5
No Kanta ni Deborah
1 Do dāwri a araw, kinanta da Deborah kan Barak a pōtot ni Abinoam nya a kanta:
2 “Do kapangidaōlo dan pangpangōlo no Israel,
do kakey dan tawotawo a mangiparawat so byay da,
maidāyaw si ĀPO!
3 “Adngeyen nyo a ar-āri! Ikāso nyo a pangpangōlo!
Magkanta ako di ĀPO.
Magtokar ako di ĀPO a Dyos no Israel.
4 “O ĀPO, do nakakaro mo yapo do tokotokon Seir,
do nakahtot mo yapo do tana a Edom,
naggin-gined tanaya, kan nangitopak so chimoy.
On, nangitopak so chimoy yapo do kademdeman.
5 Siraw tokotokon, naggon-gon do salapen ni ĀPO,
aran do Tokon Sinai*5:5 Eks. 19:18 do salapen ĀPO a Dyos no Israel.
6 “Do chimpo ni Samgar a pōtot ni Ānat,
do chimpo ni Jael, nainonolay dana saw sīgod a rarahan,
as siraw manakenakeyaw mayam lang do simang no ayaman.
7 Arabaw omidi do idiidi no Israel.
On, arabaw tawo daw a manda do kawara mom Deborah†5:7 Mana “manda do kawara ko a Deborah”.
a nangay a maytēnek a akmay asa ānang dan Israelita.
8 Do nakapidi daw no Israelita siras bayo saw a dyos,
nawaraw gobat do rowangan da saw.
Aryoriw siig-igpet so sarāpa mana chibot
dyirad apat saw a poho a rībo a mahahakay do Israel? Polos!
9 Machipangdidiw ako dyirad komander no Israel
kan siraw nakey a nangiparawat so inawan da a machigobat.
Maidāyaw si ĀPO!
10 “Iktokto nyo, inyo a magsakay do maydak a asno,‡5:10Siraw lang mabaknang saw a nigosyanti myan so maydak a asno.
inyo a maydisna do mangingīna saw a ap-ap,
as kan inyo a manakey do rarahan.
11 Adngeyen nyo saw magkantaw a nakpeh do pamoranoman saw.
Ibahebahey da maynamot do ballīgi ni ĀPO
a siraw ballīgi no tawotawo a yapo do barbaryo no Israel.
“Sinpangan na, siraw tawotawo ni ĀPO,
minosok sa do rowangan da saw.§5:11 Mana “yapo do syodad da saw”.
12 ‘Mayokay ka, mayokay kam Deborah!
Mayokay ka, mayokay ka a magkanta!
Maybangon kam Barak a pōtot ni Abinoam,
as ikaro mo saw inpabahod mwaw!’
13 “Siraw nakalāsataw a Israelita,
nangay sa dyirad pangpangōlwaw.
Siraw tawotawowaw ni ĀPO,
nangay sa dyaken a nagsagāna a machigobat dyirad mabibīleg saw a soldādo.*5:13 Mana “nangay sa dyaken no mabibīleg saw a nakasagāna a machigobat”.
14 Kadwan yapo do Epraim, ki nangay sa do payahosonganaw.†5:14 Mana “a sīgod a tana dan Amalekita.”
As inyo a yapo do Benhamin kan tawotawo nyo, minonot kamo.
Yapod partīdos ni Makir,‡5:14 1 Kron. 7:14 nangay saw komanderaw,
kan yapo do Sabalon, nangay saw opisyalisaw.
15 Siraw pangpangōlo no Issakar, nachangay di Deborah.
On, siraw yapo do trībo no Issakar, nachonot sa di Barak a
nayyayo do payahosonganaw.
Ki siraw yapo do Ruben, nasisyay kapangtokto da.
Nagmangamanga sa an mangay sa mana engga.
16 Āngo ta naybābalay kamo do yanan dan arban a karniro a
mangadngey siras magpaspastoraw a manawag so arban da saw?
On, nasisyay saw yapo do trībo no Ruben.
Nagmangamanga sa an mangay sa mana engga.
17 Siraw yapo do Gilead,§5:17 Iyaw tana a Gilead, pinakabinglay a tana dan trībo no Gad kan godwa a trībo no Manasses. Jos. 22:9 nāw da do dāyaen Oksong Jordan,
kan siraw yapo do Dan, naybābalay sa do yanan gapor saw.
Siraw yapo do Aser, nayadis saba do aptan,
dinitā da do kanayan.
