3
No Kapakāsi pa no Ninebeh
1 Kapakāsi nyo pa a tawotawo do syodad a Ninebeh,
ta maynana kamo a mabayataw kan mangdimdiman.
Napno kamo so sinamsam nyo.
Machipanda sabaw nakagatosan nyo.
2 Adngeyen nyo sanetset dan iiplot,
karadakad dan līgay do rarahan,
kalebkeb dan kabalyo,
as kan kataltaltag dan logan saw a pachigobat.
3 Domardarop dana saw nakakabalyo.
Gomilgilap ispāda da, kan somilsileng danaw chibot da.
Āro saw nadiman kan nawpōpo dana sa,
Mabidang pa sabaw bangkay, as makachichad saw tawotawo dyira.
4 Tabo nya, ki maynamot ta akma kamo so balangkantisaw
a masaraw a manggargari do kapanolib na a makadiman.
Inadīpen na saw nasnasyon do kapaglaklāko na so asi na,
kan inallīlaw na saw tawotawo do salamangka na.
5 Nyaw bata ni ĀPO a Manakabalin do Tābo a kāna,
“Inyo a taga Ninebeh, kontraen koynyo!
Patohosen konchiw imara nyo a manda do rōpa nyo,
kan ipaboya konchi dyirad nasnasyon saya a silalābos kamo.
On, ipaboya ko dyirad pagāryan saya iyaw kasnesnek nyo.
6 Pagsidan konchinyo so makabābaba a basōra.
Iroromen konchinyo,
kan payparinen koynyo a boyāen dan tawotawo a chamimyeng.
7 Tabo a makaboya dyinyo, dichanan danchinyo, kan batahen danchi,
‘Narārayaw danaw Ninebeh! Sino paro maāsot so kāsi dya?’ kon da.
Sino paro machichwasan ko a mangahwahok dyinyo?” kāna ni ĀPO.
8 Maganaganay kamori kan siraw myan do syodad a Tebes*3:8 Tebes mana No-Amon, ki sintro no Egipto.
a myan do payis no Oksong Nile, kan dinibon no ranom?
Iyaw oksong, pinakaaywan no Tebes,
as iyaw ranom na, ki pinakaahad no syodadaw.
9 Siraw nasyon a Etiopya†3:9 Do chirin Hebreo, ki “Kos”. Iyaw nya tana, ki karāman no nasyon a Sudan, kan intorayan no āri no Tebes. kan Egipto, siraw ayit na.
Siraw nasyon a Pot kan Libya, ki kasidong na pa.
10 Ki aran komwan, ki alit na, naikaro saw omyan do Tebes,
as kan naakaw sa.
Siraw tagībi da,‡3:10 2 Āri. 8:12; Sal. 137: 9; Isa. 13:16; Ose. 13:16 inbābaot da sa a diniman
do kāda sōli no kalkalsāda.
Siraw magtotoray da, nagbibinonōtan da sa a mayparin a adīpen,
kan tabo saw matotohos so saad, ki naposasan sa.
11 Aran inyo a taga Ninebeh, mayparin kamonchi a akmay nabōk.§3:11 No kabōk, ki masanyib a pangārig no kalidyalidyat no tawotawo a maynamot do kasoli no Dyos dyira. Sal. Isa. 51:17; Jer. 25:15-27; Dong. 4:21; Ese. 23:31-34
Mayyayo kamonchi a tomayo,
kan maychichwas so pagkamītan nyo dyirad kabōsor nyo.
12 Tabo kōta nyo, ki kayarig danchiw kayokayo a igos
a naynoy danaw dāmo a asi da.
An magon-gon saw nya kayokayo,
ki tod a maychahesday asi daw do dangoy no koman.
13 Chiban nyo pa saw bōyot nyo,
a akma say mababakes a makakapsot.
Siraw rowangan do tana nyo, nakaywang dana dyirad kabōsor nyo,
as kan natemtem danaw balonet da.
14 Mamoranom kamo so risīrba nyo anchan malakob daynyo.
Ahnyihnyihen nyo saw kōta nyo.
Manggamay kamo so tana, kan magdamili kamo so ladrilyo.*3:14 Iyaw ladrilyo, ki para pangapya kan pamahnyi so ahadaw. Iyaw ahad, ki maparin a magistayan asa poho kamitro katokpoh na.
15 Ki aran āngo pariparinen nyo, alit na madiman kamonchi do apoy.
Dimanen danchinyo so ispāda.
Opasen danchinyo a akma siras kabagaw a mangpisti so mohamoha.
Dawa, maypāro kamo akmay kabaga.
On, maypaypāro kamo a akmay kabaga!
16 Pinaypāro nyo saw nigosyanti nyo
a arwaro pa kan no bidang dan bitohen saya do hanyit.
Sira, ki akma say kabaga a mangpisti so mohamoha nyo,
kan tod sa somayap a komaro.
17 Siraw gwardya nyo,†3:17 Mana “siraw prinsipi nyo”. akma say kabaga,
as siraw opisyalis nyo, akma sas pangen daw no kabaga
a maychadnadna do ahad do araw a karokmeh.
Ki an domadaw araw, maychasayasayap sa,
kan abaw makapatak an kinwanan da.
18 O āri no Assirya, nakaycheh dana saw mangonong so karniro mo,‡3:18 No chakey na batahen siraw mangonong so karniro, ki “siraw magtoray”.
as kan siraw matohos so saad dyimo, naynepdep dana sa.
Siraw tawotawo mo, naychawpit dana sa do katokotokonan
a aba polos mangpeh sira.
19 Arabaw rimīdyo do bigar mo,
ta iyaw nawriw chadiman mo.
Tabo a makadngey so dāmag a maynamot dyimo,
maytītipat sanchi a masoyosoyot do nakarārayaw mo.
Aryoriw aran asa a nasyon
a dya nakadidiw so dya mayhāt a kinaranggas mo?
*3:8 3:8 Tebes mana No-Amon, ki sintro no Egipto.
†3:9 3:9 Do chirin Hebreo, ki “Kos”. Iyaw nya tana, ki karāman no nasyon a Sudan, kan intorayan no āri no Tebes.
‡3:10 3:10 2 Āri. 8:12; Sal. 137: 9; Isa. 13:16; Ose. 13:16
§3:11 3:11 No kabōk, ki masanyib a pangārig no kalidyalidyat no tawotawo a maynamot do kasoli no Dyos dyira. Sal. Isa. 51:17; Jer. 25:15-27; Dong. 4:21; Ese. 23:31-34
*3:14 3:14 Iyaw ladrilyo, ki para pangapya kan pamahnyi so ahadaw. Iyaw ahad, ki maparin a magistayan asa poho kamitro katokpoh na.
†3:17 3:17 Mana “siraw prinsipi nyo”.
‡3:18 3:18 No chakey na batahen siraw mangonong so karniro, ki “siraw magtoray”.