1 Siraw Israelitaw, ki minirwa dana sa mamarin so marahet do salapen ni ĀPO. Dawa, inparawat dana sa ni ĀPO dyirad Midyanitaw a nangitoray dyira so papito a katawen. 2 Maynamot ta taywara sa nangidadanes Midyanitaw,*6:2 Siraw kapotōtan Abraham kan Ketora. Gen. 25:1-6 namarin saw Israelitaw so taywan da do tokotokon saw, do aschip saw, kan pachikamītan saw a gwardyado. 3 Kāda tayoka sa a maymoha as omsi dana, mangay saw Midyanita, Amalekita, kan siraw tawotawo saw a yapo do dāya a mangraot dyira. 4 Magkampo sa do tanaw kan rārayawen daw mohamoha da saw a manda do Gasa do abagātan. Hapen da tābo saw karniro, bāka, kan asno da. Aba polos matokos a chabyay dan Israelitaw. 5 Ta do kangay daw, yononot da saw binyay kan tolda da a akmas pangenaw no kabaga. Sira kan kamilyo da saw, ki mabidangan saba do kāro da. On, mangay sa kan mayrārayaw sa do tana daw no Israelita. 6 Oltimo dana sa malidyatan Israelita saw do pariparinen dayan Midyanita. Dawa, tomanyitanyis sa di ĀPO so kasidong na.

7 Ki do nakatanyis daw di ĀPO a maynamot dyirad Midyanita saw, 8 tinoboy na dyiraw asaw a propīta a nangibahey so nya minsāhi a kāna, “Nyaw bata ni ĀPO a Dyos no Israel: Yaken nangihtot dyinyo do Egipto do tana a nakaadīpenan nyo. 9 Insalākan ko inyo dyirad taga Egipto saw kan dyirad tabo a nangidadanes dyinyo do dyaya tana. Pinaksyat ko sa do salapen nyo, as intoroh ko dyinyo tana daw. 10 Binata ko dyinyo, ‘Yaken ĀPO a Dyos nyo. Magdāyaw kamo aba dyirad dyos dan Amoreo do tana a pagyanan nyo.’ Ki inkaskāso nyo aba yaken.”

11 Sinpangan na, iyaw anghilaw ni ĀPO, nangay kan naydisna do sīrok no logo a kayo do Oprah a dyira ni Joash a yapo do partīdos ni Abieser. Iyaw pōtot naw a mahakay a si Gideon, ki myan do irahemaw no pamīsan so ōbas†6:11 No pamīsan, ki nabangbangan a bato a rakorakoh kan mararahem kan panokolan. a mangirek so trīgo tan itayo na dyirad Midyanita. 12 Napaboyaw no anghilaw ni ĀPO dya, kan nachisisirin dya a kāna, “Myan si ĀPO dyimo, imo a mabīleg a taga-gobat.”

13 Binata ni Gideon dya a kāna, “Ki sir, an oyod a myan si ĀPO dyamen, āngo ta maparin sa tabo nya dyamen? Yanan dan tabo saw a makaskasdāaw a kaparin na a inbahey da dyamen no kapoonan namen saw? Binata da a kon da, ‘Si ĀPO abawriw napahtot dyamen do Egipto?’ Ki sichangori, ninonolay naranaya yamen ni ĀPO, as inparawat naya yamen dyirad Midyanita.”

14 Inmandar ni ĀPO di Gideon a kāna, “May ka, kan osaren mo mabīleg a kayit mo, as kan isalākan mo saw Israelita dyirad Midyanita. Yaken manoboy dyimo.”

15 Initbay ni Gideon a kāna, “Ki ĀPO, maypāngo kaisalākan ko so Israel? Kakapsotan partīdos ko do trībo no Manasses, kan yaken kabobodisan so saad do pamilya ko.”

16 Ki nachisisirin si ĀPO dya a kāna, “Ki myan akonchi dyimo, kan dimanen mo sanchiw Midyanitaw a akma kay mangdiman so asa lang a tawo.”

17 Tominbay si Gideon a kāna, “An pakahwahokan mo yaken, torohan mo yaken so pamaneknek a imo oyod si ĀPO. 18 Komaro kaba do dya mandad kapaybidi ko a mangyangay so mākan a dāton ko a idasar ko dyimo.”

Tinbay na a kāna, “Mangnanaya ako dya mandad kapaybidi mo.”

19 Somindep si Gideon do bahay na, kan nangisagāna so orbon a kalding. Ginamay naw asaw a poho a kasalop a arina a parinen na a tināpay a abos yapo. Do nakahoto naranaw a tabo, pinasdot naw karnyaw do baskit, kan inkardiro naw asoyaw. Inyangay na do anghilaw ni ĀPO do sirokaw no logo a kayo, as nakaitoroh na sya dya.

20 Nachisisirin anghilaw dya a kāna, “Payen mo karnyaya kan tināpayaya a abos yapo do nyaya bato, as kapado mos asoyaya do hapot daya.” Ki pinarin ni Gideon. 21 Somarono, pinatodah no anghilaw ni ĀPO no tōtok no sarokodaw a inigpet na do karnyaw kan tināpayaw a abos yapo. Sigīda a minohtot apoy do batwaw, kan natemtem karnyaw kan tināpayaw a abos yapo. Do dāwri, todābo anghilaw ni ĀPO.

