1 Tabo saw ar-āri dan Amoreo do laōden no Jordan kan tabo saw ar-āri dan Kananeo a omyan do payis no Mediterranean a Tāw, ki nadāmag da a yinachan ni ĀPO ranomaw no Jordan para dyirad tawotawo no Israel a manda do nakapakabtang da. Do dāwri, namo dana sa, kan arabaw tored da a somalap dyirad Israelitaw.

2 Do dāwri, binata ni ĀPO di Joswe a kāna, “Mamarin kamo so imoko nyo sa yapo do bato, kan ipakōgit mo saw mahahakay a Israelita do dya kapotōtan.”*5:2 Mana “Maypirwa a kogiten mo siraw Israelita”. 3 Dawa, tinongpal ni Joswe akmas inbilinaw ni ĀPO dya, kan pinarin naw nya do Gibeat-haaralot.†5:3 No chakey na batahen ki, “paytokonan no kolāpot saw no boto”.

4 Nyaw paynamotan na a inpakōgit sa ni Joswe: Siraw tabo mahahakay a minohtot do Egipto, ki nakōgit sa. As siraw tabo a mahahakay a para gobat, ki nadiman sa do let-ang do kayan daw a manakey do katayokaw no nakakaro daw do Egipto. 5 Siraw komnarowaw a yapo do Egipto, ki nakōgit dana sa. Ki siraw tabo a nayanak do let-ang do kayam daw a yapo do Egipto, ki ari sa pad nakogit. 6 Ta siraw Israelitaw a komnaro a yapo do Egipto a dya nagtongpal so bilinaw ni ĀPO, ki nanakenakey sa so apat a poho a katawen do let-ang a manda do nakadiman a tabo no mahahakay saw a matoneng dana para gobat. Ta insapata ni ĀPO dyiraw nya a dyi da maboyaw mataba kan maasi a tana‡5:6 Do Hebreo a chirin, ki “tana a oyogan no gatas kan tagapolot no yokan”. a iyaw inkari naw dyirad kapoonan da saw. 7 Dawa, siraw pōtot da saw a mahahakay no nadiman saw a nachitādi da āmang da, inpakōgit sa ni Joswe, ta ari sa pad nakōgit do kayan daw a manakey. 8 Do nakatayoka daranaw a nagkōgit no tabo mahahakay, minyan sa pa do kampo daw manda do nakapya da.

9 As binata ni ĀPO di Joswe, “Changori, pinakaro§5:9 Do Hebreo a chirin, ki “binadede (a pinabawa)”, as kan no ōni no Gilgal, ki machiyengay do ōni no chirin “badede”. ko naw pakasnesnekan no kaadīpen nyo do Egipto.” Dawa, nya logar, ki mapangaranan so Gilgal a manda sichangori.

10 Do kayan daw no Israelita a nagkampo do Gilgal do tanap a masngen do Jeriko, do ahepaw no chaasa poho naw kan apat a karaw no dāmo a bohan,*5:10 Iyaw nya araw do kalindaryo dan Hebreo do kaychowa, ki naparin do bohan a Marso, Abril, mana rogi no Mayo. sinilibrar daw Pakanaknakmanaw so Nakahabas no Anghil. 11 Do somaronwaw a araw no nakatayoka no Pakanaknakmanaw so Nakahabas no Anghil, do dāwri a araw, chinan daw tināpayaw a abos yapo kan nakirogaw a sebāda†5:11 No plastar no sebāda, ki akmas paray mana trīgo. Eks. 9:31; Roth 1:22 a maāpit do tana a Kanaan. 12 As do dāwri a araw, nagsardeng a maychahesday māna, kan araba polos māna a para dyirad Israelita. Somniknan do dāwri, chinan daw maāpit saw a yapo do Kanaan.

13 Do kayanaw ni Joswe a masngen do Jeriko, tomnangay kan naychihat a naboya naw tawowaw a maytēnek do salapen naw a siig-igpet so ispāda. Inasngenan ni Joswe kan inyahes na dya a kāna, “Rarayay namenori imo mana kabōsor?”

14 “Rārayay akwaba kan kabōsor akwaba,” initbay no mahakayaw. “An yaken, ki myan ako dya a komander no bōyot ni ĀPO.” Sigīda a nagrōkob si Joswe do tana, kan dinaydāyaw na a kāna, “Yaken pachirawatan mo, mo Āpo. Āngo chakey mo a parinen ko?”

15 Inbahey no komanderaw no bōyot ni ĀPO di Joswe a kāna, “Pakarohen mo tokap mwaya, ta iyaw yananaya a paytēnekan mo, ki masantwan.” Kan pinarin ni Joswe.