sīrbi no naparin a linteg,
kan polos a maipākat abaw kinalinteg!
Ta siraw marahet, dibonen da saw malinteg.
As dawa, maydyīdo danaw kinalinteg.
No Atbay ni ĀPO
5 Initbay ni ĀPO a kāna, “Chiban nyo saw nasyon saya,
kan maklat kamonchi do makaskasdāaw a maparin.
Ta myan anchiw parinen ko do kasibibyay nyo
a anohdan nyo aba aran naibahey dyinyo.
6 Pabīlegen ko sanchiw taga Babilonya saw*1:6 Mana “Chaldean”.
a siraw abwaw so kāsi kan taykalo a tawotawo.
Magwaras sanchi do intīro a lōbong,
kan sakōpen da sanchiw tanatana no matarek.
7 Sira, ki makabakebakel kan makaam-amak.
Kinalinteg kan toray da, ki yapo do kapangas da.
8 Matartaray saw kabalyo da kan leopardo.†1:8 Leopardo, ki rakoh kan bolaw a animal a mataray, kan yapo do pamilya no posak. Abtebtek boboh a kodit na tan maydamnay a tomayo.
Marangranggas sa kan siraw lobo a manganop an mahep.
Magtaros saw kabalyiro da a yapo do mateng a logar.
Akma saw insiwet a kangkang a mangsiplag.
9 Sira tabo, ki mangay sa a mangranggas.
Siraw rōpa da, ki makatarengteng do kwanan da
a mangpeh so bahoden da saw a akmay anay do kanayan.
10 Dyābat da saw ar-āri saw,
kan chamimyeng daw opisyalis da saw.
Aran kāda kōta, ki pachimadēkeyan da.
Mapaytokon sa so tana tan makasdep sa a mangsākop.
11 Sinpangan na, maypahabas sa a akmay salawsaw, as katongtong da.
Āros gatos a tawotawo a dyos daw ayit da.”
No Kapirwa no Kapaynonohed ni Habakkok di Āpo Dyos
12 Imom ĀPO, ki yapo kabawri do abos pandan?
O ĀPO a Dyos ko a iyaw Masantwanaw, madiman kaba.‡1:12 Mana “Madiman kami aba.”
ĀPO, pinidi mo saw Babilonya a mangokom dyamen.
Imo a lāyit,§1:12 Sal. 18:2; Rom. 9:33; 1 Kor. 10:4; 1 Ped. 2:8 pinatnek mo sa tan dōsaen da yamen.
13 Taywara ka so kadadas kan maparin kaba manyideb so karahet.
Polos a dyi mo a iditen dya kosto a kaparin.
Āngo ta maboya mo saw dya mapodno a tawo,
as maolimek ka an siraw marahet,
ki mangrārayaw sa so malinlinteg kan sira?
14 Pinayparin mo tawotawo a akmay among do tāw,
kan akma siras komayakayabaya a abo mangitoray.
15 No kabōsor,*1:15 Iyaw kabōsor, ki siraw taga Babilonya. sadyiten na sa tabo a akmay among,
as katabokol na sira a ikaro,
as kan abōgen na sa a sigāyan.
Dawa, chasoyosoyot na do nakahap na sira.
16 As dawa, idatōnan naw tabokol naw,†1:16 Ibidang naw tabokol a akmay dyos na.
as kan mangsosoh so insinso para do sīgay naw.
Ta maynamot dyira, maybibyay a mabarayōboy,
as kan maynana kagaganayan no kanen na.
17 Tongtongen nawriw magsīgay
a mayrārayaw so nasnasyon a abos kāsi ah?”
*1:6 1:6 Mana “Chaldean”.
†1:8 1:8 Leopardo, ki rakoh kan bolaw a animal a mataray, kan yapo do pamilya no posak. Abtebtek boboh a kodit na tan maydamnay a tomayo.
‡1:12 1:12 Mana “Madiman kami aba.”
§1:12 1:12 Sal. 18:2; Rom. 9:33; 1 Kor. 10:4; 1 Ped. 2:8
*1:15 1:15 Iyaw kabōsor, ki siraw taga Babilonya.
†1:16 1:16 Ibidang naw tabokol a akmay dyos na.