22 Do dāwri, natonngan ni Gideon a iyaw anghilaw ni ĀPO. Binata na do oltimo a kāmo na, “O Āpo a DYOS! Sichangori, naboya ko naw anghil mo do rōpanrōpa!”‡6:22 No anohdan da, no makaboya so Dyos, ki maparin na paba tongtongen mabyay.

23 Ki nachisisirin si ĀPO dya, “Myan pakono dyimo kaydamnayan no kapangtokto. Mamo kaba, ta madiman kaba.” 24 Dawa, pinatnek ni Gideon altaraw daw a para di ĀPO, as inpangaran naw “Si ĀPO pakayapwan kaydamnayan no kapangtokto.” Sichangori, ari pa daw do Oprah do partīdos ni Abieser.

25 Do dāwri a ahep, nachisisirin si ĀPO di Gideon a kāna, “Yay mwa hapen tōrowaw a bāka ni āmang mo kan asa pa a papito so tawen.§6:25 Mana “Yay mwa hapen chadadwa naw no tōro a bāka ni āmang mo a papito so tawen”. Osaren mo sa panggōyod a payrakrak so altaraw ni āmang mo di Baal. Tonghen mo iyaw postyaw a pagdaydayāwan no dyosa a Asera do payis naw.*6:25 Mik. 5:14 26 Katayoka na, patneken mo kosto a altar para di ĀPO a Dyos mo do talapawaya no nya paytokonan. Somarono, hapen mo iyaw chadadwa naw a tōro, as kaidāton mo sya a sosohan, iyirotong mo kayowaw no postyaw ni Asera a tinongeh mo.” 27 Dawa, nanghap si Gideon so asa poho dyirad magsirsīrbi saw dya, as pinarin naw inmandaraw dya ni ĀPO. Ki maynamot do rakoh a kāmo na dyirad pamilya naw kan siraw tawotawowaw do idi, pinarin na do mahep.

28 Do kamabekasanaw no somaronwaw a araw, do nakapaybangon danaw no tawotawo do idi, nadongso da a narakrak iyaw altaraw ni Baal, natongeh iyaw postyaw ni Asera do payis naw, as kan iyaw chadadwaw no tōro, ki naidāton do bayowaw a altar a napatnek. 29 Naysiniiyahes sa a kon da, “Sino namarin syay?” Do nakaimbistigar daw sya a maganay, natonngan da a si Gideon a pōtot ni Joash iyaw namarin sya. 30 Do dāwri, binata da di Joash a kon da, “Pahtoten mo barok mwaya dya tan dimanen namen, ta rinakrak naw altaraw ni Baal, kan tinongeh naw postyaw ni Asera do payis naw.”

31 Ki binata ni Joash dyirad makasolyaw a machikontra dya a kāna, “Āngo, inyoriw mangisakit di Baal? Isalākan nyori? Aran sino a mangisakit sya, ki maipadiman sakbay no mabekas. An oyod a dyos si Baal, maisakit na pakono bōkod na inawan ah, an myan mangrakrak so altar naw.” 32 Yapo do dāwri a araw, natawagan si Gibeon so Jerobbaal. No chakey na batahen, ki “Mainolay si Baal a mangbahes sya,” ta rinakrak naw altar na.

33 Do dāwri, siraw tabo a Midyanita, Amalekita, kan siraw tawotawo a yapo do dāya, nayrarapa sa. Namtang sa do Oksong Jordan, as nagkampo sa do Payahosongan Jesreel. 34 Ki pinabīleg no iyaw Ispirito no Dyos si Gideon. Do dāwri, inalopan ni Gideon trompītaw a panawag siras tawotawo saw do partīdos no Abieser a monot dya. 35 Tinoboy na saw tobotoboyenaw do intīro a tana no trībo no Manasses a manawag so monot dya. Tinoboy na pa saw tobotoboyenaw do trībo no Aser, Sabalon, kan Naptali, as nangay sa nachirapa dya.

36 Nachisisirin si Gideon di Āpo Dyos a kāna, “An oyod a osaren mo yaken a mangisalākan siras Israelitaya a akmas inkari mo, 37 payen ko lālataw no karniro a siboboboh do tanaw do yananaw a pangirkan so trīgo. Anchan mabekas, an nawri lang yanan apon bobohaw, ki aba do omdibonaw a tana, matonngan konchi a osaren mo yaken a mangisalākan siras Israelita a akmas binata mwaw.” 38 Oyod a naparin. Masāpa do somaronwaw a araw, do nakapaybangonaw ni Gideon, pinīsan naw aponaw do lālataw a siboboboh, as nakahap nas ranomaw a manawob a makapno do asa kasabak.

39 Do dāwri, nachisisirin si Gideon do Dyos a kāna, “Makasoli kaba dyaken, ta chāsi mo pa yaken a mirwa a maychirin. Palobōsan mo pa yaken a mangsōot so lālataya a siboboboh do maypisa pa. Changori, mabkoh pakono lālataya a siboboboh kan maapon do tanaya.” 40 Do dāwri a ahep, pinarin no Dyos. Nawri lang mabkoh lālataw a siboboboh, as maapon tabo tana.