18 Ki siraw tawotawo no Sabalon, inposta daw byay da.
Komwan tawotawo saw no Naptali do paggogobatan.
19 “Siraw ar-āri, nangay sa a nachigobat.
On, siraw ar-āri no Kanaan, nachigobat sa
do Taanak a masngen do ranomaw no Megiddo,
ki abaw pirak a sinamsam da.
20 Yapo do hanyit, aran siraw bitohenaw, nachigobat sa.
Do kayam daw do ayaman da,*5:20 Siraw masngen a nasnasyon do Israel, inanohdan da a siraw dyos da, rārayay da saw myan saya do kahanyihanyitan, 'mas bitohen saw. Pasaray komaro sa kono a mangay a somidong dyira do gobat, paychawawen da saw kabōsor da, kan yangay daw ganyit dan animal. nachilāban sa da Sisera.
21 No ayo no Oksong Kison, linyod na sa.
On, iyaw adan a oksong a Oksong Kison.
Kayam ko. On, kayam ko a sia-ayit!
22 Sinpangan na, komalebkeb kabalyo daw do kapaypasngen da.
Nagpataray saw mabibīleg saw a komakabalyo na.
23 “Abayen nyo idi a Meros,” †5:23 Meros, ki idi do Naptali, kan masngen do paggogobatan. binata no anghilaw ni ĀPO.
On, kayitan nyo a abayen tawotawo saw daw,
ta nangay saba a somnidong di ĀPO,
kan omnarāyat saba di ĀPO a machigobat dyirad mabibīlegaw.
24 “Taywara pakono a mabindisyonan dyirad mababakes si Jael a
baket ni Heber a Kenita.
On, kagagasātan pakono do mababakes saya a omyan do tolda.
25 Nangdaw si Sisera so ranom, ki intoroh na dyaw gātas.
Inyangay naw mapalet a gātas do sabak a para do matohos so saad.
26 Inhap naw pāsokaw no tolda do asaw a kakamay na,
kan do kawananaw a kakamay na, inhap naw rongsohaw.
Rinongsoh na si Sisera, kan inapsa naw oho naw.
On, inapsa kan pinayhawos naw pāsokaw do kamnemnek naw.
27 Nakaspi a nalba do payawanaw no kokod na a
nayhaharag a dya makahodyi.
Do kokod naw nakaspi a nalba a
dawriw nakalbān na a nadiman.
28 “Do bintan, naylalawong si ānang ni Sisera.
Do dichodanaw no rihas, nagwanawan a nangyahes sya a kāna,
‘Āngo ta mahay a mawaraw logan naw a pachigobat?
Āngo ta ari pa abo karadakad dan logan na saw?’
29 Tominbay saw kasisirīban saw a mababakes dya.
Ki naybibidi pa ibahey na do inawan na a kāna,
30 ‘Malābit a maychichwas kan magbibinglay sa so nasamsam da a
asa mana dadwa mabakes do kāda soldādo,
dikolor kan nabordaan a tela para di Sisera,
kan dikolor kan nabordaan a laylay para do lagaw ko?’
31 “O ĀPO, komwan pakono kadiman dan tābo saw a kabōsor mo!
Ki sira pakono sīt mo, magranyag sa a akmas domadaw a araw.”
Do dāwri, myan danaw talna do tana so apat a poho a katawen.
*5:5 5:5 Eks. 19:18
†5:7 5:7 Mana “manda do kawara ko a Deborah”.
‡5:10 5:10Siraw lang mabaknang saw a nigosyanti myan so maydak a asno.
§5:11 5:11 Mana “yapo do syodad da saw”.
*5:13 5:13 Mana “nangay sa dyaken no mabibīleg saw a nakasagāna a machigobat”.
†5:14 5:14 Mana “a sīgod a tana dan Amalekita.”
‡5:14 5:14 1 Kron. 7:14
§5:17 5:17 Iyaw tana a Gilead, pinakabinglay a tana dan trībo no Gad kan godwa a trībo no Manasses. Jos. 22:9
*5:20 5:20 Siraw masngen a nasnasyon do Israel, inanohdan da a siraw dyos da, rārayay da saw myan saya do kahanyihanyitan, 'mas bitohen saw. Pasaray komaro sa kono a mangay a somidong dyira do gobat, paychawawen da saw kabōsor da, kan yangay daw ganyit dan animal.
†5:23 5:23 Meros, ki idi do Naptali, kan masngen do paggogobatan.